Read South Giziga Tob 5 Bible Online

Tob 5 - South Giziga bible

Tob 5

¹Dar Tobiye a ɓa cine: «Baha, gwat ka miɓiy taŋ gar na, i sa ga taŋ.

²Amma, ya ati Gabayel na, i sinam vu ta, ani dala misi ava na, i sa tuɓo di mbri mbrike? I sa bugaŋ di mbri mbri ɓa a siniy yo ɓa a viliy dala naka? Mana, yi sina jiviɗ maru nga Medi vuna ta.»

³Tobi a ɓa mangal naŋ: «Ya ati Gabayele, i tohom ɗerewol le toh toho, yo i ɗuvam haŋ le ara cuw ndra. I wuɗka wuzla cuw, mbur gar a lum reta reta, dar yi ka nga ya jom ati dala vuna. Ya mipa dala nana sek na, a gi le ani vi kukur cuw. Mangal ɗu, wurenna, sipi mbur mikaslsla ɓa a kisuw nga Medi, da kum misa moko le na, i sa wurkakaŋ migir naŋ. Anja ki tuɓo dala nana ti hay Gabayele.»

⁴Tobiye a bawa ɓa a sipi mbur makisaŋ nga Medi, yo anja i mbur misina jiviɗe le kuy kuyo ma. Naŋ mubo sina, a zliram gajaˀ ati Rafayel, amma i modro ngi Buymisemuŋ na, Tobiye a sina ta.

⁵Tobiye a ɓaŋ: «Ngama ɗu, ki so ti damaka?» Modro ngi Buymisemuŋ a ɓaŋ: «Yi mbur Israyel, ngi wuzla sukum ɗiki. I so ng’aka ngi sipi slra.» Tobiye a ɓaŋ: «Ki sina jiviɗ maru nga Medi na le kwa?»

⁶Modro ngi Buymisemuŋ a mbuɗaŋ di: «Ŋhi, i sina le, y’ada i ru zle ndrehhe ng’adiga. I sina jiviɗeye le kwaŋ kwaŋ gar. I ru le is mbeˀ mbeˀ a Medi, i hin a hay sukum ndra Gabayel, naŋ a Rages hirwuy Medi. Ar wala ngi Ekbataŋ ati Rages na, sey ki gi hin cuw ar li ru, asi i li ngir muwãhay.»

⁷Dar Tobiye a ɓaŋ: «Kutikiy ngama ɗu, i ra ɓa baha daˀ le. I wuɗ ki kisiy, a dirba nah, i sa wurukuw migir ɗike.»

⁸Modro ngi Buymisemuŋ a ɓaŋ: «Naŋ kuy, i ra kutukuw aka, amma ki ziko ta ɓula.»

⁹Tobiye a ru ng’avi cine naŋ Tobi, a ɓaŋ na: «Ani i lum mbur le, i sukum ndra, mbur Israyel.» Tobi a ɓaŋ: «Zilo di mangal ɗu, i wuɗ i sina da i dideˀ ngi wa, i muy ngi wakana. Yo da mbak a kisuw kwana.»

¹⁰Tobiye a bawa, a ɓaŋ: «Ngama ɗu! Baha a ra zuluw.» Modro ngi Buymisemuŋ a ci nga haya, dar Tobi a jaŋ haŋ dumbuŋ. Modro ngi Buymisemuŋ a ɓaŋ: «Anja ki lum cira hiri haɗa.» Amma Tobi a ɓaŋ ma: «I sa lum cira hiri wana aruŋ maka? Ani yi mbur dangar, pasa, y’anta pura gu mata. Y’ani ar luvuŋ kaɓa mizli mumucahay masa puraka li minjahha gu mata na ya. Ya ti siifa aruŋ, amma ya a wuzla mizli mumucahay si. I cin ˀay ngi mizli ɓula, amma y’anta pura taŋ ta.» Modro ngi Buymisemuŋ a ɓaŋ: «Mbur mbor, Buymisemuŋ a sa mbuluw. Ka mbur mbor.» Tobi a mbuɗaŋ di: «Mangal ɗu Tobiye a wuɗ ru nga Medi, ki kisaŋ gu kwa? I sa vuluw migir ngi slra ɗike sukumuŋ.» Modro ngi Buymisemuŋ a ɓaŋ: «I kisaŋ nga Medi gu. I sina jiviɗey maram ng’adigahaya le ceke. Y’ada i ru ndrehhe nga Medi vuna. Y’ada i cuh bal tir li micay waɗ tir muwãhaya ma. I sina jiviɗeye le gar.»

