Read South Giziga 2CH 6 Bible Online

2CH 6 - South Giziga bible

2CH 6

¹Dar Salomoŋ a til mi, a ɓi: «Bumbulvuŋ, ka, ki ɓi le, ki wuɗ cifi ar luvuŋ.

²Amma ya, i ndiruw hay ngi buy le, hay ɓa ki ndir anga ngi sete!»

³Jum ngi Israyeley gar a kusom le, dedeŋ dedeŋ yõˀ. Buy Salomoŋ a mbiɗi hiri, a ɗuwula mi da jum ngi Israyeleye.

⁴A ɓi: «Sise da Bumbulvuŋ Buymisemuŋ ngi Israyele, gwat naŋ miɓa ɓi nah zleˀe da baha Davit na, a ga le ti haŋ naŋ muduba, a ɓi zleˀe na:

⁵‹Zle ti ya mubo ti Israyel mizli ɗuwoy ti Ezipte na, a wuzla walahay ngir sukwi Israyel gar, ɓa walahay hana a sa ndirikiy hay anga ngi zila slimiɗ ɗu na, ko i wini ta. Yo i wini mbur mekelem ɓa a tiri buy ngi Israyel, mizli ɗuwoyo ta.

⁶Amma i wina Zeruzaleme le, ɓa i ndir angaŋ. Yo i wina Davite le ɓa a cifi buy ngi Israyel, mizli ɗuwoy.›

⁷Baha Davite, a wuluk le a mevele zleˀe, ɓa a ndira hay ngi zila slimiɗ ngi Bumbulvuŋ Buymisemuŋ ngi Israyele.

⁸Amma Bumbulvuŋ a ɓa baha Davite na: ‹Ki wuluk le a mevele, ɓa ki ndiriy hay ngi zila slimiɗ ɗu, naŋ kuy, i wuluk mezleŋ.

⁹Amma so na, masa ndiriy hay nah i ka ta, masa ndiriy hay ngi zila slimiɗ ɗu anga, i zuŋ ngi kwacay ɗiki.›

¹⁰Joˀ Salomoŋ a ɓi ma: Bumbulvuŋ a ga gwat naŋ miɓa zleˀe tuwa le muduba so: I zuɓa li ngi baha Davite le, i cifi le ar janga ngi buy Israyele, kaɓa Bumbulvuŋ miɓa tuwa. I ndira hay misenna le ngi zila slimiɗ ngi Bumbulvuŋ Buymisemuŋ ngi Israyele.

¹¹Akoti misi beleler ngi jumoˀay ngi Bumbulvuŋ ati Israyeley na, i ɗuva le taˀ angaŋ.»

¹²Ar nah na, Salomoŋ a cici deŋ a mbuŋ li gi mikuli da Bumbulvuŋ, hiri taˀ ng'ar jum ngi Israyeley, haŋhaya hoc nga muŋ.

¹³Asi mike na, Salomoŋ a ɗiyi gwat le njuroŋ ti ɓiri gaza a wazlaraya. Jek naŋ ati sliprik naŋ i misi purla, metir cuw ti reta cuw ti reta, waɗ gil naŋ metir pal ti reta. Salomoŋ a jiɗ gilaˀ angaŋ, a huruk huruk dilak a mbuŋ Israyele mukusomo gar, a hila haŋ hoc nga muŋ,

¹⁴a ɓi: «Bumbulvuŋ Buymisemuŋ ngi Israyel, Buymisemuŋ misi kaɓa ka, ko a muŋ, ko a ruwuy anta. Gawla ɗikeye, da ara ram a mbuŋ ɗike ti mevel purla na, ki ndir ti jumoˀay ati taŋ, yo ka ti mevel mezle vur taŋ.

¹⁵Gwat ka miɓa ɗaˀ le zleˀe da baha, gawla ɗik Davit na, ki ga le. Ɓi ka miɓa ti balam ɗik na, ki ga le ti haŋ ɗike, kaɓa ndra mira puraka dana ani na.

¹⁶Bumbulvuŋ Buymisemuŋ ngi Israyel, wurenna so na, ɓi ka miɓa da baha, gawla ɗik Davit na, gaŋ, asi ki ɓaŋ zleˀe na: ‹Da dideˀ ɗikey ara jam lesl ar gwat ngi gi taŋ, ara sipaka ɓimujuwa ɗuwoyo, kaɓa ka misipa na, masa cifi ndrehhe a mbuŋ ɗu, ar janga ngi zumabuy ar Israyeleye, i mbur ngi wuzla mizli ɗikey.›

¹⁷Bumbulvuŋ Buymisemuŋ ngi Israyel, wurenna, gwat ka miɓa da gawla ɗik Davit tuwa na, anja a gi muduba.

