Read South Giziga EZR 3 Bible Online

EZR 3 - South Giziga bible

EZR 3

¹Israyeley a cifam le ar walahay taŋhaya. Kiya mitarnaˀ naŋ ngi vi mindilo na, a kusom ti mevel purla a Zeruzaleme.

²Yesuwa masay, mangal ngi Yosadak ati sukum naŋ masayaya, waɗ Zorobabel, mangal ngi Seyaltiyel ati sukum naŋhaya, a zlaka ndira li gi mikuli da Buymisemuŋ ngi Israyele, ɓa a gam mikuli mizlam zlam anga, kaɓa mutohoko ɓi naŋ angi ɓimujuwa ngi Moyis, mbur ngi Buymisemuŋ.

³Ko ti taŋ mazluwunam ti mizli mekelemey mipam asi ruwuyo tekeɗe kwana, a ɗiyaka li gi mikuli cummo ar virzi naŋ misi zleˀe vuna si, a gaka mikuli mizlam zlam da Bumbulvuŋ, i mikuli mizlam zlam magaka ti miprik waɗ ti pastaˀa.

⁴Yo Israyeley a gam muguzlum ngi Guɗuk, kaɓa mutohoko ɓi naŋ. A ra gam mikuli mizlam zlama vur hin gar, kaɓa sirik taŋ muɗuva gi naŋ angi hiipasa.

⁵A dirba nah, a gam mikuli mindrehhe, mikuli mizlam zlamay ngi kiya muslo le, waɗ ngi hin ngi muguzlumoy mihĩˀĩ ngi Bumbulvuŋ ati ngi mizli gar mavulam gwat ngi mongoy taŋ da Bumbulvuŋ.

⁶Zle ti hin mudumbuŋ ngi kiya mitarnaˀ naŋ si na, a zlaka gi mikuli mizlam zlam da Bumbulvuŋ. Naɓa a ɗuvaka virzi ngi hay ngi Bumbulvuŋ vuna t'aruŋ ngbaŋ.

⁷Waɗ ma na, a wurkaka miciɗa ɗuguroy waɗ mujuwa marjahaya, yo a vulaka gwat ngi zum, gwat ngi si waɗ mal da mizli Sidoŋhoy ati mizli Tirey, ɓa taŋ kwana, a slinoko taŋ dum ngi widis miter ngi Libaŋ tir mubuliy, hã sesẽŋ a Zafa. A gaka kanah, asi Sirus, buy ngi Perse, a vula taŋ jiviɗ nah le.

⁸Ar kiya mucuw naŋ, ngi vi mucuw naŋ, taŋ mindilam angi li ngi hay ngi Buymisemuŋ a Zeruzaleme na, Zorobabel, mangal ngi Seyaltiyel, Yesuwa, mangal ngi Yosadak, waɗ is ngi sukum taŋ masayaya, levihey ati mizli gar mumoko nga Zeruzalem tir hirwuy mijaka taŋ nga diga na, a zlaka a cam levihey misi vi kukur cuw malla mufuna le, ɓa a jiginaka slra ngi ndira hay ngi Bumbulvuŋ.

⁹Yesuwa ati ziri naŋhay waɗ sukum naŋhay, Katmiyel ati ziri naŋhay, misi i muy ngi Hadaviyahaya, taŋ jom gar taŋ, a cicam gak gak ngi jigina mbur gar magi slra ngi hay Buymisemuŋ. Muy ngi Henadatay ati ziri taŋhay waɗ levi, sukum taŋhaya, ɓi taŋ ɗaˀ le ta.

¹⁰Ti mindira hayay maɗuvaka virzi ngi hay ngi Bumbulvuŋ na, naɓa ara kirohoko masayaya, ɓaˀ ɓaˀ zana ngi mezegwel avu vu, yo za raˀahaya, waɗ levi, dideˀ ngi A safaya, ti jãwjãway, ɓa a hunumaka Bumbulvuŋ, kaɓa Davit, buy Israyel mujuwa ɓi nah.

¹¹Taŋ mahunumaka Bumbulvuŋ, yo taŋ magakaŋ sise na, a tiɓaka dimis ani: «Buymisemuŋ naŋ mezle, asi gi teŋteŋ naŋ vur Israyele, a ndir ngi caˀa.» Mizli gar ara jam salalay ti hunuma Bumbulvuŋ, asi ara ɗuvaka virzi ngi hay nga naŋ Bumbulvuŋ.

¹²Mizli haɗi a wuzla masayay, levihey, buy ngi hay ngi wuzla mizli misi vi haɗa haɗahaya, mupuraka hay ngi Bumbulvuŋ misi zleˀe ti hiri taŋ na, a tuwam ti gidaŋ, naɓa ara ɗuvaka virzi ngi hay nawaya ngi Buymisemuŋ. Amma mizli haɗa ara jam salalay aya.

¹³Mbak ko ˀay ngi salalay ati ngi tuwuyo, anta sli wala mata, asi mizli majam salalay cõh cõh macin kileŋ tuwa.