Read South Giziga EZR 5 Bible Online

EZR 5 - South Giziga bible

EZR 5

¹Naŋ kine, ti di numuŋ ada na, mijiviɗ Aze ati mijiviɗ Zakari, mangal ngi Ido, a njikam ɓi ngi gwat masa gam tumbuŋ avu Yudehey misi asi ruwuy Zuda waɗ a Zeruzaleme, a ɓaka taŋ ti slimiɗ ngi Buymisemuŋ ngi Israyel, taŋ mahuruk hurukam a mbuŋ naŋ na.

²Akẽh na, Zorobabel mangal ngi Seyaltiyel waɗ Yesuwa mangal ngi Yosadaka, a slikiɗam, dar a zlaka ndira hay ngi Buymisemuŋ a Zeruzaleme, yo mijiviɗ ngi Bumbulvuŋhoy ada, dar a jinaka taŋ.

³Hirak ti hin nah vuna si na, Tatenay buy miwi li ngi si pas ngi pastaˀ ngi Efrat waɗ Setar-Bozinay ati cil taŋhaya, a soko lumaka taŋ a cufuɗaka taŋ: «Muvulukum jiviɗ ngi ndira hay hana waɗ ngi slikiɗa moholo hiri naŋ a muŋ i waka?

⁴A cufuɗaka taŋ ava ma: Vulam ndra slimiɗ ngi mizli mandiraka hay hana vuna.»

⁵Amma Buymisemuŋ a ro hiri taˀ avu mizli micawwa ngi Yudeheye, mizli tuwa, a cicaka taŋ slra ta, hã ara slufaka ɓi nah da buy Dariyuso, a mo taŋ mingiɓi naŋ toh toh ar ɗerewol.

⁶Misi ani na i hiri ngi ɗerewol mislinaka da buy Dariyus, baɗ tivi Tatenay, buy miwi li vay si pas ngi Pastaˀ ngi mizaw Efrat, yo tivi Setar-Bozinay ati cil naŋhay, waɗ tivi mizli Afarsakay mipam tisi pas ngi Pastaˀa.

⁷Ɗerewol taŋ mutohokoŋ di ani: «Mingiɓi da ka buy Dariyus, anja ki ndir zuy zuy!

⁸Buy kumani, anja ki si na ɓi ani sin le, i ram le ar hirwuy Zuda, ar hay ngi Buymisemuŋ madiɗa. I lumaka na, ara maka hiri ngi ndir naŋ ti ɗugur miciɗa ti ciɗey, yo ɓamtalay gizl gizl ar dalama. A ra gaka slra nah ti jiviɗ naŋ, yo ara wusam di vu kutum ma.

⁹Dar i cufuɗaka mizli micawwahay tayna: ‹Mupulukum jiviɗ ngi ndira hay hana ati moholoyo hiri nah a muŋ i waka?›

¹⁰Yo ma na, i cufuɗaka slimiɗ taŋhaya le, i tohoko slimiɗ ngi mizli madiɗa ngi mbuŋ taŋhaya toh toh, ɓa ki si na taŋ.

¹¹Na a zilam ndra mi ani: ‹Ndr'i gawla ngi Buymisemuŋ miga muŋ ati hirwuy, i ra maka hiri ngi ndira hay hana, buy madiɗa ngi Israyel mindira zleˀe tay mi naŋ, a gi le ani vi mbeˀ mbeˀe.

¹²Amma dideˀ ndrahay a slikiɗaka mevel da Buymuŋ, a pula taŋ mbak da Nabukodonozor, buy ngi Babiloŋ. Nabukodonozor a waha hay nah vuna, dar a ja mizli nga Babiloŋ.

¹³Amma, ar vi mudumbuŋ ngi Sirus mazum buy a Babiloŋ na, a pula jiviɗ ngi ndira hay ngi Buymisemuŋ hana hiri naŋ a muŋ.

¹⁴Yo ma na, gwat ngi ɓiri tapasl tapasl ati ngi ɓiri gazahay ada zleˀe ar hay ngi Buymisemuŋ a Zeruzaleme. Nabukodonozor a hila taŋ, ara pa taŋ ar hay ngi kuli a Babiloŋ. Dar buy Sirus a hila taŋ tir hay ngi kuli tuwa, a vula taŋ da mbur mazilaka Sesebasar, naŋ mucufaŋ i buy miwi li a Zuda.

¹⁵A ɓaŋ na: Hila gwat hanayna, ara pa taŋ ar hay ngi Bumbulvuŋ a Zeruzalem, yo anja ɓa a ndiraka hay nah hiri naŋ a muŋ, kaˀ ar li naŋ misi zleˀe.

¹⁶Sesebasar a so nga Zeruzalem aka so, a ɗuva virzi ngi hay ngi Buymisemuŋ. Zle ti nana, hã wurenna, ara ndiraka haya, amma a kiɗ mi t'aruŋ.›

¹⁷Wurenna so na, da ki ngum le na buy, anja a wunjulaka ɗerewol ngi buyoy a Babiloŋ, ɓa ngi sina, zliv buy Sirus vuna a pula jiviɗe le zleˀe gisiŋ ngi ndira hay ngi Buymisemuŋ a Zeruzaleme kwana. A dirba nah, ɓa a slinoko ndra ɓi ngi buy mujuwa a mevele.»