¹⁸Ani na, Buymisemuŋ vuna, zliv a cifi ati mizli a ruwuyo gisiŋ sukwani? Muŋ, ko ti naŋ mibirngiŋ gar na, a cifi di joˀ gu ta. Sokkota hay ya mindira hana jak kwa?

¹⁹Aw Bumbulvuŋ Buymisemuŋ ɗu, jika slimiɗ angi diradibiɗ ati tumbul nga ya gawla ɗike. Ya gawla ɗik matiluw mi, ya madiruw dibiɗ na, cine takwa.

²⁰Anja hiri ɗik a ndir taˀ angi hay hana, ti duvuɗ ti papas gar. I li ka miɓi zleˀe vurˀe, kisa ndir anga tuwa. Cina diradibiɗ ya madiruw di ar li hana!

²¹Ya gawla ɗik matumbuluw, yo Israyel, mizli ɗikey matumbulukuw hiri pulaˀ ng'ar li hana na, ambuh, cine takwa! Ka, Buymisemuŋ, cino di zle a muŋ, ar li ɗik ka misi anga na. Cina ndra di, yo pula mungra ndraˀahaya.

²²«Da ara mbiɗaka hirnga da mburo asi a zluɓ ɓi le avu sukum naŋ, yo a tikakaŋ ˀay, a hudum, ɓa nis a diɗo a hirnga naŋ. Da mbur nah, a so le, a hudum le a mbuŋ li gi mikuli ɗik, a mbuŋ hay misenna na,

²³ka na, Buymisemuŋ, cino di zle a muŋ, ki cifi teˀ ta, so ga kiita ngi gawla ɗikeye, mbur muzluɓa ɓi na, ɓa ki kutaŋ ti bonoy, yo ɓa ki paŋ malambaˀ naŋ na nga hirnga naŋ, ɓa mbur mijeŋŋe na kwana, ki njika i mbur mijeŋŋe, ki gi di weˀe avu jeŋŋe naŋ.

²⁴«Da Israyel, mizli ɗikeye, mesene taŋhay a kiɗaka taŋ le, asi taŋ micinukuw mi ta, da ara zilam marava, ara hunumukuw, ara diram dibiɗ, yo ara tumbulukuw ar hay hana na,

²⁵ka na, Buymisemuŋ, cino taŋ di zle a muŋ, pula mungra ngi Israyel, mizli ɗikeye, yo hirwuy ka muvula taŋ di zleˀe, da taŋ ati dideˀ taŋhay na, mo ti taŋ ng'ara a muŋ.

²⁶«Da kaɓa ani, muŋ a sa gici le, vuŋ anta sa go mata, asi Israyeley masa cinukuw mi ta, da ara diram dibiɗ, hiri pulaˀ ng'ar li misenna, ara hunumukuw, yo ara zilam marava ar mungra taŋ asi ka mukuta taŋ ti bonoy na,

²⁷ka na, Buymisemuŋ, cino taŋ di zle a muŋ, pula mungra taŋhaya, asi mike na, taŋ i gawla ɗikey, yo i Israyel, mizli ɗikey. Naŋ kine, biga taŋ jiviɗ mezle ɓa a sipaka, yo go vuŋ asi ruwuy ɗik, hirwuy ka muvula ɓa a ndir wãˀ da taŋ mizli ɗikey na.

²⁸«Da may misa gi le asi ruwuyo, malla da jiji mozorbono misa gi le, da gwat ngi migamay ara muˀulom malla ara zãˀãm ar guva, da jaray malla yuk a bo le hindiˀille, Israyeleye, da mesene taŋhay ara ndahaka walahay ngi si ruwuy taŋhaya, ko da i jiji doflo wana, malla jiji wanaka gar misa ndilo le,

²⁹diradibiɗ malla tumbul vur ɓi mike gar, ngi mbur purla, malla ko ngi Israyel, mizli ɗikey gar, mburo, jiji doflo ati bonoy naŋ na, da a si na le ar jileŋ ngi mevele, da a sa hila haŋ le hoc nga muŋ ngir tivi hay hana na,

³⁰ka na, Buymisemuŋ, cino di zle a muŋ, ar li cifi ɗik ka misi ara. Pula mungra ngi mbur gar, yo gi ti mburo gar weˀe avu gwat ngi gi naŋ, asi misina mevel ngi mbur gar na, i ka pal ɗiki, na zle, ki si na mevel ngi mizli le gar.

