Read South Giziga NEH 13 Bible Online

NEH 13 - South Giziga bible

NEH 13

¹Ti di nah, ara slufaka ɗerewol ngi Moyis a mbuŋ mizli gar, a tohoko anga na, Amoŋhoy ati Moˀapaya, t'anta cam ar jum ngi mizli ngi Buymisemuŋhoyo ta ndiɗaˀ.

²Asi zleˀe ada na, Amoŋhoy ati Moˀapay a soko jam hirnga ti Israyeleye ti gwat ngi zum ati yam ngi si ta. Amma Moˀapaya jak ma na, a wurkaka Balaˀama, ɓa anja a nisa Israyeleye. Amma Buymisemuŋ ndra a mbiɗa nise, a tiri di ɗuwula mi jaka.

³Israyeley tuwa, taŋ micinaka muslufaka Ɓimujuwa ngi Bumbulvuŋ nah na, a bam ti mizli Israyele migisiŋ gisiŋ tahaya gar avra.

⁴Dumbuŋ zleˀe na, a vulaka slra ngir viŋ ngi hay ngi Buymisemuŋ ndra le da Eliyasipe. Eliyasip i muy migweˀ ngi Tobiya.

⁵Naŋ misi i muy naŋ migweˀ tuwa na, a ɗiyaŋ viŋ madiɗa, ar li mapam gwat ngi migamay ngi gi mikuli, mukuturɓuy, gazlangahay, mukuruˀ ngi alkamari, ngi mbaazla si ati mal, gwat mupula jiviɗ naŋ le ngi vul da Levihey, da mizli dimisey ati mijigina mizlingrehey, waɗ gwatay mawuɗam avu taŋ neˀneˀ ngi vul da masayay.

⁶Hirak ti gwat tayna gar mucohom na, y'anta zleˀe a Zeruzaleme ta. Asi mike na, angi vi mizli ngir makir nga cuw naŋ ngi zumabuy ngi Artakzerses, buy madiɗa ngi Babiloŋ na, yi mi le zleˀe ng'avu buyo. Amma a dirba nah hin neˀ na, yi cufuɗ jiviɗ avu buyo

⁷joˀ yi mi nga Zeruzalem a muŋ. Akẽh na, yi pura malambaˀ Eliyasip miga zleˀe ti naŋ miɗiya viŋ da Tobiya a wazlaray hay ngi Buymisemuŋ na le.

⁸Ɓi nah a jiy mevel haɗa teˀe. Gwat ngi Tobiyahay misi a viŋ gar na, yi zliɗo taŋ ng'avra.

⁹A dirba nah, yi ɓa mizli ɓa gam mezegwel ngi zuɓa hiryi ngi viŋ avra. Dar yi ɓi ɓa mizli a moko ti gazlangahay, gwat ngi mikulihey, mukuturɓuyoyo ng'araˀa a muŋ.

¹⁰Yo a ɓikiy ma na, gwat ngi vul da Levihey na, i manja vul, yo Levihey ati mizli dimisey vuna a kilam le, mbur gar nga ruwuy naŋ nga ruwuy naŋ.

¹¹Yi mbiɗa hirnga da buyoyo dar yi ɓa taŋ: «Ki pulaka hay ngi Buymisemuŋ njoŋ kahana vur mike?» A dirba nah, yi cikilo Levihey ati mizli dimiseye, yi cufa taŋ ar li taŋhay a muŋ.

¹²Akẽh na, Yudehey gar, a zlaka a soko ti mukuruˀ ngi alkamari taŋhay, mbaazla si ati malay ng'ar li cikila gwatay tuwa.

¹³Viŋ macikilaka gwatay ara na, i pula zayɓi nah asi haŋ ngi ti:, masay, Selemeya, Sadok, mbur misina toho gwat, waɗ Pedaya, mbur levi. Mizli mijini taŋhay kwana i ti: Hanaŋ, mangal ngi Zakur, dideˀ ngi Mataniya. Asi mizli a puraka taŋ i mizli miteŋteŋhey. Masa wuɗkaka gwat tayna gar da sukum taŋhay, i taŋ vuna.

¹⁴«Aw Buymisemuŋ ɗu, wuluk keŋ ar ya, asi gwat ya miga hana. Teŋ teŋ ɗu ya miga vur hay ngi ɗik Buymisemuŋ ɗu, ati huruk huruk ɗu a mbuŋ ɗik gar na, ki puyuko hirnga naŋ ta.»

¹⁵Angi hin tayna na, gwat mizli magaka a hirwuy Zuda, yi pura na, tapas sabat, mizli ara ɗucom yi ngi gudubun ti sar ar gwat ngi ɗuc naŋ, ara jijiroko maslapa ngi alkamari ngi hay, ara jijiroko mbaazla ti zunguhoy, yi ngi gudubun ati yi ngi uruf waɗ sukwi ngi gwat mekelemey wal wal gar, ɓa a soko taŋ nga Zeruzalem tapas Sabata si. Tapas taŋ mira hiɗikaka gwat taŋhay avra na, yi ɓa taŋ ɓi ngi ka taŋ mumuyuŋ zay sla a slimiɗe.

