Read South Giziga 2CH 7 Bible Online

2CH 7 - South Giziga bible

2CH 7

¹A dirba salomoŋ mikiɗa mi ngi diradibiɗe na, vu a po sar ti muŋ, a zluma gwat ngi mikuli mizlam zlama waɗ mikuli muho gara, joˀ dudok ngi Bumbulvuŋ a naha hay ngi Bumbulvuŋ.

²Masayay a cam ng'ar hay ngi Bumbulvuŋ gu mata, asi dudok ngi Bumbulvuŋ a naha hay ngi Bumbulvuŋ le.

³Israyeley gar mupuraka vu mupo sar ti muŋ ati dudok ngi Bumbulvuŋ ng'ar hay tuwa na, a huruk hurukam a ruwuy a ruwuy, ar li mididirka, huruk huruk, a hunumaka Bumbulvuŋ, a ɓam: «Buymisemuŋ naŋ mezleŋ, yo gi teŋteŋ naŋ a ndir ngi sete.»

⁴Buy ati mizli gar na, a gam mikuli da Bumbulvuŋ.

⁵Buy Salomoŋ a gi mikuli ti sla durmuk kukur cuw nga cuw, tumuŋ ati ˀaway durmuk skat ti kukur cuw. Buy ati mizli gar muvulaka hay ngi Buymisemuŋ na, kahana so.

⁶Masayaya dedeŋ dedeŋ ar li taŋ ar li taŋ. Leviheye, ara kiɗaka gwat ngi dungur ngi Bumbulvuŋhoyo. Buy Davit a ɗiya taŋ ngi hunuma Bumbulvuŋ, asi gi teŋteŋ naŋ mandir hã ngi set na. Davit mahunuma Buymisemuŋ kanah tisi taŋ tuwa na, masayaya, ara fam zara a ciki taŋ, waɗ Israyeleye gar dedeŋ dedeŋ.

⁷Wuzla wazlaray misi a mbuŋ hay ngi Bumbulvuŋ na, Salomuŋ a tiri di pal. Naŋ kine, mikuli mizlam zlam waɗ mungul ngi gi mikuli ngi ngiɓiˀaya, buy Salomoŋ a ga taŋ a wazlaraya, asi li gi mikuli ngi ɓiri gaza naŋ miɗiya na, mikuli mizlam zlam ati mungul ngi mikuli ngi ngiɓiˀay na, a ga taŋ geˀ ta.

⁸Hirak ti nana, Salomoŋ jom ati Israyeley gar a gaka muguzlum ngi guɗuko, hã hin tarnaˀa. I kus madiɗa, mizli a soko ti Lebo-Hamat, hirwuy vay muŋ, hã cek cek ti mizaw Ezipte, vay ruwuy.

⁹Ar hin midangafaɗ naŋ na, a gam muguzlum mata. Asi a gaka ngi vula li gi mikuli da Buymisemuŋ, hã hin tarnaˀ, waɗ muguzlum ngi guɗuko kwana, hã hin tarnaˀ ma.

¹⁰A dirba nah, ar hin kukur cuw nga makir ngi kiya mitarnaˀ naŋ tuwa na, buy Salomoŋ a waha Israyeleye ngi hay taŋhay. A mam ti mumul ati cine ndum a mevele, asi mezle Bumbulvuŋ miga da Davit, da Salomoŋ waɗ da Israyel, mizli naŋhaya.

¹¹Salomoŋ, hay ngi Bumbulvuŋ ati hay nga naŋ buyo, waɗ gwat naŋ muwulka ngi ndir ngi ndir a hur hayaya cuw taŋ gar na, a kiɗa mi taŋ le.

¹²Bumbulvuŋ a bigaŋ vu ngi duvuɗu, a ɓaŋ: «I cine diradibiɗ ɗike le, yo i wina li hana le da ya ɓa a ndir i hay ɓa ki gikiy mikuli a raŋ.

¹³Da i gica muŋ le, ba vuŋ gi mata, da i pulo jaray le ɓa a zuma gwat ngi si ruwuyo, da i slino mozorbono le ng'ar mizli ɗuwoyo,

¹⁴yo da mizli ɗuwoy ya muvula taŋ slimiɗ ɗu na, a hinam hirnga le, ara diram dibiɗ, yo ara sipikiy, a pulaka gwat ngi gi taŋ malambaˀ na le na, ya i sa jiko slimiɗ vur taŋ baɗ a muŋ, i sa pula taŋ mungra taŋhaya, yo i sa ɗiya hiri ngi gwat ya mihirya asi ruwuy taŋ na.

¹⁵Wurenna, hiri ɗu a ro taˀ avu taŋ, yo slimiɗ jakka ngi cine diradibiɗ masa dirikiy di ar hay hana.

¹⁶Yo wurenna, i wina hay hana le, i tiri di le pal, ɓa yi ndir anga ngi caˀa. I sa ɗuva hiri ɗu ati mevel ɗu taˀ anga ndrehhe.

¹⁷Ka so na, da gi gwat ɗik a mbuŋ ɗu, naŋ kaɓa ngi bunuk Davit, ɓi ya muɓuw di ɗaˀ le na, ki ra ga kanah, yo ɓimujuwa ɗuwoy ati sirik ɗuwoyo, ki ra ja taŋ a hirnga na,

¹⁸naɓa i sa ga ɓa zumabuy ɗik a ndir gidaŋ gidaŋ kaɓa ya miɓa zleˀe da bunuk Davit na, asi yi ɓaŋ le: ‹Masa wa hirwuy Israyele ndrehhe i mbur ngi wuzla dideˀ ɗikey.›

¹⁹Amma da ki mbuɗam duba le avu ya, ki pulaka ɓimujuwa ɗuwoy ati ɓimuɗuva ɗuwoy, ya muɗuva taŋ a mbuŋ kum na le, da ki ra gam mezegwel da kulihey, ki ra huruk hurukam a mbuŋ taŋ na,

²⁰naɓa hirwuy ɗu ya muvulukum di na, i sa tiɓa avu kumo. Hay ya mitiri di pal ngi zila slimiɗ ɗu ara tuwa na, i sa pula mbak ŋzloh avra, kileŋ a mihiri ɗu, i sa ga ɓa mizli gar a kiɗam mambaˀ ti kum, a singiram ar kum.

²¹Tapas mizli masa cohom gweˀ tivi hay migila misenna tuwa na, hã a sa zuma taŋ hirnga, a sa ɓam: ‹Bumbulvuŋ a ga gwat da hirwuy hana ati hay misenna kahana vurmike?›

²²Mizli a sa mbiɗaka taŋ di: ‹Asi Israyeleye, Bumbulvuŋ Buymisemuŋ ngi dideˀ taŋhay mubo taŋ ti ruwuy Ezipte na, a pulakaŋ le, a jumom le ng'avu kulihey, a huruk hurukam le a mbuŋ taŋ, dar a gaka taŋ mezegweley. Buymisemuŋ mupulo bonoy hanayna gar angi taŋ na vurˀe.›»