³¹Ga kahana, ɓa Israyeleye, ar hin ngi siifa taŋ gar na, a zluwunam ti ka, a sipaka jiviɗ ɗike, a ruwuy ka muvula da dideˀ ndrahay na.

³²«Da ko i mbur mulak, mbur ngisi Israyel, mizli ɗikey na ta, da a so ti ruwuy mikileŋ asi slimiɗ ɗik mazil, asi gidaŋ ngi hirbazla ɗik ka magi di slra na, da a so le dir dibiɗ ar hay hana na,

³³ka na, Buymisemuŋ, cino di zle a muŋ, ar li cifi ɗik, ka misi ara na, yo gwat mbur mulak misa cufuɗ le avu ka gar na, gaŋ di weˀe avu cufuɗ naŋ na. Kanah na, naɓa mizli ngi si ruwuy gar a sa sinukuw, a sa zluwunam ti ka, a sa cikukuw hirnga kaɓa Israyel, mizli ɗikey macikukuw di na ya, yo anja a sinaka slimiɗ ɗik ara zil ar hay ya mindira misenna.

³⁴Mizli ɗikeye, da ka misa pula taŋ jiviɗ le ɓa a bam nga gi vurum ati mesene taŋhay, da ara diram dibiɗ hiri pulaˀ ng'ar walahay ka muwuna, yo ng'avi hay ya mindira ngi zila slimiɗ ɗik tuwa na,

³⁵ka na, Buymisemuŋ, diradibiɗ taŋ ati tumbul taŋ na, cino taŋ di zle a muŋ, yo so jina taŋ.

³⁶«Ani mburo, ɓa a gi mungra ta na, anta wãˀ. Da kaɓa Israyeley a sa ngilam ɓi le avu ka, yo ka misa ji mevel le ar taŋ, ka misa vula taŋ le asi haŋ ngi mesene taŋhay, yo mesene taŋhay misa jaka taŋ le, a cohom taŋ le ng'ar beke angi hirwuy mikileŋ malla migweˀe,

³⁷taŋ misi ngir hirwuy mijaka taŋ ng'ara tuwa, a wulkam le, a zilam marava le, a tumbulukuw angi hirwuy taŋ misi i bekehey a diga tuwa, a ɓukuw: ‹Aw! I gam mungra le, i zluɓam ɓi le, i gam malambaˀ le›,

³⁸taŋ misi i mijahay le angi hirwuy miram taŋ ng'ara tuwa, da ara zilam marava ti mevel purla, ti membezleŋ ngi vu taŋ wãˀ, yo da ara diram dibiɗ, hiri pulaˀ pulaˀ ngir tivi hirwuy taŋ, hirwuy ka muvula da dideˀ taŋhay na, yo hiri pulaˀ ngir tivi walahay ka muwuna, waɗ ngir tivi hay ya mindira ngi zila slimiɗ ɗik tuwa na,

³⁹ka na, Buymisemuŋ, cino taŋ di zle a muŋ, zle ar li cifi ɗik, ka misi anga na. Dira dibiɗ ati tumbul taŋ na, cino taŋ di, so jina taŋ, yo pula mungra ngi mizli ɗikey mugukuw di na.

⁴⁰«Aw Buymisemuŋ ɗu, wurenna, wuna hiri so, jika slimiɗ ngi cine diradibiɗ ya madira ar li misenna!

⁴¹Bumbulvuŋ Buymisemuŋ ɗu, wurenna sawa ng'ar li musukavu ɗike, ka ati akoti misi gidaŋ ɗik ara na! Aw Bumbulvuŋ Buymisemuŋ, anja masay ɗikey a kaka ɓi ngi laha vu avu vu kaɓa zana! Anja mizli miteŋteŋ ɗikey a zluzluɓam, a mumulom.

⁴²Bumbulvuŋ Buymisemuŋ, mbur ka micaŋ buy na, ki paŋ haŋ ta. Wuluk keŋ ar slra mezle ka miga da gawla ɗik Davit na!»