Read South Giziga Tob 11 Bible Online

Tob 11 - South Giziga bible

Tob 11

¹Ti taŋ mandiloko nga Kaserin, walahay migweˀ avi Niniv na, Rafayel a zla a ɓi:

²Ti ndra miram na, cine ɗike, i pulaka naŋ ka wanaka na, ki sina le takwa?

³Akum dumbuŋ ar ngwas ɗike, ɓa i ra ɗiyaka haya ɓa taŋ ati mizli mekelemeye, a sa ra lumam ndra.»

⁴Aram cuw taŋ arleˀe. Rafayel a ɓa Tobiye le zleˀe ɓa wi vu weˀ ti meɗeleke. Kiri a ro ɓaˀ asi taŋ.

⁵Dambalaka Ana a ro joˀ, a ro hiri taˀ ng’ar jiviɗ, mangal naŋ masa so ti ra na.

⁶Naŋ mupura keɗ kileŋ si na, a widi ng’avi zil naŋ: «Pura mangal ɗike, t’ani soko ati mbur miki saŋ tuwa.»

⁷Dumbuŋ ɓa Tobiye a sa ndila cine na, Rafayel a ɓaŋ: «Yi sinale, hiri ngi cine ɗike a sa wun.

⁸Kuroŋ meɗelek ngi kilife da hiri. Slalak naŋ a sa ndisla jirzleŋ, a sa turo taŋ, dar bunuko a sa pur kweŋ kweŋ amuŋ.»

⁹Ana a kil, a ra ja mangala kuɓuy, a ɓaŋ: «I ra puruw amuŋ mangal ɗu, wurenna ko i muc kwana zuy, dar a zla tuwuy.»

¹⁰Tobi a slikiɗ, a ɓo tiɗam tiɗam ti mizlingre.

¹¹Tobiye a ra ji di hirnga, meɗelek ngi kilife kaw a haŋ. A ufoŋ hiri, waɗ a ja kaw, a ɓaŋ: «Mbur mbor baha!» A kuroŋ slalak tuwa, waɗ n’ada kaw di.

¹²Dar a turo gwat kaɓa dubaˀ ngi kilif tir dangwal ngi hiriheye, ti muzuŋ haŋ ngi haŋhaya cuw cuw taŋ.

¹³Dar Tobi a jaŋ kuɓuy, mbak tuwuy, a ɓaŋ: «I ra puruw amuŋ mangal ɗu, ka misi avi ya zleˀe na, i ra mumul.»

¹⁴Waɗ a ɓi ma: «Sise da Buymisemuŋ! Sise vur slimiɗ naŋ mazil haɗa na! Sise da modro naŋ mipalay na! Anja vur naŋ mazil slimiɗ haɗa na, a jigina ndra! Sise da modro naŋhay gar hã ngi sete! Asi Bumbulvuŋ a ci le a kwacay ɗu, ani wurenna i ra pura manga ɗu Tobiye amuŋ!»

¹⁵Tobiye a ci nga haya ti mumul, yo a ga sise da Buymisemuŋ ˀay kaˀ amuŋ. A ɓa ɓi ngi mulak naŋ da cine. I ɓaŋ i zuɓa mulaka le kuy kuy, yo i ra so ti dala. Sara, zuŋ ngi Raguwele, a ɗuva le. Dar a ɓaŋ ma na: «N’ani a ra sawa, a ro gweˀ avi mizlingreŋ ngi Ninivi.»

¹⁶Tobi a ra mumul, a ra ga sise da Buymisemuŋ. A ru nga zlir ti dideˀ naŋ kini tir vay mizlingre ngi Ninivi. Mizli Ninivey mapuraka naŋ maru kuy kuy, manja mbur a ki saŋ na, a ga taŋ ngirkik. Tobi a ɓa njah a mbuŋ taŋ: Buymisemuŋ a puriy ircece le, yo a winiy hiri le.

¹⁷A ndilo gweˀ avi Sara, ngwas ngi mangal naŋ tuwa, joˀa ɗuwulaŋ mi: «Ndilo ndra jam zuŋ ɗu. Sise da Buymisemuŋ ɗik muso ti ka nga hay ndra na zuŋ ɗu. Sise da cine ɗiki, sise da mangal ɗu Tobiye, waɗ sise daka vuna zuŋ ɗu! Ci nga hay ɗiki, cifi zuy zuy, anja Buymisemuŋ a ɗuwuluw mi, a vuluw cira hiri. Ci zuŋ ɗu.»

¹⁸Ti hin nah na, Yudehey misi a Ninive, a ra mumulom.

¹⁹Ahikar ati Nadap, sukum ngi Tobiheye, a soko mumulom bummoˀ ati naŋ.