Read South Giziga Tob 13 Bible Online

Tob 13 - South Giziga bible

Tob 13

¹Dimis Tobi mizla anihĩ:

²«Buymisemuŋ misi ti siifa, anja i gakaŋ sise hã ngi sete. Sise vur naŋ mazum buy na. A ga bonoy da mburo, yo a puraŋ ircece ma. A ga ɓa mbur a pi sar hã ar li ngi mizli mumucahay, hã seŋseŋ ar mijileŋ ngi ruwuy, amma a ɗiɗo mburo tir li ngi zizi miwãˀ nah vuna ma. Gwat maɗum asi haŋ naŋ anta ko pal ta.

³Israyeley, naŋ muwuhukum hirnga mber mber nga wuzla mizli na, gakaŋ muguzlum a wuzla mizli tayna vuna.

⁴Adiga vuna, a bugukum di i madiɗa naŋ. Jakaŋ salalay a wuzla mizli misi ti siifahay, asi i Bumbulvuŋ ndra, i Buymisemuŋ ndra, i cine ndra. Naŋ i Buymisemuŋ ngi sete.

⁵A ra kutukum ti bonoy asi kum migam malambaˀ na, amma a sa purukum ircece gar kumo, a ɗiɗo kum ti wuzla sukwi ngi mizli, naŋ muwuhukum nga wuzla taŋ na.

⁶Hin, kum misa moko le ng’ava ti mevel kum wãˀ, ti dum ngi vu kum wãˀ, ɓa ngi gi gwat minjah a mbuŋ naŋ na, naŋ a sa mo ng’avu kum, yo anta sa ɗumo mihiri naŋ avu kum mata.

⁷Na wurenna, sinaka gwat naŋ mugukum di, yo gakaŋ muguzlum ti ji salalay ˀay ngar ngar wãˀ. Hunumaka Bumbulvuŋ mijeŋŋe, yo jaka salalay da Buy ngi sete.

⁸Ya, i ra gaŋ muguzlum asi ruwuy mijoko ya ng’ara na. I ra buga gidaŋ naŋ ati madiɗa naŋ awuzla sukwi ngi mizli migi malambaˀhay. Mizli migi mungrahay, moko, gam gwat mijeŋŋe a mbuŋ naŋ. Asinta, da a sa tuɓukum, yo a sa purukum ti hiri mezle kwani?

⁹I ra ga dudok da Buymisemuŋ ɗu, yo membezleŋ ngi vu ɗu a ra mumulo Buy madiɗa ngi muŋ.

¹⁰Anja mizli gar a ɓaka ɓi ngi madiɗa naŋ, yo a gakaŋ muguzlum a Zeruzaleme. Zeruzalem, ka ki walahay mipal, Buymisemuŋ a ra kutuw ti bonoy asi gwat ngi gi ngi ziri ɗikeye, amma a sa pura ircece da ziri mijeŋŋehey amuŋ.

¹¹Ga muguzlum da Bumbulvuŋ ti ji salalay, yo Buy ngi sete gaŋ dudoko, ɓa hay naŋ a sa ndiraka hiri naŋ amuŋ, ngi cira hiri da ziri ɗikey.

¹²Anja Buymisemuŋ a ga ɓa mizli mihilahay nga ruwuy mulak na, hiri a cira taŋ, anja a buga wuɗa vu naŋ da mizli misi ar bonoyo vur mizli gar masam bonoy asi ruwuy ɗik na.

¹³Li minjahha mipiɗak piɗak a sa wucuɗ hã ar kiɗa mi ngi ruwuy. Sukwi ngi mizli haɗa a sa soko, yo mizli ngi si ruwuy mira kuɗo mi gar, a sa soko nga wazlaray ɗik, ka walahay mipal na. a soko haŋ mbaf mbaf ti gwat ngatara ngi vul da Buy madiɗa ngi muŋ. A sa zluzluɓam vur ka, vur dideˀ vur dideˀ, dar mizli masa yaka taŋ ti mbuŋ, a sa zulukuw ‹Walahay muwuna›.

¹⁴Mizli masa mburukuw huma na, taŋ i minisahay le. Mizli masa ngizlukuw, masa wahaka mohol ɗikeye, taŋ i minisahay le. Mizli masa mbuzlaka hay musubur ɗikey, yo masa wuraka hay ɗikey na, taŋ i minisahay le. Amma mizli masa zluwunam ti ka na, taŋ i muɗuwula mihey le ngi wãˀ.

¹⁵Wurenna ka Zeruzalem, ki sa zluzluɓ vur ziri mijeŋŋehey, asi a sa kusom le gar, yo a sa gaka dudok da Bumbulvuŋ ngi sete. Mizli mira wuɗukuw na, taŋ ar mumul. Mizli misa ciram hiri asi zuy mabo tivi ka na, taŋ ar mumul.

¹⁶Mizli mira ndurɓom hiri vur ka asi ka masi bonoy na, taŋ ar mumul. Asi ka mamumul na, taŋ a sa mumulomo ya, yo a sa ciram hiri ati ka hã ngi sete. Haˀaw, i wuɗ i ga dudok da Bumbulvuŋ, Buy madiɗa.

¹⁷Asi a sa ndiraka Zeruzaleme hiri naŋ amuŋ, yo hay ngi Buymisemuŋ, a sa ndiraka adiga ngi sete. Zeruzalem, da ˀis ngi mizli ɗuwoy, a ra pura dudok ɗike, yo a ra gam muguzlum da Buy madiɗa muŋ na, i sa mumul haɗa. Miviŋ ɗikeye a sa ndiraka taŋ ti ɗugur mupuɗaw ngil ngil, waɗ ti ɗugur meɗelek meɗelek, yo mohol ɗikey gar a sa ndiraka taŋ ti ɗugur maravaˀahay. Hay musubur ɗikeye, a sa ndiraka taŋ ti ɓiri hirnga, yo a sa gunoko ti mohol mindira ti ɓiri hirnga pal naŋ. A sa gaka wuya da jiviɗ ɗikeye ti ɗugur mupuɗaw gagaza ndez waɗ ti ɗugur ngi ruwuy Ofirey.

¹⁸ˀAy ngi dimis ngi mumul a sa bo wuwwo, tir mizlingreŋ ɗikeye, mizli a sa zlam dimis ar hay ɗike gar, a sa zlaka ani: ‹Aleluya! Sise da Buymisemuŋ ngi Israyel!› Dar mizli, Buymisemuŋ misa ɗuwula taŋ mi le na, a sa gaka dudok da Buy mipala ngi wãˀa.»