Read South Giziga Tob 14 Bible Online

Tob 14 - South Giziga bible

Tob 14

¹Tobi a kiɗ mi ngi hunuma Buymisemuŋ ka hana so.

²Tobi a muc ti jam, naɓa naŋ ti vi skat ti kukur cuw. A dikaka mizli hoyo hoyo a Ninive. Naŋ muhuluf na, naɓa naŋ ti vi kukur merkeɗ nga cuw. A dirba naŋ muwuna hiri na, a zik ti cira hiri asi zlili naŋ, dar a vul gwat ngatara da misi murgahay. A ra ga dudok da Buymisemuŋ aruŋ, yo a ra gaŋ muguzlum ma.

³Ti naŋ mawuɗ a muc na, a zilo mangal naŋ a vulaŋ kuti ani: «Mangal ɗu, so ti ziri ɗikeye.

⁴A ru kutum nga Medi, asi mingiɓi, mijiviɗ Nahum miɓa a hirnga Niniv na, yi tuɓa le. Gwat gar a sa gi, yo a diɗ nga hirnga walahay Asiri ati walahay Ninivi. Mijiviɗ ngi Israyeley, Buymisemuŋ mislino taŋ, mingiɓi taŋ miɓaka gar na, a sa gi. Mingiɓi taŋ miɓaka gar na, masa ndir manja a gi, anta ko loŋ ta. Mingiɓi gar, gwat naŋ a sa gi ar hin naŋ muɗuva. Mizli a sa pulam vu haɗa a Medi fineˀ a Asiri waɗ a Babiloŋ. Asi yi sina le, gwat Buymisemuŋ miɓa le na, a sa gi cummo, masa ndir ko loŋ anta. Mingiɓi mijiviɗey miɓaka na, masa diɗ ko pal anta. Sukum ndrahay misi asi ruwuy Israyele, a sa tohoko slimiɗ taŋhaya gar, waɗ a sa hilaka taŋ nga ruwuy mulak, kileŋ avu ruwuy ngi cira hiri nana vuna. Ruwuy Israyel gar a sa ndir kirɗak, Samari ati Zeruzalem a sa ndiram kirɗak kirɗak ma. Yo hay ngi Buymisemuŋ a sa ndir ɗoɗok, waɗ zlizlir zlizlir ngi hin neˀe.

⁵Amma Buymisemuŋ a sa pura taŋ ircece amuŋ, yo a sa mo taŋ ngasi ruwuy Israyel amuŋ. A sa ndirakaŋ haya hiri naŋ amuŋ, amma kuy kaɓa mudumbuŋ na mata mbula, sey hin muɗuva ɓa gwatay a gam tuwa a kiɗ mi ɗagay. A dirba naŋ, a sa moko cek tir ruwuy mulaka, a sa ndiraka Zeruzaleme kuy teˀ hiri naŋ amuŋ. A sa ndiraka hay ngi Buymisemuŋ adiga, kaɓa mijiviɗ ngi Israyeley miɓaka ɓi naŋ zle tuwa.

⁶Sukwi ngi mizli ngi si ruwuyoy gar a sa moko, yo a sa ɗuvaka hirnga da Buymisemuŋ njah wãˀ. Taŋ gar a sa pulaka kuli taŋhay matikinaka taŋ, yo maram ti taŋ nga zizi tuwa, dar a sa gam gwat Buymisemuŋ mapura kuy ɓa ngi gaŋ dudoko.

⁷Mizli Israyeley gar masa laham ti hin nah asi taŋ muwulkam keŋ ar Buymisemuŋ njah wãˀ na, a sa kusom, a soko nga Zeruzalem. Ar ruwuy ngi Abraham, ruwuy muvulaka taŋ di, a sa cifam setette adiga ngi wãˀ. Mizli mawuɗam Buymisemuŋ njah wãˀa, a sa ciram hiri, amma mizli magam mungrahay, ati miteŋteŋ tahay a sa susuyumom asi ruwuyo.

⁸«Wurenna sona ziri ɗuwoy, mingiɓi ya maɓukum di ani: gaka slra da Buymisemuŋ njah wãˀ, yo gakaŋ gwat naŋ mapura kuy. Ziri kumoyo, dubunaka taŋ gi gwat mijeŋŋe ati vula gwat ngatara da misi murgahay. Ar ɓi gar na, anja a wulukam keŋ ar Buymisemuŋ, a hunumakaŋ njah wãˀ, ti gidaŋ. Naka mangal ɗu Tobiye, bi ti Ninive, ki cifi aka ta. Daka misa dika munuko le a ciki ɗu na, ki ji duvuɗ purla le ar ruwuy hana mata. Asi i ra pura, ɓi mijeŋ ta ada aka haɗa, yo a tikinam vu haɗa, ko anta pi taŋ mesem ta.

¹⁰Mangal ɗu, gwat Nadap miga da Ahikar, mbur migil naŋ na, wuluka ɗi. Naŋ kaɓa a dika dak titiri takwa? Amma Buymisemuŋ a maŋ gwat malambaˀ naŋ daˀ a mihiri ngi mbur naŋ mawuɗ a kiɗa vuna. Ahikar a bo ng’ar li minjahha amuŋ, Nadap a ci ng’ar luvuŋ, asi naŋ mawuɗ a kiɗa Ahikar tuwa. Ahikar ada vul gwat ngatara da misi murgahay zle, vurˀe a bo le njiraŋ tir mazaɓ ngi kiɗa hirnga, Nadap mipaŋ di na. Amma Nadap a diɗ ng’ar zuva ngi kiɗa hirnga, a zizaŋ wãˀ.

¹¹Na ziri ɗuwoy, vula gwat da misi murgahay mavul mumul na, sinaka sin le, yo puraka ɗi, muc a ra kutuko mizli miteŋteŋ tahaya. Ani siifa ɗu a tiki le.» Ziri naŋhay hinaka tup ng’ar gwat ngi hin naŋ, dar a mucu. A dikaka mizli hoyo hoyo.

¹²Tobiye, ti mumuŋ naŋ mumuc na, a dika a ciki cine. Joˀ a ram ati ngwas naŋ nga Medi, a ra pam a Ekbataŋ a ciki jomo naŋ Raguwel.

¹³A ja haŋ ngi jomo naŋ ati milar naŋ kuy kuy ar gi gal taŋ. A dika taŋ a Ekbataŋ, walahay Medi, waɗ a zuma hay ngi Raguwele kaɓa naŋ muzuma ngi cine naŋ Tobi tuwa.

¹⁴Naŋ vuna a muc ti vi skat ti kuruˀ nga tarnaˀ, mizli gar a ɗuvakaŋ hirngaŋ.

¹⁵Dumbuŋ ɓa naŋ misa muc na, a cina ɓi ngi Niniv mitiri diŋ na le. Siyaksar, buy Medi a hila Niniveye le zleˀe nga ruwuy mulak. Taŋ mimoko na, Tobiye a pura taŋ le. A ga dudok da Buymisemuŋ vur gwat naŋ miga da mizli Ninivey waɗ da mizli Asirihey na. A mumul vur ruwuy Niniv mingizl dumbuŋ ar muc naŋ na, yo a ga sise da Bumbulvuŋ Buymisemuŋ ngi set ngi samadine. Amin.