Read South Giziga EZR 6 Bible Online

EZR 6 - South Giziga bible

EZR 6

¹Akẽh na, buy Dariyus a pula jiviɗ da mizli, a wunjulaka ɗerewol muwam taŋ vu ar hay ngi wi vu ti gwat mupuɗaway a Babiloŋ.

²Yo li ada a Ekbataŋ, i li muguno ti mohol, angi hirwuy ngi buy miwi li asi ruwuy Medi na, a lumam ɗerewol ngi garak mufuɗa faɗ faɗ a diga, a tohoko ara na: «Ɗerewol miwi di vu.

³Ar vi mudumbuŋ ngi Sirus mazum buy na, a vula ɓi ani: Hay ngi Bumbulvuŋ a Zeruzalem. Anja a ndiraka haya ar li magam mikuli, yo ar li misi virzi naŋ muɗuva zleˀe na: gil naŋ nga muŋ, metir kukur makir, sliprik naŋ, metir kukur makir.

⁴A sa ndiraka gunno gunno makaw makir ti ɗugur miciɗa ti ciɗ, waɗ gunno makaw purla ti dum ɓamtal nawayaŋ. Masa wurka slra nah gar i zlili ngir hay ngi buy.

⁵Yo ma na, gwat ngi ɓiri tapasl tapasl ati ngi ɓiri bara ngir hay ngi Buymisemuŋ a Zeruzalem, Nabukodonozor mihila taŋ zleˀe nga Babiloŋ na, a sa moko taŋ tiɗeˀe ng'ar li taŋ a muŋ ar hay ngi Bumbulvuŋ a Zeruzaleme.»

⁶Wurenna, Dariyus a toho ɗerewol ani da Tatenay, buy miwi li vay ngi si pas ngi pastaˀ ngi Efrat, yo da Setar-Bozinay ati cil taŋhay misi a diga, a ɓa taŋ: «kumo, ki kam slimiɗ ar ɓi nah mata.

⁷Pulaka Yudeheye mbak a ndiraka hay ngi Buymisemuŋ, buy Yude miwi li ati mizli micawwa ngi Yudeheye, a sa ndiraka hayakaˀ ar li naŋ a muŋ.

⁸Kum ati mizli micawwa ngi Yudeheye, i ɓukum le ɗaˀ ɗaˀ ani vur ndira hay ngi Buymisemuŋ: zlili ngi buy, mizli vay si pas ngi pastaˀahay masa wurkoko buutu taŋ na, dala ngi vul da mizli ngi gi slra nah gar na, a sa hilam daˀ ara vuna si, ɓa slra a gi kasl kasl, manja zluɓ, mangal ngi Amitayazluɓ.

⁹Migi mikuli ngi Zeruzalemeye, gwat taŋ muroko ti may naŋ gar na, kisa vulaka taŋ di vur hin gar kaɓa taŋ muwuɗam, ko mbak le ta: ngarihey, zlengerekey, ziri tumuŋhoy ngi gi mikuli mizlam zlam da Buy ngi muŋ, yo alkamari, mandaŋ, mbaazla waɗ mal,

¹⁰ɓa a gam di mikuli ngi tisla mevel da Buy muŋ, yo ɓa a diram dibiɗ vur siifa ngi buy ati ngi ziri naŋhaya.

¹¹Ko wa gar mingila ɓi hana le na, y'ani i ɓi ɗaˀ le vurˀe: a muɗam mbal purla avu hay naŋ, a ng'aka kaˀ a ruwuy, a cufakaŋ a raŋ, ɓa a ci nga mozoroɓ, hã a bo ti balam, yo hay naŋ kwana, a gam di kitikil.

¹²Buy wanaka gar malla mizli wanahayka gar mingilaka ɓi hana le, yo muzuɓaka haŋ le ngi hirya hay ngi Buymisemuŋ hana a Zeruzaleme na, anja Buymisemuŋ mandir a diga na, a hizigiɗaŋ. I ya Dariyus miɓa ɓi hana ɗaˀ le, anja a gi kahana vuna si.»

¹³Akẽh na, Tatenay buy miwi li vay si pas ngi pastaˀ ngi Efrata, Setar-Bozinay waɗ cil taŋhaya, a sipaka mingiɓi ngi buy Dariyus mubo taŋ di na, kaslsla kanah.

¹⁴Mizli micawwa ngi Yudehey ara ram nga mbuŋ ti slra ngi ndira hayakasl kasl, kaɓa mijiviɗ Aze ati mijiviɗ Zakari, mangal ngi Ido minjikaka zleˀe tuwa. A kiɗaka mi ngi haya, kaɓa Buymisemuŋ ngi Israyel miɓa ɗaˀ le, yo kaɓa Sirus ati Dariyus waɗ Artakzerses, buy Persehey miɓaka ɗaˀ le na ma.

¹⁵A kiɗaka mi ngi ndira haya, ar hin mimakir naŋ ngi kiya Adar , angi vi mimerkeɗ naŋ ngi Dariyus mazum buy.

¹⁶Israyeley, masayay, levihey, waɗ is ngi mizli mijahay nga ruwuy mulak mumoko na, a gaka muguzlum ngi vula haya da Buymisemuŋ ti mumul.

¹⁷Taŋ muvulam ngi gi mikuli ngi muguzlum ngi vula hay nah da Buymisemuŋ na, i gusoŋ skat, zlengerek skat skat cuw, ziri tumuŋhoy skat skat mufaɗa, yo vur mungra ngi Israyel gar na, bazuway kuruˀ nga cuw, tiɗeˀe a hirnga sukwi Israyel gar.

¹⁸A cufaka masayaya kaslslaka hunum taŋ, yo leviheye ti ngay taŋ ya, vur slra ngi Buymisemuŋ, taŋ magaka a Zeruzaleme, kaɓa miɓaka ɗaˀ le ar ɗerewol ngi Moyise.

¹⁹Mizli mijahay mumoko ti ruwuy mulaka, a gaka muguzlum ngi Paka [1] ar hin mukuruˀ nga mufaɗ ngi kiya mudumbuŋ naŋ ngi vi.

²⁰Masayay ati leviheye, taŋ jom gar taŋ, a bunaka dili taŋhaya le, taŋ gar taŋ manja dili. I taŋ maslaka ˀay ngi ziri tumuŋ ngi Pakaya, vur mizli mijahay zleˀe nga ruwuy mulak mumoko gar, vur sukum taŋ masayay, waɗ vur hirnga taŋ vuna.

²¹Naŋ kine, Israyel mijahay zleˀe mumoko ti ruwuy mulaka, a zumaka ɗaf ngi Paka jom ati mizli ngi ciki taŋhay gar micifam baˀ pal avu dili ngi mizli duniyahay, ɓa a sipam Bumbulvuŋ, Buymisemuŋ ngi Israyel na.

²²A gam hin tarnaˀ ti mumul ar li gi muguzlum ngi ɗaf manja ˀis ara. Asi mike na, Bumbulvuŋ a naha taŋ mevele le ti mumul, ti naŋ mimbiɗa mevel ngi buy Asiri, ɓa a pura taŋ ti hiri mezle, yo ɓa a vula taŋ gidaŋ ngi ndira hay ngi Buymisemuŋ, Buymisemuŋ ngi Israyel.