¹⁶Tapas sabat na, mizli Tirey misi ar walahayaya, a soko ti kilif ati sukwi ngi gwat ngi tererehey wal wal gar nga Zeruzaleme, ɓa Yudehey a hiɗikaka taŋ.

¹⁷Joˀ yi mbiɗa hirnga da mizli madiɗa ngi Zudahaya, i ɓa taŋ na: «Ki gam hana i malambaˀ mi ngi hirya hin ngi sabat na maska?

¹⁸Dideˀ kumoy migam zleˀe na, kahana vuna takwa? Dar Buymisemuŋ ndra a pulo bonoy ar ndra waɗ ar walahay hana na vurˀe takwa? Ani kumo, kum mahiryaka hin ngi sabat na, ki ra slikiɗaka mevel ngi Buymisemuŋ ti gidaŋ ng'ar Israyeleye so.»

¹⁹Vurˀe, da hin ngi sabat mizli t'aruŋ, hirak ti li maji kutupuˀo aruŋ si na, yi ɓi ɓa a gicaka mizlingreheye giceˀ giceˀ le dafa, yo sabat mizli le kwana, yi ɓi ɓa a wunaka mizlingreheye t'aruŋ gu ma. Yi pi mizli a wuzla gawla ɗuwoyo sek ngi jigina mizlingreheye, ɓa ko mbur a co ti gwat ng'ar walahaya tapas sabata ta.

²⁰Migi tererehey ati mizli masoko ti gwat ngi hiɗikey ti sukwi wal wal gar na, a hinam a duba gala ngi Zeruzalem, gwat ngi hin purla malla cuw.

²¹Yi ɓa taŋ ɗaˀ ɗaˀ le: «Kum mahinam a duba mohol na vur mikpak ka? Da ki moko le tumbuŋ ma na, yi sa jukum muduba. Cinaka cin cin le so tuwa.» Vurˀe, zle ti di nah na, ti hin ngi sabata, ko t'anta soko mata.

²²A dirba nah na, yi ɓa Leviheye, anja a gam mezegwel ngi zuɓa hiryi geˀ le, ɓa a sa ram nga jigina mizlingreheye, ɓa hin ngi sabat a sa ndir i hin mipal. Aw Buymisemuŋ ɗu, wulka ɓi ɗu keŋ, asi slra hana takwa! Puriy ircece asi ka teŋteŋ haɗa.

²³Yudehey muzuɓam ngwasaya, i ziri Asdotoy ati Amoŋhoy waɗ Moˀapay zleˀe na, yi pura taŋ kwana, ti di nah vuna.

²⁴Reta ngi ziri taŋhaya, a ɓam di i mi Asdot tewle, ko mbur purla a wuzla taŋ maɓi gu ti mi Yude anta. Yo mekelemey kwana, a ɓam di i mi ngi mulakay tew si.

²⁵Dar yi zla i mbiɗa taŋ hirnga, i nisa taŋ. Mizli mekelemey a wuzla taŋ, yi kiɗa taŋ ti kiɗ, yo numuŋhoyo kwana, i muɗa taŋ ngwic hirnga dunom dunom. Joˀ yi hudumo taŋ ti slimiɗ ngi Buymisemuŋ. Anja a vulaka ziri mongoso taŋhaya ngi ngwas da ziri mizile taŋhaya ta. Yo taŋ vuna kwana, anja a zuɓam ziri mongoso taŋhay ngi ngwas da ziri taŋhay malla ko da taŋ vuna ta ya.

²⁶«Salomoŋ, buy Israyel migi mungra na, asi ɓi misi kahana vuna takwa? A wuzla sukwi miwal wal haɗa ar duniya gar na, ko buy misi kaɓa naŋ na, anta. Buymisemuŋ naŋ ara wuɗaŋ haɗa teˀe. Buymisemuŋ a cifaŋ i buy ngi Israyeley gar. Gar ti nah kwana, mipakaŋ haŋ ɓa a gi mungra na, i ngwas mulakay vuna.

²⁷Ani so na, ki wuɗam ɓa i cinam na, ki gam mungra madiɗa le, kum anta teŋteŋ avu Buymisemuŋ ndra ta, asi ki zuɓam ngi ngwasa, i ziri mulakay sukwa?»

²⁸Mangal ada pal asi ziri ngi Yoyadahaya, i dideˀ ngi Eliyasip, masay madiɗa, yo i jomo ngi Sanebalat, mbur Hori. Yi ɓula ɓak kileŋ avu Zeruzaleme.

²⁹Buymisemuŋ ɗu, ko ki puyuk hirnga ta, asi slra ngi mikuli, yo jumoˀay ɗik ati masay waɗ Leviheye na, a hiryaka taŋ le.

³⁰Gwat mulak misi avu mizli cek na, yi zuɓa taŋ di le avra. Yi mahiri ngi cifa masayay ati leviheye ar li taŋ a muŋ, mbur gar na, ar slra nga naŋ nga naŋ.

³¹Dum mavulaka ngi mikuli ar hin naŋ mislaka le, yo gwat micikiɗeffe ngi migamay gar na, yi cica ɓi nah le a muŋ. «Aw Buymisemuŋ ɗu, wuluk keŋ ar ya, asi mezle ɗik na.»