Read South Giziga Tob 10 Bible Online

Tob 10 - South Giziga bible

Tob 10

¹Dambalaka vur hin gar na, Tobi a ra slufa hin mikasl ngi ru nga Rages ati ngi mawa. Hin naŋ mucuh gar na, mangal naŋ a ndilo ta aruŋ na si.

²Dar a ɓi: «A tikakaŋ le adiga kwa? Gabayel a muc le, mbur ngi vulaŋ dala anta sukwa?»

³A ra lik ti gidaŋ.

⁴Ngwas naŋ Ana a ɓi: «Mangal ɗu a muc le! N’anta awuzla mizli misi ti siifahaya mata.» A zla a tuwuy, yo a ra lika mangal naŋ, dar a ɓi:

⁵«Aw mangal ɗu, ka misi avi a zle na, i ra mumul, ani yi puluw ki ru le, kay i bonoy avi ya.»

⁶Amma Tobi a ɓaŋ na: «Taˀa mi, ki gir vu ɗik ta ngwas ɗu, a ro zuy zuy. A ro na, gwat a ga taŋ ngaˀa ngi hine le neˀ adiga. Asi mbur miki saŋ na, i mbur mezle, yo i mbur ndra. Ki ziza lesle asi ɓi naŋ ta ngwas ɗu mezleŋ, neˀ aka na, a sa sawa si.»

⁷Amma ngwas a mbuɗaŋ di: «Ko ki ɓiy neˀ le mata, ki tikiniy mata. Mangal ɗu a muc le ma na.»Vur hin gar na, a bo ti li, deŋ a jiviɗi mangal naŋ muru tira na, asi a vula mevel naŋ da mbur ko pal ta. Pas midiɗ le na, a mi nga kiɗima tuwuy hã li daŋ daŋ, ko hiri tiɗeˀ le anta.

⁸Hin mukuruˀ nga mufaɗ, Raguwel muhudum ɓa a sa gi di muguzlum ngi kisa zuŋ naŋ tuwa, a cuh le. Tobiye a sawa, a ɓa jomo naŋ: «Piliy jiviɗ ɓa i ru le, asi i sina le, ti baha ati maha a waka na, kaɓa t’anta sa pirikiy mata. Vurˀe, ambuh takwa, jumo ɗu, piliy i ru le, i mi ng’avi baha. Ya mipilo di, naŋ ka wanaka na, i ɓuw di le.»

⁹Amma Raguwel a ɓa Tobiye: «Cifi a hay ɗu aka managal ɗu. I sa slin mizli ng’avu bunuko, a sa ɓakaŋ ɓi ɗike.» Tobiye a ɓaŋ: «Kay ka nah ta, ambuh takwa, i nga piliy i mi nga hay baha.»

¹⁰Raguwel a vulaŋ zuŋ naŋ Sara, waɗ reta ngi zlili naŋ kutum. A vulaŋ gawla ati diylihey ngi gi slra, sla ati tumuŋhoy, zungu ati zlogomohoy, zanahay, waɗ dala ati zlili mekelemey wal wal haɗa.

¹¹A pula taŋ a cohom ti mumul. A mbiɗa mi da Tobiye, a ɓaŋ: «Cifi zuy zuy mangal ɗu, yo zuɓaka jiviɗe kuy kuy. Anja Bumbulvuŋ ngi muŋ a kusukum ka waɗ ngwas ɗik Sara. Yo anja ɓa hã i sa muc na, i pura ziri kumoyo le.»

¹²Waɗ a ɓa zuŋ naŋ Sara: «A ru nga hay dideˀ ɗike, asi zle wurenna, miyi ngi zil ɗike, i mizli ɗikey kaɓa mizli miyukuw na ya. A ru jam zuŋ ɗu, yo anja ti ya misi ar siifa aruŋ na, sey i cin a ɓam i ɓi mezle ar ka.» Dar a mbiɗa taŋ mi, a pula taŋ a ram.

¹³Etna ya kwana, a ɓa Tobiye: «Mangal ɗu ya mawuɗ ka haɗa, anja Bumbulvuŋ a kusukum ngi mi nga haya. Anja i zik ar siifa ɓa i pura ziri ɗikey ati ngi zuŋ ɗu Sara. I vuluw zuŋ ɗu le a mbuŋ Bumbulvuŋ, jaŋ haŋ kuy kuy, ar hin ngi siifa naŋ gar, ko ki gaŋ bonoy ta. Mangal ɗu, a ru jam so. Zle wurenna, puriy kaɓa yi munuku, yo pura Sara kaɓa i sukum ɗik mongoso. Anja i lumam cira hiri mupurla ar hin ngi siifa ndra gar.» Dar a ja taŋ cuw taŋ kuɓuy kuɓuy, waɗ a pula taŋ a ram ti mumul.

¹⁴Dar Tobiye a bi ti hay Raguwele ti cira hiri waɗ ti mumul. A ra ga sise da Bumbulvuŋ ngi muŋ ati ruwuy, naŋ Buy madiɗa ngisi gazlavay kurzluˀ wãˀ, miga ɓa zuɓa mulak taŋ a gi kuy kuy na. Raguwel a ɓa Tobiye ma: «Anja Buymisemuŋ a vuluw mumul ɓa ki ɗuva hirnga da miyi ɗikeye ar hin ngi siifa taŋ wãˀ.»