Read South Giziga Tob 7 Bible Online

Tob 7 - South Giziga bible

Tob 7

¹Ti taŋ macam nga Ekbataŋ na, Tobiye a ɓi: «Sukum ɗu Azariya, kisiy cirre nga hay sukum ndra Raguwel.» Modro ngi Buymisemuŋ a ki saŋ nga hay Raguwele. A ra lumaka joˀ a mizlingreŋ, yo a jakaŋ haŋ dumbuŋ. Dar a ɓa taŋ: «Sukum ɗuwoy, i jukum haŋ le kuy kuy. Anja ki cifam aka ti zuy.» Dar a pula taŋ a cam nga haya.

²A ɓa ngwas naŋ Etna: «Pura mangal gawla hana mibam vu ati sukum ɗu Tobi ɗi.»

³Etna a ɓa taŋ: «Sukum ɗuwoy, ki soko ti damaka?» A mbiɗakaŋ di: «I soko ti Niniv, tahay ziri ngi Neftalihey mijahay ng’adiga.»

⁴A ɓa taŋ: «Sukum ndra Tobi na, ki sinaka le kwa?» A mbiɗakaŋ di: «Haˀaw, i sinaka le.»

⁵Sara ɓa taŋ ma: «Naŋ mbrike?» A ɓakaŋ: «N’ada kuy kuy, n’ada ti siifa aruŋ.» Dar Tobiye a ɓaŋ: «I cine ɗu.»

⁶Raguwel a jiɗ totuɗuk, a jaŋ kuɓuy, waɗ mbak tuwuy. Joˀ a ɓaŋ: «Anja Buymisemuŋ a ɗuwuluw mi mangal ɗu! Ka ti cine mezle haɗa. Mbur mezle, mavul gwat ngatara da misi murgahay ka nana, hã a huluf na, kay i mendere madiɗaŋ.» A ja Tobiye tuwa kuɓuy ma, dar a tuwuy ava.

⁷Ngwas naŋ Etna ati zuŋ taŋ Sara mawulukaka Tobi na, joˀ a tuwam aya.

⁸Dar Raguwel a kiɗa zlengerek ngir gezleŋ, a tuɓa taŋ mulaka kuy kuy.

⁹Taŋ mubunam, a zuɓaka dili kaɓa ngir sirik taŋ na, a cifam ngi zuma ɗafa. Tobiye a ɓa Rafayele: «Sukum ɗu Azariya, cufuɗa Raguwele ɓa a viliy sukum ɗu Sara ngi ngwasa.»

¹⁰Raguwel a cina mingiɓi nana le. Dar a ɓa mangala: «Wurenna ka zum, si gwat, yo musuk vu ar pastaˀ hana kuy kuy, asi masa ɗuva zuŋ ɗu Sara i mbur mekelem ta, sey i ka sukum ɗu. Ya vuna, jiviɗ anta ɓa i vula da mbur mekelem mbak ka ta. Ka ki muy ndra migweˀ gisiŋ. Amma sey i ɓuw ɓi njah njah wãˀ mangal ɗu.

¹¹I vula le da sukum ndrahay tarnaˀ si, a mucam le gar ngi duvuɗ ti taŋ mawuɗam a zliram di. Wurenna na, mangal ɗu, zum, si gwata. Bumbulvuŋ a sa cik vu ar kum.»

¹²Amma Tobiye a ɓaŋ: «Da ki sla ndra ɓi nah ta na, y’anta zum, yo i si gwat aka ta.» Raguwel a mbuɗaŋ di: «I tuɓa le i sa ga. Sara i ngi ɗik kaɓa mujuwaka ɓi naŋ ar ɗerewol ngi Moyisi. I vulukuw di asi wuɗ ngi Buymisemuŋ. Tuɓaŋ i ngwas ngi hay ɗik so. Zle dana, ka ki zil naŋ, naŋ i ngwas ɗiki. Yo naŋ i ngi ɗik zle dana hã ngi samadin. Mangal ɗu, Bumbulvuŋ ngi muŋ a sa ga ɓa duvuɗ dana, gwatay gar a cohom kuy kuy vur kum. Anja a purukum ircece, yo a vulukum leleŋ naŋ.»

¹³Raguwel a zilo zuŋ naŋ Sara so. Ti Sara mindilo na, a ja kaw avi haŋ, a so di ng’avi Tobiye, dar a ɓaŋ: «Tuɓa zuŋ hana ngi ngwas kaɓa ɓimujuwa ati ɓi miɓa ar ɗerewol ngi Moyisi. Zuɓa, a ru di nga hay cine ɗik a haŋ. Anja Buymuŋ a ndil ti kum jam.»

¹⁴Waɗ a ɓa mumuŋ ngi Sara ɓa a so ti gwatay ɓa a tohom. A toho ɓimicica vur zuɓa vu. A vula Sara le wãˀ ngi ngwas da Tobiye kaɓa micicaka ɓi naŋ ar ɓimujuwa ngi Moyis. A dirba naŋ, a zlaka zum ati si gwata.

¹⁵Raguwel a zilo ngwas naŋ Etna, dar a ɓaŋ: «Ngwas ɗu mezleŋ, viŋ mekelem na, a ru ti Sara ng’ara.»

¹⁶Etna a ru, a ra ɗiya gwat ngi hin ar viŋ mekelem kaɓa zil naŋ miɓaŋ di. A ru ti zuŋ naŋ ng’ara, naŋ mawuluk ar zuŋ naŋ na, dar a tuwuy. A dirba naŋ a soŋho tuwuyo joˀ a ɓa zuŋ naŋ:

¹⁷«Mbur mbor zuŋ ɗu! Anja tuwuy ɗik na, Bumbulvuŋ ngi muŋ a tiri di mumul. Ka mbur mbor zuŋ ɗu.» Dar a bawa.