Read South Giziga Tob 3 Bible Online

Tob 3 - South Giziga bible

Tob 3

¹Ya malik haɗa tuwa, dar i niˀic, i tuwuy, waɗ dir dibiɗ bal ti tuwuy.

²I ɓi: «Aw Bumbulvuŋ, ka jeŋŋe, yo gwat ngi gi ɗikeye, taŋ jeŋŋe ma. Ki ga ndra gwata ti jiviɗ mijeŋŋe, yo ti jiviɗ mikaslsla ma, maga kiita da duniya i ka.

³Wuluk keŋ ar ya so Bumbulvuŋ, puro hiri ng’ar ya, yo vur mungra ɗuwoy ati gwat malambaˀ dideˀ ndrahay mugukuw taŋ manja sin naŋ na, ki kutiy ti bonoy ta.

⁴Ndr’i ngilaka ɓimuɗuva ɗikeye le, vurˀe, ki pula ndra, a hilaka gwat ndrahaya, a jam ndra nga ruwuy mulak, waɗ a kiɗam ndra vagay. Sukwi ngi mizli ka mucufa ndra awuzla taŋ na, a zam ndra, yo a singiram ar ndra.

⁵Haˀaw, ka makutiy ti bonoy vur mungra ɗuwoy ati ngi dideˀ ɗuwoy na, naŋ kaslsla, asi ndr’i jaka ɓimuɗuva ɗikeye a hirnga ta, yo i sipaka jiviɗ ɗike kasl kasl ta.

⁶Wurenna, gi ti ya kaɓa ka mawuɗu. Tuɓa siifa ɗu amuŋ, ɓa yi susuyum tisi ruwuyo, i tiri mereɓ amuŋ. Ya mandir ti siifa na, zuwen yamacu. Asi i lum zi le ngataraŋ yo i ra lik haɗa. Kumani, cukiy ti vi lik hana vuna. Puliy i ci nga muska vu ngi sete. Bumbulvuŋ ɗu, ki mbiɗi duba avi ya ta! Haˀaw, zuwen mucu, a funa ya masi bonoy ati mazikiy ngataraŋ ar siifa ɗu na le.»

⁷Kalla tapasa, ar walahay ngi Ekbataŋ hirwuy Medi, Sara zuŋ ngi Raguwele, a cin ngwas pal awuzla ngwas migi slra ngi cine naŋhay a ra zaŋ.

⁸Naŋ kine, a ɗuvaka Sara le is tarnaˀ. Taŋ muɗuvakaŋ le gar na, maliyam Asmode a kiɗa zil naŋ tay le manja a gam zil ati ngwasa. Ngwas migi slra a ɓaŋ: «I ka makiɗa zil ɗikeye. Ani a ɗuvukuw le is tarnaˀ si, na anta zulukuw ti slimiɗ ngi mbur pal asi taŋ ta si.

⁹Ki ga ndra bonoy, ki ɓa ndra, zil ɗikey a mucam le na vur mike? A ra luma taŋ, yo anja ko i puram mangal ɗik mizile ta, zuŋ ɗik mongoso ta.»

¹⁰Ngi hin nana, Sara a lik haɗa, dar a tuwuy. A jiɗ ng’ar viŋ mijirngasl a hirnga hay ngi cine, ɓa a luwa vu naŋ. Amma a sa wuluk ani: «Anja ɓa a giraka cine ɗu, a ɓakaŋ: ‹Zuŋ ɗik mikpesl kine, ka mawuɗ haɗa na, ani a kiɗa vu naŋ le vur mendere naŋhay› na, anja a gi ta. Ani i sa ga ɓa cine ɗu a lik haɗa hã a sa ca hingaˀ ar vigiɗi. Ar ya maluwa vu ɗu na, suwen ya matumbul Bumbulvuŋ, ɓa a zuɓa siifa ɗu, ɓa i cin zi hana ar zik ngi vi ɗu mata wãˀa.»

¹¹A hahãŋ sina, a mbiɗi ng’avi fenetir, a hila haŋ amuŋ, dar a dir dibiɗ ani: «I ra hunumuw Buymisemuŋ mimezle ɗu. Anja slimiɗ ɗik a zil ngi sete. Anja gwatay ka miga taŋ a hunumukuw ngi samadin.

¹²I ra mbiɗa hiri wurenna ng’avi ka, i ra zuɓa hiri ng’avi ka.

¹³Ga ɓa i pula ruwuy hana, yo anja i cin zi na mata.

¹⁴Buy ɗu ki sina le, avi gwat ngi gi ngi mbur misi dili na, yi cifi le manja dili.

¹⁵A ruwuy mijikiy ng’ara na, i jupa slimiɗ ɗu ta, i jupa ngi baha ta ma. Yi zuŋ mikpesl kine ngi cine ɗu, zuŋ naŋ mekelem ngi sa zuma hay naŋ anta. Sukum naŋ malla mizli naŋhay migweˀ gweˀhey ngi sa ɗuvikiy anta ma. I zuɓ zile, a mucam a mucam is tarnaˀ si: i ndir ti siifa vuna ngi gi mi aruŋ maka? Aw Bumbulvuŋ ɗu, da a ciruw hiri ngi zuɓa siifa ɗu ta na, jik slimiɗ ar mazikiy na so.»

¹⁶Buymisemuŋ, misi dudoko, a tuɓa diradibiɗ ngi Tobi ati ngi Sara tuwa, a hahãŋ si.

¹⁷Dar a slino madro naŋ Rafayel, ɓa a mbulo taŋ cuw taŋ, a zuɓa jirzleŋ ngi Tobi avra, ɓa a pura li njaha ngi Buymisemuŋ ti hiri naŋ. A laha Sara zuŋ ngi Raguwele avi maliyam Asmode tuwa waɗ a vulaŋ ngi ngwas da Tobiye, mangal ngi Tobi. I Tobiye misi ti jiviɗ ngi zuɗ naŋ dumbuŋ ar mangasl mekelemey gar. A hahãŋ si na, Tobiye a coho ti mamaya nga hay naŋ, Sara a po sar tir viŋ mijirngasl ar hay ngi cine tuwa.