Read South Giziga 2CH 9 Bible Online

2CH 9 - South Giziga bible

2CH 9

¹Maˀay ngi ruwuy Saba, ara cine slimiɗ ngi Salomoŋ mazil na. Ɓa a ci a kwacay naŋ na, aru nga Zeruzalem ti cufuɗ mutuwaˀ tuwaˀhay, ɓa a sina, zliv naŋ ti sinmijileŋ gisiŋ kwana. A so ti zigiduw haɗi aseˀe, ti zlogomohoy ma jijiroko urdi ati ɓiri tapasl tapasl haɗi teˀe, waɗ ɗugur mupuɗaw puɗaway. Naŋ mindilo a hay Salomoŋ na, a cufuɗaŋ ar ɓi naŋ mujuwo di a kwacay naŋ tuwa gar.

²Salomoŋ a mbiɗaŋ ɓi ngi cufuɗ naŋhaya le gar. Ɓa cufuɗ misi Salomoŋ a mbiɗaŋ di kuy kuy gu ta na, anta ko pal ta.

³Mingiɓi ngi sinmijileŋ ngi Salomoŋ na, maˀãy ngi ruwuy Saba a cine taŋ le gar, hay ngi Salomoŋ mindira na, a pura keɗ keɗ,

⁴ɗaf naŋ mazuma a mbuŋ, hay ngi gawla naŋhay, slra gawla ngi hay naŋhay magakaŋ, zana ngi ki ngi gawla naŋhay ati ngi mizli mavulakaŋ gwat ngi zum ati ngi siheye, keɗ keɗ mikuli mizlam zlamay naŋ maga taŋ ar hay ngi Bumbulvuŋ na, hã a gaŋ ngirkik.

⁵Maˀay tuwa, a ɓa buyo: «Ya macina, taŋ maɓaka ɓi ngi mingiɓi ɗik ati ɓi ngi sin ɗik mijileŋ ar hirwuy ɗu na, naŋ kaslsla gisiŋ!

⁶Dumbuŋ ti ya muso t'aruŋ, yo ya mupura ti hiri ɗu t'aruŋ zleˀe na, y'anta tiɓa ɓi nah zleˀe ta. Dambalaka taŋ miɓikiy di na, ko a ndila reta ngi sin ɗik mijileŋ haɗa vuna ta ma. Sin ɗik mijileŋ a funa misi ya micina,taŋ maɓaka ti mi vuna le.

⁷Gawla ɗikey ati mizli ngi hay ɗikey gar na, kayya, hana i jiŋ madiɗa avu taŋ. Taŋ misi ndrehhe a mbuŋ ɗik na, ara cinaka mingiɓi ɗik mavul sinmijileŋ haɗa na!

⁸Bumbulvuŋ Buymisemuŋ ɗik, mucufuw ar janga naŋ ngi buy, ɓa ki zum buy ngi gaŋ slra naŋ na, sise nga naŋ! Buymisemuŋ micifi ti ka buy ar Israyeley, ɓa ki zum buy ti jiviɗ mikaslsla, jeŋŋe na, asi ara wuɗ taŋ, ɓa a ndiram ko ti vunaka gar.»

⁹A dirba nah, maˀãy tuwa, a vula gwatay da Salomoŋ: ɓiri tapasl tapasl, gwat ngi ton makir ti reta, urdi haɗa teˀe, waɗ ɗugur mupuɗaw puɗaway. Zle ti hin nah na, urdi mihaɗa kaɓa ngi maˀãy ngi ruwuy Saba muvula da buy Salomoŋ na, a puram ɗaˀ mata.

¹⁰Gawla ngi buy Hiramay ati ngi Salomoŋhoy miram nga Ofir tuwa, a soko ti ɓiri tapasl tapasl le ati dum ngi santal waɗ ɗugur mupuɗaw puɗuway ma.

¹¹Dum ngi santal tayna tuwa, buy a gi taŋ ɓamtalay angi hay ngi Bumbulvuŋ, waɗ angi hay nga naŋ buyo, yo a ɗiyi di garayahay ati gujuvuroy da mizli mazlam dimisey. Ko a puram dum mihaɗa kanah ɗaˀ angi hirwuy Zuda ta.

¹²Buy Salomoŋ ya kwana, gwat maˀãy ngi ruwuy Saba hĩhĩy le ati naŋ mucufuɗ le ava gar na, a vulaŋ di, a funa gwat nga naŋ muso di da buy vuna le ma. A dirba nah, maˀãy tuwa, ati gawla naŋhaya, a mam nga hirwuy taŋ a muŋ.

¹³Angi vi purla na, Salomoŋ a pura ɓiri tapasl tapasl misakaŋ di jom gar na, ton kukur cuw,

¹⁴manja a slufaka misi maso ti vu mulakay, tivi migi tererehey. Buy ngi ruwuy Arapay gar ati buy miwi li ngi si ruwuyoyo, ara soko ti ɓiri tapasl tapasl ati ɓiri bara da Salomoŋ ma.

