Read South Giziga 2CH 8 Bible Online

2CH 8 - South Giziga bible

2CH 8

¹Ng'avi kiɗa mi ngi vi kukur cuw Salomoŋ mindir di hay ngi Bumbulvuŋ ati hay nga naŋ na,

²a mahiri ngi ndira walahayay, Hiram, buy Tir muvulaŋ taŋ na, a ɓa Israyeleye, a cifam angi taŋ.

³A dirba nah, Salomoŋ ara luuma hirwuy Hamat-Soba ngi kiɗa vu, a tiɓaŋ.

⁴A ndira walahay Tatmor misi a wuzlaɓuh mikirɗak kirɗak ati walahayay gar naŋ mindira taŋ ngi wi vu ti gwatay, kini tir vay Hamat.

⁵A ndira walahay Bet-Horoŋ -Miɗingir waɗ Bet-Horoŋ- Mikwitike. I walahay mugunohoy le gun gun ti moholoy, ti miviŋhey, kiɗasl kiɗasl ti faɓuru,

⁶waɗ walahay Baˀalat ati walahayay gar naŋ mawi vu ti gwat naŋ ngi zumoy ar taŋ, yo naŋ macica mota ngi vurumoy, waɗ naŋ majuwa pilis naŋhay ar taŋ. Salomoŋ, gwat naŋ muwuɗ ar walahay Zeruzaleme gar na, a ndira taŋ, a ndir hayay angi hirwuy Libaŋ waɗ angi hirwuy naŋ miwa miwa gar.

⁷Dambalaka, mizli misi i Israyeley ta na, a ndiram le a si ruwuy aruŋ: i Hitihey, Amorihey, perizihey, Hivihey waɗ Zebusihey.

⁸Zir taŋhay mindiram asi ruwuyo, asi Israyeley a ngizlaka taŋ wãˀ gu ta tuwa na, Salomoŋ a hil a wuzla taŋ i taŋ ngi gi slra mitak ˀaya, hã dana.

⁹Salomoŋ a hil a wuzla Israyeley ngi gi slra mitakˀaya ta, amma a hila taŋ, taŋ ng'ar vurum, a cifa taŋ i madiɗa ngi soje mijijira gwat ngi vurum naŋhay, ngi misi mota ngi vurumoy waɗ ngi jiɗ pilis naŋhay.

¹⁰A wunam buy miwi lihey skat skat cuw ti kukur zlum ɓa ngi wa mizli ar slra ngi Salomoŋ.

¹¹Salomoŋ a ɓa ngwas naŋ, zuŋ ngi buy madiɗa ngi Ezipte, a pula walahay ngi Davite, aru ng'ar hay naŋ mindiraŋ di. Asi a ɓi na: «Anja ngwas ɗu a hin ar hay ngi Davit, buy Israyele ta, asi lihey mikaka akoti ngi Buymisemuŋ anga na, taŋ pal.»

¹²Akẽh so na, Salomoŋ a gi mikuli mizlam zlam ti ginewey ar li gi mikuli naŋ mindira da Bumbulvuŋ a mbuŋ jwleeru na.

¹³Vur hin gar, naŋ muwuɗ le ɓa a gi mikuli kaɓa Moyis muɗuva ɓi nah tuwa na, a ga ti hin ngi sabatay, tapas hin mudumbuŋ ngi kiya, waɗ tapas hin ngi muguzlum madiɗahay mimakir ar vi na: i muguzlum ngi ɗaf manja is a raŋ, muguzlum ngi sifi waɗ muguzlum ngi guɗuku.

¹⁴Salomoŋ a cifa mizli ar slra taŋ ar slra taŋ, kaɓa cine naŋ Davit mujuwa ɓi nah zleˀe, ngay masayaya, waɗ ngi leviheye, ɓa ngi hunuma Bumbulvuŋ vur hin gar ti dimisi, yo ɓa ngi jina masayay ar slra taŋ. A cifa mijigina mizlingreheye ti ngay avu miviŋheye tiɗeˀe. Davit, mbur ngi Buymisemuŋ, ɓi naŋ miɓa ɗaˀ le zleˀe tuwa na, naŋ kahana so.

¹⁵Gwat, Davit muwuɗ vur masayay ati levihey, vur ko mike gar waɗ vur zlili gar na, anta kiraham kileŋ ava ta.

¹⁶Naŋ kine, slra Salomoŋ muwuɗ ngi gi ngi gi gar na, zle avu ɗuva virzi ngi hay ngi Bumbulvuŋ, hã avu kiɗa mi naŋ na, a gam le. Hay ngi Bumbulvuŋ naŋ mezleŋ.

¹⁷Dar salomoŋ aru nga Esiyoŋ-Geber waɗ kini nga Elat, ar li pi sar ngi palalamay ar mubuliy ngi lavaɗa, angi hirwuy Edom.

¹⁸Buy Hiram a slinaŋ ti palalam ngi yamay waɗ beke misina yamay le kuy kuy, joˀ gawla naŋhay a soko taŋ da Salomoŋ. A ram gar taŋ ati gawla ngi Salomoŋhoy nga Ofir, a soko ti ɓiri tapasl tapasl fineˀ ton kuruˀ nga makir da buy Salomoŋ.