Read South Giziga Tob 12 Bible Online

Tob 12 - South Giziga bible

Tob 12

¹Ti muguzlum ngi kisa ngwas mitiki na, Tobi a zilo mangal naŋ joˀ a ɓaŋ: «Mangal ɗu, anja ki wurka migir ngi mbur mikis ɗik tuwa, ki paŋ neˀ ng’ameˀe.»

²Tobiye a ɓa cine: «Baha, i sa wurkaŋ migir naŋ vuna kite ka? Ko da i vulaŋ reta ngi zlili naŋ mijiniy ngi so di na kwana, a kiɗiy may t’aruŋ na si.

³A so ti ya ko gwat a giy ta, a mbuliy ngwasa le, a jiniy le ngi tiɓo dala, yo a mbuluw le ma, na vur gwat tayna gar na, i vulaŋ migir naŋ kite sika?»

⁴Cine naŋ a ɓaŋ: «Mangal ɗu, reta ngi gwat naŋ muso di na, da i vulakaŋ di le na kuy.»

⁵Tobiye a zilo di a ɓaŋ: «Migir ɗike, tuɓa reta ngi gwat ka muso di na, yo ru zuy zuy.»

⁶Dar Rafayel a zila taŋ baˀ cuw taŋ, a ɓa taŋ: «Gaka sise da Buymisemuŋ, yo gakaŋ muguzlum a mbuŋ mizli misi ti siifahay gar, vur gwat naŋ mugukum di na, a ndila le ngi hunum ti dimis. Gwat ngi gi ngi Buymisemuŋ na, bugaka da mizli gar ti jiviɗ naŋ. Ki murom ngi gakaŋ muguzlumo ta.

⁷Gwat miyaŋŋa ngi buy madiɗa, naŋ kuy ɓa a ndir ɗum, amma gwat ngi gi ngi Buymisemuŋ, anja sey a njikaka ti gi muguzlum. Gam taŋ muguzlumo ti jiviɗ naŋ kuy kuy. «Gam gwat mezlehey, ɓa gwat malambaˀa a sa lumukum ta.

⁸Luma zlili ti jiviɗ mijeŋ ta na, suwen diradibiɗ minjah wãˀ ati vula gwat da misi murgahay ti ɓi jiviɗ mijeŋŋe. Cikila ɓiri hirnga na, suwen vula gwat da misi murgahay.

⁹Vula gwat da misi murgahaya, a luhuw avi muco, yo a puyuw mungra gar. Mizli mavulam gwat da mizli na, a sa zikam haɗa ar siifa.

¹⁰Mizli magam mungra, yo magam gwat mijeŋ ta na, taŋ i mesene ngi vu taŋ tehhe amuŋ.

¹¹«Wurenna, i wuɗ i ɓukum ɓi njah wãˀ manja i ɗumukum gwat neˀe. I ɓukum di le: ‹Gwat miyaŋŋa ngi buy na, i ngi ɗum, amma gwat ngi gi ngi Buymisemuŋ na, naŋ kuy ngi njik njah njah wãˀ.›

¹²Naŋ kine! Ti ka midir dibiɗ waɗ Sara midira nga naŋ ya na, i ya mubuga diradibiɗ kumo da Bumbulvuŋ misi dudoko. Yo ti ka midika mizli mumucahay na, i ya mubugaŋ gwat ngi gi ɗikeye.

¹³Ka migi gigisl neˀ le ta, ki pula ɗaf ngi zum ɗike, ki ru nga dika mbur mumuca na, akẽh, Buymisemuŋ a slino ya ng’avi ka ɓa i ci a kwacay ɗiki.

¹⁴A slino ya le ngi mbul ɗik waɗ ngi mbulo dide ɗik Sara cuw kumo.

¹⁵Yi Rafayel, pal awuzla modrohoy mitarnaˀ macicam a mbuŋ Bumbulvuŋ misi dudoko, yo magakaŋ slra naŋhay vur hin gar na.»

¹⁶Tobi ati mangal naŋ, didak a muɗa taŋ, zluwun a ra ga taŋ, dar a a hurkom huruk huruk a ruwuy.

¹⁷Amma Rafayel a ɓa taŋ: «Ki zluwunam ta! Leleŋ ngi Buymisemuŋ n’ada ati kum. Gaka sise da Buymisemuŋ ko mbak le ta.

¹⁸Ti ya misi zle ati kum na, anta vur may cuf ati kum ta, amma vur wuɗ ngi Buymisemuŋ. Anja ki gam sise vur hin gara da naŋ, yo ki hunumam vur hin gara i naŋ.

¹⁹Ki puraka zleˀe kaɓa y’ada i zum gwat ati kum, dambalaka y’anta zum ta. Ki puram i ya mawa zokko zokko na si.

²⁰Hunumaka Bumbulvuŋ a ruwuy aka, yo gakaŋ dudoko. Ya kwana, yi mi le ng’avu mbur mislino ya. Gwat migi avu kum gar na, tohoko toh toh le.» Dar a slikiɗ faw nga muŋ.

²¹Tobi ati mangal naŋ a slikiɗam dedeŋ, amma ko t’anta puraka mata.

²²A gaka sise, a zlam dimis da Buymisemuŋ, a gakaŋ muguzlum vur gwat madiɗahay gar naŋ miga taŋ akẽh na. Modro ngi Buymisemuŋ a buga taŋ vu le.