Read South Giziga Tob 6 Bible Online

Tob 6 - South Giziga bible

Tob 6

¹Mangal tuwa a cuh, Modro ngi Buymisemuŋ a ra kisaŋ, a ram zlaɓ cuwa. Kiri a ru asi taŋ ya. Ngi duvuɗ mudumbuŋ, a pam sar a mi mizaw mazilaka Tiger.

²Mangala, a ci ngi buna sar ar mizaw tiger tuwa, kilif madiɗa a jiɗo bir, a wuɗ a ndaŋ sara. Dar Tobiye a widi.

³Modro ngi Buymisemuŋ a ɓaŋ: «Ja kilif nana kaw kuy kuy.» Mangal a ja kilif tuwa, joˀ a ɗiɗo di ng’avra.

⁴Modro ngi Buymisemuŋ a ɓaŋ: «Ngira, huro meɗelek ati duduwa waɗ mevel naŋ, pa taŋ sek mir ciki. Gwat ngi kwacay naŋhaya zliɗa taŋ avra. Amma meɗelek ati duduwa naŋ waɗ mevel naŋ na, i slalak kuyta wãˀ.»

⁵Mangal tuwa a ngira kilife, a huro meɗelek ati duduwa naŋ waɗ mevele. A fuk neˀ avi kilife, a zuma, dar a pa mandaŋ da is nah.

⁶A dirba naŋ, a zuɓaka jiviɗe arleˀe ma, hã gweˀ ngi ndila ruwuy Medi.

⁷Dar mangal a cufuɗa Modro ngi Buymisemuŋ: «Sukum ɗu Azariya, meɗelek ati duduwa waɗ mevel ngi kilif vuna, i slalak ngi mike?»

⁸Modro a ɓaŋ: «Mbur zil malla ngwasa, da maliyam, malla kulihey a ra gakaŋ na, a wuraka duduwa ati mevel ngi kilif tuwa a mbuŋ naŋ. Cunju naŋ mangis na, a sa ɓula gwat majaŋ tuwa, dar mbur naŋ a lih ngi wãˀ.

⁹Meɗelek naŋ na, a piyaka da mbur misi jirzleŋ a hiri, ki ˀufo jirzleŋ naŋ, dar a mbul.»

¹⁰A cam le angi hirwuy Medi, taŋ gweˀ ngi ndila walahay Ekbataŋ.

¹¹Rafayel a ɓa mangal gawla: «Sukum ɗu Tobiye!» Tobiye a mbuɗaŋ di: «Mbrike?» Modro ngi Buymisemuŋ a ɓaŋ: «Ti duvuɗ dana na, i sa cifam a hay Raguwel. I muy ɗiki. Zuŋ mongoso naŋ ada a zilaka Sara.

¹²Mbak Sara na, mangal mizile naŋ anta, zuŋ mongoso naŋ anta. Ka ki muy ngi Sara wãˀa, jiviɗ ngi zuɓ naŋ sey daka dumbuŋ, yo mazuma hay ngi cine, sey ka ma. I zuŋ misi lesle, naŋ gidaŋ, yo naŋ kuyo ma. Cine naŋ, i mbur mezle ma.

¹³Da ki zuɓa le na kuy. Ciniy di kuy kuy sukum ɗu. Zle ti pastaˀ dana, i sa ɓa ɓi naŋ da cine, ɓa i vulukuw di, ki bubuɗ di. Da ndra misa moko le ti Rages na, i sa gaka muguzlum ngi kisa ngwasa. I sina le, Raguwel anta sa tik di vu ta, anta sa vula da mbur mekelem ta. Da kanah ta na, ar ɓimuɗuva ngi Moyise, a kiɗaka vagay. Asi a sina le ti jiviɗ naŋ, zuŋ naŋ i ngiɗik dumbuŋ ar mbur mekelem gar. Wurenna, ciniy mi kuy kuy so sukum ɗu. Zle ti pastaˀ dana, i sa kiɗaka slir ngi zuŋ, i sa cufuɗaka ɓa ki zuɓa. Da ndra misa moko le ti Ragese na, i sa zuɓaka, i ram di nga hay a haŋ.»

¹⁴Tobiye a ɓa Rafayele: «Sukum ɗu Azariya, i cin na, a ɗuvaka Sara le is tarnaˀ si, yo zil naŋhay gar a mucam daˀ ar li hin taŋ. Ti duvuɗ taŋ mira wuɗ a zliram sina, zil a mucu. A ɓam vuna mana, i maliya makiɗa taŋ.

¹⁵Ani wurenna, zluwun a ra giy. Anta gaŋ malambaˀ da naŋ neˀ le ta, amma da mbur a ra wuɗ a zlir di sina, a kiɗa tay le. Yi mangal kirmalay avi baha. Na da yi muc le na, ti baha ati maha a sa likam, a mucam vur ya. Ani mangal taŋ mekelem anta ngi dik taŋ ta ma.»

¹⁶Rafayel a ɓaŋ: «Bunuk muɓuw tuwa ki puyuk hirnga le kwa? A ɓuw ɓa ki zuɓ ngwasa a wuzla muy ɗikey kini takwa? Sukum ɗu, cin ɗi, ko ki lik vur ɓi ngi malyam nana ta, ka zuɓaŋ. I sina le, ti hiikuɗ dana, a sa vulukuw di.

¹⁷Daka misa ci le ng’ar li hin kum na, wuɗ neˀ avu duduwa ati mevel ngi kilif tuwa, pa taŋ ng’ar zayvu misi ar gwat ngi wura ˀurdi. Ŋziˀĩ naŋ a tisla haya, maliyam misa ŋzaˀa le sina, a sa kil. Ko anta sa puraka a ciki naŋ mata.

¹⁸Daka miro gweˀ ngi zlir di na, slikiɗam cuw kumo, diram dibiɗ ɗagay. Tumbuloko Buy muŋ, ɓa a purukum ircece, yo a luhukum. Ki zluwun ta, Sara i ngi ɗik diga zlezle, yo i ka masa lahaŋ. Ki lik ta, a sa supuw, ki sa lum ziri ka mawuɗ taŋ haɗa.»

¹⁹Ti Tobiye micina ɓi ngi Rafayel, yo naŋ micina, Sara i sukum naŋ ngi wuzla muy migweˀ cine na, a wuɗ naŋ haɗa, mevel naŋ a ɓuruk aseˀe haɗa.