Read South Giziga 2CH 5 Bible Online

2CH 5 - South Giziga bible

2CH 5

¹Salomoŋ mikiɗa mi ngi ndira hay ngi Bumbulvuŋ gar muduba na, a dirba nah, gwatay cine naŋ Davit muvula taŋ da Buymisemuŋ tuwa na, a so taŋ ng'araŋ: i ɓiri bara, ɓiri tapasl tapasl ati gwat ngi slrahay gar na, aru taŋ, ara pa taŋ ar hay mapam di zlili ngir hay ngi Buymisemuŋ.

²Akẽh na, buy Salomoŋ a kuso mizli micawwa ngi Israyeleye ng'avaŋ a Zeruzaleme ati buy ngi sukwihey, waɗ madiɗa ngi hay ngi Israyeleye. A ɓa taŋ ɓa a zuɓaka akoti ngi jumoˀay ngi Bumbulvuŋ misi ar walahay ngi Davit, a zilaka Siyoŋ ma, ɓa a ram di ng'ar hay ngi Bumbulvuŋ.

³Mizli Israyeley gar a kusom nga ciki buyo tapas muguzlum ngi kiya mitarnaˀ naŋ.

⁴Mizli micawwa ngi Israyeleye, ti taŋ mindiloko gar na, Levihey a zuɓaka akoti.

⁵Masay Levihey, a zuɓaka akoti, guɗuk ngi zlir ati Buymisemuŋ waɗ gwat muvuku vu taŋ gar misi ar guɗuko.

⁶Buy Salomoŋ ati jum ngi Israyeley gar mukusom bummoˀ a ciki akoti tuwa na, a gam mikuli ti tumuŋhoy ati slahay haɗi, ko mbur a slufa taŋ gu ta.

⁷Akẽh na, masayay a cam ti akoti ngi jumoˀay ngi Bumbulvuŋ ng'ar li naŋ ar viŋ mipal ngi haya, a zilaka ‹li mipal wãˀ› misi asi kirpasl ngi Kerubeŋheye.

⁸Kerubeŋheye, taŋ kirpasl binjar binjar a hirnga li muɗuvaka akoti tuwa, sirit sirit akoti ati ɓeɓele ngi zuɓ naŋhaya.

⁹Ɓeɓeleheye taŋ jek jek haɗa, mbak mi taŋhay a puroko sesẽŋ angi li mipal misi a mbuŋ viŋ mipal na. Amma anta puraka taŋ sesẽŋ avra ta ɓula. Hã dana kwana, akoti naŋ da ar li naŋ aruŋ.

¹⁰Gwat anta a hur akoti vuna ta, sey belelerey cuw, Moyis mipa taŋ anga zle a Horep, ti Bumbulvuŋ mujumˀay ati Israyeley angi bo taŋ ti Ezipte.

¹¹Hirak ti masayay muboko tir li mipala na, taŋ cek a tiram le taŋ pal, anta vur sila vur sila mata ɓula.

¹²Levi mikiɗa gwat ngi dunguroy cek: i Asaf, Heman, Yeduduŋ waɗ ziri taŋhay ati sukum taŋhaya, a kam zana mija ti gugumay mislirkeɗ. Taŋ dedeŋ tisi pas ngi miprik ngi li gi mikuli, kaw kaw ti jãwjãway, garayahay waɗ gujuvuroy. Masayay skat ti kukur cuw, a roko dedeŋ a ciki taŋ, ara zlam dimis, ara fam zara.

¹³Mifi zarahay ati mikiɗa gwat ngi dunguroyo, a jumom gar taŋ arleˀe ngi hunuma Bumbulvuŋ, yo ngi gaŋ dudok ti ˀay purla. Taŋ mira faka zara, ara kiɗaka jãwjãw ati gwat ngi dungur mekelemeye na, ara hunumaka Bumbulvuŋ, a ɓam: «Buymisemuŋ naŋ mezleŋ, yo gi teŋteŋ naŋ a ndir ngi sete.» Akẽh na, gazlavay a naha hay ngi Bumbulvuŋ tirslik.

¹⁴Mbak ko masayay a cicam a huroˀo ngi ga slra taŋ gu mata vur gazlavay tuwa, asi dudok ngi Bumbulvuŋ a naha hay ngi Buymisemuŋ le.