Read South Giziga Tob 1 Bible Online

Tob 1 - South Giziga bible

Tob 1

¹Hana i ɓi ngi Tobi mangal ngi Tobiyel, dideˀ ngi Ananiyel. Ananiyel vuna i mangal ngi Aduwel, dideˀ ngi Gabayel. Taŋ gar ar tizer ngi Aziyel, muy ngi Neftalihey.

²A ɗuvaka hay taŋ a ruwuy Neftali a Galile ngi muŋ, ar walahay Tisebe, ar wala ngi Kades tir vay muŋ ati Hasor tir vay pastaˀ waɗ Fogor tir vay ruwuy. A hilakataŋ ti diga nga Asiri, naɓa i Salmanasar mazum buy angi ruwuy nana.

³Ya Tobi, ar hin ngi siifa ɗu gar, i sipa jiviɗ ngi ɓi mikaslsla le, yo i gi gwat mezlehey le. Sukum ɗuwoy ati mizli ngir sukwi ɗuwoy musoko ati ya, ti taŋ muhuloko ndra nga Niniv, ruwuy ngi Asirihey na, yi vula taŋ dala le haɗa.

⁴Zle ti gawla ɗu, ti ya misi a ruwuy ɗu, ruwuy ngi Israyeley na, sukwi ngi Neftali gar, dideˀ ɗuwoy a gwaham tivi hay ngi buy Davitey waɗ ti vi Zeruzaleme. Walahay nana, Buymisemuŋ a wini di i nah pal naŋ a wuzla walahay ngi Israyeleye, ɓa sukwi ngi Israyel gar a soko nga gi mikuli ara. Hay ngi Bumbulvuŋ, li cifi naŋ, naŋ adiga. A ɗuwulakaŋ mi le ɓa a tiri pal vur dideˀ vur dideˀ.

⁵Sukum ɗuwoy gar ati hay ngi Neftali, dideˀ ɗu, a gaka mikuli nga taŋ a muwã Galilehey gar, da zuŋ sla, Zoroboˀam, buy Israyel minga a Daŋ.

⁶Ya so na, ɓa ngi ru nga Zeruzalem, ti hin ngi muguzlumoy, kaɓa mujuwaka ɓi nah ngi wãˀ vur Israyeley gar na, i ru pal ɗu is mbeˀmbeˀe. Gwat ngi sifi micikiɗeffehey, modogom ngi ginew ɗuwoy, mukuruˀ ngi ginew ɗuwoy ati ngwic ngi tumuŋ ɗuwoy, ya misla micikiɗeffe, i ra ru taŋ nga Zeruzaleme.

⁷I vula taŋ da masay, dideˀ ngi Aroŋhoy, ɓa ngi gi mikuli. Mukuruˀ ngi alkamari, ngi mbaazla, ngi tutumbur, ngi hunduruk, ngi urufu waɗ ngi yi ngi widis mekelemey gar, y’ada i so taŋ, i vula taŋ da ziri ngi Levihey magam slra a Zeruzalem. Vur vi gar na, mukuruˀ mucuw naŋ ngi gwat ɗuwoy ya mavula angi vi tarnaˀgar, vur vi vir vi is merkeɗe, i hiɗika avra, dar i sa ra tika dala naŋ a Zeruzalem.

⁸Waɗ ma na, mukuruˀ mimakir naŋ, i vula da mutuhuhoy, da wudigahay waɗ da mulakay macifam ati Israyeley. Vur vi makir gar na, i so taŋ, i vula taŋ di, dar i zumaka kaɓa mutohoko ɓi naŋ ar ɓimujuwa ngi Moyis, waɗ kaɓa Debora, mumuŋ ngi baha Ananiyel mudubuniy ɓi nah, asi baha a muc le, a piliy mutuhu.

⁹Ya mindila mbur sona, i zuɓ ngwas ar tizer ndra vuna. A yiy mangal mizile pal. I zila Tobiye.

¹⁰A dirba mijam ndra nga Asiri na, yi so cifi a Niniv. Adiga, sukum ɗuwoy ati muy ɗuwoy gar, a ra zumam ɗaf ngi mizli Yudehey ta.

¹¹Amma ya, yi ngum zuma ɗaf nah ta.

¹²Yo mana, i ra wuluk ar Buymisemuŋ ɗu, waɗ ar dum vu ɗu gar.

¹³Vurˀe, Mimadiɗa a ga ɓa i cira hiri da Salmanasara, yo gwat gar naŋ muwuɗ le na, i hiɗikaŋ di.

¹⁴Ŋha ar hin ngi muc ngi Salmanasar na, i ra ru nga hiɗikaŋ gwataya a Medi. Angi hirwuy nana, i vula suloy kilo skat skat makir ar gabal, da Gabayel, sukum ngi Gabri.

¹⁵Ti Salmanasar mumuc na, mangal naŋ Senakerip a zum buy ar li naŋ. Mizli a wam vu le ar jiviɗ ngi ru nga Mediheye, mbak yi ru ng’adiga gu mata.

¹⁶Ti hin ngi Salmanasar tuwa, y’ada i vula dala ŋhoyyo da muy ɗuwoyo.

¹⁷Y’ada i vula gwat ngi zum da mizli misi may maja taŋ, yo mizli mugulndiŋ kinehey na, y’ada i vula taŋ zana. Da i pur vagay ngi mbur ngi ruwuy ɗu, mihizigaka le ti duba moholo na, i dikaŋ.

¹⁸Mizli Senakerip mikiɗa taŋ gar na, i dika taŋ ma. Senakerip a za Buymisemuŋ, Buy madiɗa ngi muŋ le a ruwuy Zude. Ɓa ngi kutaŋ ti bonoy na, Buymisemuŋ a tikaŋ ˀay ɓa a cuh kutum tir hirwuy nana. Senakerip mumo nga Niniv na, a ji mevel, dar kiɗa ziri Israyeleye sunok sunok. Amma yi hulo vagay taŋhaya, i ra dika taŋ. Senakerip a ɓa mizli ɓa a supoko taŋ, amma ko anta lumaka taŋ ta.

¹⁹Mbur Niniv pal a ra ɓa buyo i ya madika taŋ, dar yi ɗum. Ti ya misina buy a sina ɓi ɗu le, yo a ra sipikiy ɓa a kiɗikiy vagay na, zluwun a giy, joˀ i kil.

²⁰A zumaka hay ɗu, gwat mindiriy neˀ anta, sey ngwas ɗu Ana ati mangal ɗu Tobiye.

²¹A ndila hin kukur mufaɗ vuna t’aruŋ si na, buyo ziri naŋhay mucuwoyo a kiɗakaŋ, joˀ a kilam nga muwã Ararat. Mangal naŋ Asarhadoŋ a zuɓa li naŋ. A pula ɓi ngi zlili ngisi ruwuyo gar asi haŋ Ahikar, mangal ngi sukum ɗu. Naŋ a tiri madiɗa miwa si ruwuyo gar.

²²Dar Ahikar a cufuɗaŋ vur ya, joˀ i mi nga Niniv amuŋ. Ti hin ngi Senakerip mazum buy vuna, Ahikar i madiɗa ngi muvula gwat ngi si da buy, i madiɗa ngisi ruwuy, yo i miji kaw ngi buy asi ruwuy Asiri. Asarhadoŋ a pulaŋ jiviɗ ngi gi slra naŋ amuŋ, waɗ mana, naŋ vuna i jamba ɗumeciɗeke, naŋ ar tizer ɗu.