¹¹Tobi a ɓaŋ: «Sukum ɗu, ki dideˀ ngi waka? Yo ki muy ngi waka? Inga bigiy di so sukum ɗu.»

¹²Modro ngi Buymisemuŋ a ɓaŋ: «Ki wuɗ ki sina sin le vur mike?» Tobi a mbuɗaŋ di: «Sukum ɗu, da ki mangal ngi waka, yo da a zulukuw mbrike na, i wuɗ i sina.»

¹³Modro a ɓaŋ: «A zilikiy Azariya, mangal ngi Ananiya mbur micawwa ngi wuzla sukum ɗikey vuna.»

¹⁴Tobi a ɓaŋ: «Ndilo ti jam sukum ɗu. Ar ya muwuɗ sina muy ɗikeye njah wãˀ na, anja mevel a juw ta. Ani ki sukum ndra, yo ka awuzla mizli ngir hay mezleheye ma. Ti Ananiya ati Nataŋ, ziri ngi Semeliyas mbur madiɗa na, i sina taŋ le zle. T’ada kisikiy nga Zeruzaleme zle, i dilikam a mbuŋ Buymisemuŋ bummoˀ adiga. Ko a zluɓam neˀ le ta. Mizli ɗikeye, i mizli mezlehey, ka awuzla muy mezle. So ndra jam so.»

¹⁵Waɗ a ɓaŋ ma: «I sa wurkuw migir ɗike, suloy pal vur hine. Ka mikiɗiy slir na, i sa vuluw gwat misi purla ati ngi mangal ɗu.

¹⁶Ki sa mangal ɗu so, i sa vuluw gwat neˀ ng’ar migir ɗik vuna ma.»

¹⁷Modro a ɓaŋ: «Haˀaw, i sa kisaŋ, ki zluwun ta. Ndra masa ram, yo ndra masa moko ng’avi ka na, gwat gar a sa cuh kuyyo si. Asi jiviɗe naŋ ɗalla.» Tobi a ɓaŋ: «Sukum ɗu, anja Buymisemuŋ a ɗuwuluw mi.» Dar a zilo mangal naŋ, a ɓaŋ: «Mangal ɗu, ɗiya gwat ngi zuɓa mulaka, a ram ati sukum ɗike. Anja Buy muŋ a jiginukum adiga, yo anja a mo ti kum ng’avi ya manja gwat a gukum. Yo anja Modro naŋ a kusukum ɓa a jiginukum mangal ɗu.» Tobiye a ja cine ati mumuŋ kuɓuy kuɓuy, dar a bo ngi zuɓa jiviɗe. Akẽh Tobi a ɓaŋ: «Anja ki zuɓaka mulaka kuy kuy.»

¹⁸Dar mumuŋ a tuwuy. A ɓa zil naŋ Tobi: «Ki pula mangal ɗu a ru vur mike? Naŋ maru ani, a mawa ani a ciki ndra vuna, i naŋ majaha ndra ta kwa?

¹⁹Ki wuɗ dala nga hirnga dala vur mike? Pulukum nana, mangal ndra naŋ puɗaw a funa le.

²⁰Gwat Bumbulvuŋ muvula ndra di na, naŋ muk ti ndra.»

²¹Amma Tobi a mbuɗaŋ di: «Ki lik ta, mangal ndra a sa mo kuy kuy kaɓa naŋ muru vuna ma. Naŋ masa mo manja gwat a gaŋ na, ki sa pura ti hiri ɗiki.

²²Ki lik ta ngwas ɗu, pula zluwun vur taŋ. Modro mezle a sa kisa mangal ndra. A sa zuɓa mulak naŋ kuy kuy, a sa mo ndra manja gwat a gaŋ.»

²³Dar a taˀa tuwuyo.