Read South Giziga Tob 2 Bible Online

Tob 2 - South Giziga bible

Tob 2

¹Ti Asarhadoŋ mazum buy na, yi mo nga hay ɗu, a Niniv. Dar a vilikiy ngwas ɗu Ana ati mangal ɗu Tobiye amuŋ. Ti muguzlum ngi Pantekot, ndra magaka luma tarnaˀ a dirba muguzlum pak na, a dikiy ɗaf mezle ngi papasa. I cifi joˀ ɓa i zuma.

²Dar a sikiy ti gwat ngi zum mezlehey haɗa. Joˀ i ɓa mangal ɗu Tobiye: «Mangal ɗu, a ru ng’avu sukum ndrahay muhiloko taŋ nga Niniv aka na. Lumo mbur misi murga muvula vu naŋ le wãˀ da Bumbulvuŋ ɓa ki so di, i sa zumaka ɗaf ɗu ati naŋ. I sa kutukuw sey ki mo le ɓa i sa zuma ɗafa.»

³Tobiye a ru nga sipo mbur misi murga awuzla sukum ndrahaya, amma a mo bal ti widi: «Baha!» Yi ɓaŋ: «Mike mangal ɗu?» A mbiɗiy di: «Baha, a kiɗam mbur le pal awuzla sukum ndrahaya. A tirɗakaŋ ˀaya le tiriɗ tiɗ waɗ a pulaka fuk ar li ngi luma. A ro kaˀ kaˀ kanah aruŋ.»

⁴I pula ɗafa mbak manja i ca haŋ ara, i kil kutum ng’ar li ngi luma ɓa i ra zuɓa vagay ngi mburo avra. I ka ɓaˀ ar palak meciɗek, joˀ i kutuko pasa a diɗ ɓa i sa dikaŋ.

⁵Ya mimo nga hay na, i bun, joˀ i zuma ɗafa ti tuwuy a hiri.

⁶Ɓi ngi mijiviɗ Amos miɓa a hirnga Betel tuwa, i ra wuluka amuŋ. A ɓi zle na: «Muguzlum kumoy a sa tiram tuwuy ngi vagayay yo dimis kumoy a sa tirm liki.»Joˀ i tuwuy kol kol.

⁷A dirba pas midiɗ na, i ra li vigiɗ leˀ leˀ, i dika mbur tuwa dak daka.

⁸Midigwi ɗuwoy a singiram ar ya, a ɓam: «Ko n’anta zluwun mata sukwa? A sipaka le zle ngi kiɗ vagay vur gwat naŋ maga hana vuna, a kil le. Ani a ra dik mumucahay tuwa ma.»

⁹Ngi hiikuɗ nana, i bun, i bo nga mamay ɗu, joˀ i hin gumbaˀ da mohol ngi mamaya. Hiri a ro ngurɗaɗ asi le liiriɓi.

¹⁰Ɗiyuw cuŋweŋwe [1] ada a hirnga ɗu, ar mohol na, i sina ta. Zay taŋ a gico nga hiri ɗu, vu ava culok, a giy jirzleŋ a hiri wãˀ. I ru di ng’avi misi slalakay kwana, amma naŋ mira gaŋ slalaka na, jirzleŋ a ra hulufiy jaka. I ndir dangar hã vi mufaɗ. Sukum ɗuwoy gar a ra likikiy. Ahikar i giy gwat ya mawuɗu hã vi cuw, a dirba naŋ a cuh nga Elimayis.

¹¹Ti hin nana, ngwas ɗu Ana, slra naŋ i ji zana.

¹²A vula taŋ da madiɗa naŋhay, taŋ kwana, a vulakaŋ migir naŋ ya. Ar hin mitarnaˀ naŋ ngi kiya Distros na, a kiɗa mi ngi zana pala le, a ru di da mbur muwuɗu. Mbur tuwa a vulaŋ migir naŋ le wãˀ, waɗ a vulaŋ zuŋ ˀaw ma.

¹³Naŋ maso ng’aciki ɗu na, zuŋ ˀaw a tuwuy. Yi zilo ngwas ɗu, joˀ i ɓaŋ: «Zuŋ ˀaw na, a so ti damaka? Da i muhulo na, vula da buy naŋ amuŋ. Ndr’anta ti jiviɗ ngi zuma gwat muhulo ta.»

¹⁴Amma ngwas tuwa a ɓiy: «I gwat ngatara mivilikiy di bac ng’ar migir ɗu na.» Ko i tuɓa mi naŋ ta. I ro hirdam di ɓa a mi ti zuŋ ˀawa da buy naŋ amuŋ, dar mevel a jiy ar naŋ. Naŋ a ɓiy: «Gwat ka mavula da misi murgahay ati gwat mezlehey ka maga taŋ tuwa ki lum di mi ska? Gwat malumuw hana naŋ njah wãˀ muduba.»