Read South Giziga 2CH 4 Bible Online

2CH 4 - South Giziga bible

2CH 4

¹A ɗiyam li gi mikuli ti ɓiri gaza. Jek naŋ ati sliprik naŋ, metir kuruˀ kuruˀ, waɗ gil naŋ, metir zlum.

²A gam kisa ngi ɓiri gaza, a zilaka Mubuliy. Boŋ ngi mi naŋ metir zlum, naŋ ligidaˀa, gil naŋ metir cuw ti reta, gunno zlar na, sey zeweɗ ngi metir kuruˀ nga zlum.

³Gun sivirzi ngi kisa na, a gakaŋ wuya ti gusoŋhoy ɗiyeˀ ɗiyeˀ, gun gun makaw cuw. Ar metir gar na, gusoŋhoy kukur cuw kukur cuw, gusoŋ tayna, i mipa taŋ ti pi jom arleˀe ati magayaka.

⁴Magayaka naŋ taˀ a hirnga gusoŋhoy kuruˀ nga cuw. Makir, hiri pulaˀ pulaˀ tir vay muŋ, makir, hiri pulaˀ pulaˀ tisi pas ngi pastaˀ, makir, hiri pulaˀ pulaˀ tir vay ruwuy, waɗ makir, hiri pulaˀ pulaˀ tisi pas ngi mipriki. Virzi taŋhaya, ngir ti huroˀ ngir ti huroˀo.

⁵Ɓiɓir ngi magayaka, saŋtimetir dangafaɗ, yo mi naŋ ɗiyeˀ ɗiyeˀ kaɓa mi ngi zuŋ sikiɗi, a bam vu ati mufuyuk ngi matay mukusomkwal. Hur naŋ a gi gwat ngi litir durmuk skat ti kukur cuw.

⁶A ɗiyam kisa ngi ɓiri gazahay kuruˀ. A ɗuvam zlum tir vay hazum ngi hay ngi Bumbulvuŋ, waɗ zlum tir vay gula, ɓa ngi bunoy: ginewey masoko taŋ ngi gi mikuli mizlam zlam na, a bunaka taŋ a ra, amma yam ngir magayak madiɗa ngi ɓiri gaza na, i masayay mabunam ti naŋ.

⁷A ɗiyam gwat ngi ɗuva lampehey kuruˀ ti ɓiri tapasl tapasl, kaɓa sipi jiviɗ naŋ, a ɗuvaka taŋ taˀ taˀ ar hay ngi Bumbulvuŋ, zlum ti gula, zlum ti hazum.

⁸A ɗiyam tabuloy kuruˀ, a ɗuvaka taŋ taˀ taˀ ar hay ngi Bumbulvuŋ, zlum ti hazum, zlum ti gula. A ɗiyam kopoy skat ti ɓiri tapasl tapasl ngi kuca li.

⁹A ɗiyam wazlaray da masayaya, waɗ mekelem madiɗa, ti miviŋhey ava, a puyaka ɓiri gaza da miviŋheye sirit sirit wãˀ.

¹⁰A ɗuvaka magayak madiɗa tuwa, taˀ tir vay hazum ngi hay ngi Bumbulvuŋ, kini tir vay ruwuy, ngi si pas ngi miprik.

¹¹A dirba Huram miɗiya kisahay, peley waɗ kop ngi kuca lihey na, kite a kiɗa mi ngi slra ngi gi da buy Salomoŋ ar hay ngi Bumbulvuŋ le gar. I slra misi ani hanayna:

¹²ɓamtalay cuw, mecepek miligidaˀa ligidaˀahay cuw ngi tiɗi a hirnga ɓamtalaya, sukwi ngi gwat njarara ka zuvahay cuw ngi sirta mecepekey mucuw ligidaˀ ligidaˀa, misi a hirnga ɓamtalay tuwa.

¹³A ɗiyi gwat loŋ loŋ ka yi ngi hunduruk, skat skat mufaɗa, a hirnga gwat misi ka zuvahay tuwa, gun gun makaw cuw, ɓa ngi sirta hirnga ngi mecepekey mucuw ligidaˀ ligidaˀ misi a hirnga ɓamtalay tuwa.

¹⁴A ɗiyi gwat ngi ɗuva magayakay, waɗ magayak memeɗehey taˀ taˀ a hirnga taŋ.

¹⁵Magayak madiɗa purla, waɗ slahay kuruˀ nga cuw asi virzi naŋ.

¹⁶kisahay, peley, kuyer ngi zligi useˀ ati gwat ngi slrahay gar na, Huram-Abi a pa taŋ ti pi ti ɓiri gaza, kuleɗ kuleɗ, a ɗiya taŋ da buy Salomoŋ, ɓa ngi gi slra ar hay ngi Bumbulvuŋ.

¹⁷Salomoŋ a ɓa mizli, ɓa a ɗiyaka gwat ngi slrahay na cek, peˀpeˀ ti pi ar wala ngi walahay Sukot ati Seredata.

¹⁸Salomoŋ a ɓa mizli, a ɗiyam gwat tayna haɗa, ɓa mbur a ɓi: a tikam ɓiri gaza vur slra nah kilo kini na, a ɓa gu ta.

¹⁹Salomoŋ a ɓa mizli, a ɗiyam gwatay hĩˀĩ vur hay ngi Buymisemuŋ: i li gi mikuli ti ɓiri tapasl tapasl, tabul ngi pi ɗaf muvula le da Buymisemuŋ,

²⁰gwat ngi ɗuva lampehey ati lampe taŋhaya ti ɓiri tapasl tapasl, ɓa a tiɓam vu a mbuŋ viŋ mipal, kaɓa mibigaka jiviɗ naŋ,

²¹mufuyukoy, lampehey, megec memeɗehey cek ti ɓiri tapasl tapasl mileɗeɗe,

²²sliwiɗey, kop ngi kuca lihey, sikiɗ memeɗehey, waɗ taasa memeɗehey, cek ti ɓiri tapasl tapasl mileɗeɗe. Miviŋ ngi hayaya, miviŋ ngi huroˀ ngi li mipal wãˀa waɗ miviŋ ngi viŋ madiɗa vuna na, taŋ cek ti ɓiri tapasl tapasl.