Read South Giziga NEH 4 Bible Online

NEH 4 - South Giziga bible

NEH 4

¹Naŋ kanah, Sanebalat, Tobiya, mizli Arapay, Amoŋhoy ati Asdotoy micinaka, i ra maka hiri ngi ndira mohol ngi walahay Zeruzaleme, slra nah ara ru nga mbuŋ nga mbuŋ, yo i ra dislaka li munjoŋ njoŋhoy tuwa na, a slikiɗam himaˀ haɗa teˀe.

²Taŋ gar taŋ, a ngiɓam ˀay purla, ɓa a soko zlam kiɗa vu ati walahay Zeruzaleme, ɓa a hiryakaŋ.

³Akẽh na, i tumbuloko Buymisemuŋ ndra. Duvuɗ ti papas gar na, i pam mijigina lihey sek vur taŋ.

⁴Amma mizli Yudehey a ɓam na: «Ndra migi slraˀahaya, gidaŋ ndra ara tiki, asi lagwada haɗa teˀe. Na, ndr' anta sa kiɗaka mi ngi ndira mohol vuna gu ta.»

⁵Mizli mazliram ti ndra ta kwana, a ɓam na: «A sa ndiloko sesẽŋ a wuzla ndra, manja i puraka taŋ, manja i sinaka taŋ ma. Dar a sa kiɗam ndra vagay vagay, yo a sa cicaka slra ndra magaka na ma kini.»

⁶Yudehey misi a ciki taŋhaya, a soko ɓam ndra ɓi taŋ le, hã gwat ngi sar kuruˀu, ɓi ngi mesene ndrahay mawuɗam gam ndra malambaˀa.

⁷Akẽh na, yi lum li mikutik a ruwuy ti duba moholo, waɗ i hil mizli vur muy vur muy, i pa taŋ sek anga. Taŋ ti maslalam taŋhay ati ziwit taŋhay waɗ lek taŋhaya.

⁸A dirba ya muɗumburo li ɗumbur ɗumbur na, joˀ yi ɓa mizli madiɗa ngi buyoy ati migi kiitahay waɗ mizli mekelemey gara: «Anja ki zluwunam ti taŋ ta. Wulkam keŋ ayɗi! Buymisemuŋ i madiɗa, yo a gi zluwun da mbur. Kum cikam vu vur sukum kumoy, ziri kum mizilehey ati mongosohoyo yo vur ngwas kumoy waɗ vur hay kumoyo.»

⁹Mesene ndrahay a cinaka na, ɓi taŋ majuwaka na, mizli a fam ndra ɓi nah le, yo gwat taŋ mawuɗam gi naŋ na, Buymisemuŋ a hirya taŋ di le. Yo ndra gar ndr'i mam le ng'ar ndira hiri ngi moholo a muŋ, mbur gar na ti slra naŋ ti slra naŋ.

¹⁰Amma zle ti di nah na, i reta ngi gawla ɗuwoy magam slra, yo reta mekelemey kwana, taŋ ti ziwit taŋhay, mbaray ati lek taŋhaya avu haŋ avu haŋ, yo libitihey ɓaˀ ɓaˀ avu vu. Buyoyo taŋ deŋ deŋ a hirnga mizli Zudahaya zlar gar.

¹¹Mizli mindira moholoy ati mizli majijiroko gwataya, a gam slra ti haŋ purla, yo haŋ purla vay mekeleme kwanakaw ti gwat ngi vurum.

¹²Mizli mindira moholoyo mbur gar na, a gi slra ti maslalam naŋ law a ciki. Mbur mifi tulumo naŋ deŋ a ciki ɗu.

¹³Mizli madiɗa ngi buyoy ati migi kiitahay waɗ mizli mindiram mekelemey gar na, yi ɓa taŋ: «Slra naŋ haɗa avu ndra, yo li kwana naŋ ndah ndah haɗa avu ndra ma. Ani i zliɗam hirnga le kileŋ kileŋ a wuzla ndra a ciki moholo.

¹⁴Da kum misa cinam fi tulumo le ar li wanaka gar na, kusoko ng'avi ndra. Naɓa Buymisemuŋ ndra a sa kiɗ vu asi ndra na si.»

¹⁵I gaka slra ndraka misenna, zle ti li mira gi biŋ biŋ, hã duvuɗ a ji, wurzlaŋhay njõh na, reta ngi mizli ngi wuzla ndra, a roko ti ziwit taŋhaya avu haŋ avu haŋ.

¹⁶Ti di nah na, yi ɓa mizli ani: «Mbur gar ati gawla naŋ, anja a hinam a Zeruzalem. Ti duvuɗo, pukum mijigina lihey sek le, yo ti papas kwana, ndra gar ndr'i gam slra.»

¹⁷Ko mbur macuk zana cok le anta ta ndiɗaˀ wãˀ. Mbur gar na, naŋ da ti gwat ngi vurum naŋ kaw tir haŋ hazum, ya vuna, sukum ɗuwoy ati gawla ɗuwoy, waɗ mizli mijigina lihey misek asi yahay na gar.