Read South Giziga NEH 5 Bible Online

NEH 5 - South Giziga bible

NEH 5

¹Ti di nah na, ziley ati ngwas taŋhaya, a zlaka tuwuy ti sukum taŋ Yude mekelemeye.

²Mekelemey a ɓam na: «Ani ndra vuna ati ziri ndra mizilehey waɗ mongosohoyo i gam le ndra haɗa. Anja i wuɗam alkamari, ɓa i zumam, i ngiram.»

³Mizli mekelemey a ɓam ma na: «Guva ndrahay ati gudubun ndrahay waɗ hay ndraˀahaya, zuwen i jikaka taŋ ɓa i lumam alkamari ngi sa zum ti hin ngi may.»

⁴Mekelemey a ɓam ma na: «I jikaka guva ndrahay ati gudubun ndraˀahaya, ɓa ngi wuɗa dala ngi wurka buutu da buy.

⁵Na, ndr'i dumvu purla ati sukum ndrahay vuna ngbaŋ gawlay, yo ziri ndra mizilehey kwana, taŋ purla ati nga taŋhay vuna ya ngbaŋ takwa! Amma ani na, a gi le i tikaˀay avu ndra ngi vula ziri ndra mizilehey ati mongosohoyo ng'ar beke so. Na zle, mekelemey a wuzla ziri ndra mongosohoy vuna a tiram bekehey le si takwa! Wurenna, i gam mi geˀ gu ka? Guva ndrahay ati gudubun ndraˀahaya, taŋ asi haŋ ngi mizli mekelemey si.»

⁶Ya Nehemi micina tuwuy taŋ ati mingiɓi taŋ kanah na, mevel a jiy haɗa teˀe.

⁷Yi juwa a mevel ɗu, ɓa i mbiɗa hirnga da mizli madiɗa ngi buyoy ati migi kiitahay vuna, dar yi ɓa taŋ na: «Ki vulam hana i jijir da mizli ar wala kum tehhe!» A dirba nah, i zila taŋ, dar i gam kus madiɗa.

⁸I ɓa taŋ: «Muy ndra Yude mekelemey, sukwi mekelemey ar duniya mihiɗikaka taŋ zleˀe na, i ndra vuna micikam vu ngi mbuɗo hirnga taŋ ma na, dar kumo, ki hiɗikaka taŋ mbri mbri maka? Yo i kum tehhe a muŋ mahiɗikaka taŋ ma!» Mizli a ndiram lek, ko a lumam mi pal ngi mbiɗa ta.

⁹Dar yi ɓa taŋ ava ma: «Gwat kum magaka na, i mezle ta. A zlir anja i gaka gwata ti zluwun ti Buymisemuŋ ndra a mevele, ɓa i tikaka mesene ndra, sukwi mekelemey mapam ndra mesem na takwa?

¹⁰Ya vuna hirnga ɗu, muy ɗuwoy ati gawla ɗuwoyo i vulaka taŋ dala ati alkamari vuna le ngi duvuso ta wal kwa? Vurˀe, ndr'anta sa cufuɗaka ɓa a wurkam ndra di vuna mata.

¹¹Dana dana vuna si na, guva taŋhay, gudubun taŋhay, tutumbur taŋhay ati hay taŋhaya, maka taŋ di a muŋ, yo dala, alkamari, mbaazla si ati mal taŋ mihilaka taŋ ngi hataka avu kum na, ki cufuɗaka taŋ mata.»

¹²Taŋ a mbiɗaka: «I sa gaka kaɓa ka miɓa ndra di vuna si, i sa maka taŋ ti gwat taŋhaya, ko ndr'anta sa cufuɗam gwat neˀ ta.» Akẽh na, yi zila masayaya, joˀ yi ɓa mizli, a hudumom, ɓa a gaka kaɓa taŋ miɓam na.

¹³A dirba nah na, yi ja mi ngi zana ɗu kaw, yi hira har har, i ɓa taŋ na: «Mbur macici ar mingiɓi hana ta na, Buymisemuŋ a sa hira har har avra kileŋ avu mizli ngi hay naŋhaya, yo kileŋ avu zlili naŋhaya! Naŋ kahana, a sa hiraka avra, a pulakaŋ ɗoɗok manja gwat neˀ le ava!» Zigiduw gar a zil mi: ‹Anja kine!› Dar a hunumaka Bumbulvuŋ. Ar nah na, mizli a gaka kaɓa taŋ miɓam tuwa so.

¹⁴Zle ti taŋ muvulikiy jiviɗ ɓa i cifi buy miwi li a hirwuy Zuda, zle angi vi mizli ngir cuw naŋ ngi zumabuy, hã a ndila vi mizli ngir makir ngaŋ cuw ngi zumabuy ngi Artakzerses na, a gi le vi kuruˀ nga cuw takwa! Ya ati muy ɗuwoyo ko i zumam gwat mawurkaka da ya, buy miwi li na ta.

¹⁵Buy miwi lihey dumbuŋ ar ya na, a guzuvuraka sukwi Yudeheye le. Mbak suloy kukur mufaɗ taŋ mawurkaka na le ma na, hin gar na, a cufuɗaka taŋ ɓa a vulaka taŋ gwat ngi zum ati gwat ngi si ma gar. Ko gawla taŋhay kwana, a zumam buy le ar sukwi Yudeheye. Amma ya, yi ga kaɓa taŋ na ta, asi yi ra zluwun ti Buymisemuŋ.

¹⁶Ya ti hirnga ɗu, yi vula vu ɗu ngi mahiri ngi ndira mohol misenna. Ko ndr'i hiɗikam guva hiɗak le avu mbur ta, yo gawla ɗuwoy kwana, t'ani kos kos gar taŋ ar slra aka.

¹⁷Yudehey ati buyoy, ndra mazumam ɗaf ar sikiɗ purla gar na, a gam gwat ngi mizli ziley skat ti kukur zlum, jom ti mizli ngir sukwi mekelemey mugun hirnga ndra masoko ng'avu ndra na.

¹⁸Gwat makiɗaka taŋ ngi di ar hin gar na ani: sla purla, tumuŋ mimezlehey merkeɗ, ɗuyuwoy, hanayna i gwat madikiy taŋ da ya. Yo vur hin kuruˀ migi le gar na, mbaazla fõyõk fõyõk haɗa. Ti nah gar na, mi nga ya buy miwi li gar na, yi cufuɗa cufaɗ le ta, asi slra a gi le fineˀ gidaŋ ngi mizli.

¹⁹Haˀaw Buymisemuŋ ɗu, mezle ɗu ya miga vur mizli Yude hanayna gar na, wulka ɓi nah keŋ takwa!