¹⁵Buy Salomoŋ a ɓa mizli, a vuɗam mbaray madiɗahay skat skat cuw ti ɓiri tapasl tapasla, mbaray tayna, ɓiri tapasl tapasl kilo durmuk ti skat skat cuw mitiki ngi vuɗ taŋ,

¹⁶waɗ a vuɗam mbaray memeɗehey skat skat makir ti ɓiri tapasl tapasl vuna ma, mbaray purla gar na, a zuɓ ɓiri tapasl tapasl kilo makir ngi vuɗ naŋ. Buy a ɓa mizli, a paka mbaray tayna ar hay mazilaka ‹Ɓuh ngi Libaŋ.›

¹⁷Yo ma na, Salomoŋ a ɓa mizli, a ɗiyakaŋ janga ngi buy, ti sliŋ ngi begene, janga madiɗaŋ, waɗ a kuroŋ ɓiri tapasl tapasl pal naŋ kor kor sirit.

¹⁸Janga ngi buy nah na, naŋ ti li jiɗ ava gaˀ gaˀ merkeɗe, li ɗuva sara, naŋ ti ɓiri tapasl tapasl, ngbaˀ avu buy naŋ vuna, gwat miligidaˀa ligidaˀa waɗ li haŋhay avu janga ti ka ti ka. Mobor miciɗa ti ciɗey cuw, deŋ tir vay gula waɗ deŋ tir vay hazum ngi janga ngi buyo,

¹⁹waɗ mobor mekelemey kuruˀ nga cuw ar li jiɗey tuwa, merkeɗ ti ka, merkeɗ ti ka. A gam gwat kanah ar zumabuy mekeleme ɗaˀ ta.

²⁰Sikiɗ ngi si gwat ngi buy Salomoŋhoy gar na, i miga taŋ ti ɓiri tapasl tapasl, yo gwatay misi ar hay mazilaka ‹Ɓuh ngi Libaŋ› na kwana, taŋ cek ti ɓiri tapasl tapasl mileɗeɗe, asi ar hin ngi Salomoŋ na, ɓiri bara, anta puraka kaɓa i gwat mupuɗaw ta.

²¹Asi buyo naŋ da ti palalam ngi yamay, a slina taŋ nga Tarsis ati gawla ngi buy Hiramay. Angi vi makir gar na, palalamay tuwa, a moko ti Tarsise ti gwatay mbaf mbaf ar taŋ: i ɓiri tapasl tapasl, ɓiri bara, slin ngi begenehey, virihey waɗ ɗiyuw tekuhoy.

²²Buy Salomoŋ, a tiri naŋ ti zlili haɗi waɗ sinmijileŋ haɗi fineˀ buy mekelem ngisi ruwuyoyo gar.

²³Buy ngisi ruwuyoy gar, a soko ng'avi Salomoŋ, ngi cine mingiɓi ngi sinmijileŋ Buymisemuŋ muvulaŋ di a mevele na.

²⁴Vur vi gar na, mizli ara sakaŋ ti gwat ngi vul taŋhay a haŋ: i gwat muvuɗa ti ɓiri barahay, ti ɓiri tapasl tapasl, zanahay, gwat ngi vurumoy, urdihey, pilisey, zungu-pilisey.

²⁵Salomoŋ naŋ da ti hay mapi pilisey waɗ mota ngi vurumoy durmuk mufaɗa, naŋ ti pilisey durmuk kuruˀ nga cuw. A pa mekelemeye ar li naŋ mawi taŋ vu ar walahay madiɗahay, waɗ numuŋhoyo a ciki naŋ a Zeruzalem, gweˀ avu hay nga naŋ buyo.

²⁶Salomoŋ a wa buyoyo le cek, zle a mizaw Efrat hã sesẽŋ a ruwuy Filisti, hã a gam maakway ati Ezipte.

²⁷Buy Salomoŋ a ga hã a Zeruzaleme, ɓiri bara a gi haɗa kaɓa ɗugur, yo dum ngi mitere kwana, a gi haɗa kaɓa bazlawar angi hirwuy ngi ciki mubuliy Mediterane.

²⁸A soko ti pilis ngi Salomoŋhoyo ti Ezipte waɗ ti ruwuy mekelemey haɗi.

²⁹Is ngi slra ngi Salomoŋ miga, zle avu zli virzi naŋ hã avu kiɗa mi naŋ na, a tohoko le angi ɗerewol ngi slra ngi mijiviɗ Nataŋ, angi ɓi minjika ngi mijiviɗ Ahiya a Silo, waɗ ar gwat Buymisemuŋ mibiga da mijiviɗ Yedo mupura vur ɓi ngi Zeroboˀam, mangal ngi Nebat.

³⁰Salomoŋ a zum buy ar Israyeleye gar vi kukur mufaɗ a Zeruzaleme.

³¹Salomoŋ mumuc na, a dikakaŋ ar walahay ngi cine naŋ Davit. Dar mangal naŋ Roboˀam a zuɓa li naŋ.