Read South Giziga Tob 8 Bible Online

Tob 8 - South Giziga bible

Tob 8

¹Ti taŋ mikiɗaka mi gi zum ati ngi si gwat na, a ra wuɗam ɓa a ra hinam tutupu. A kisaka gawla nga viŋ.

²Dar mingiɓi ngi Rafayel tuwa, Tobiye a wuluka keŋ. A zuɓo mevel ati duduwa ngi kilif tuwa, a pa taŋ sek ng’ar zayvu misi ar gwat ngi zluma urdi.

³Ziˀĩ ngi kilif tuwa a mbula maliyama, a kil faw ti muŋ hã seŋseŋ a Ezipte. Rafayel a sipa ng’adiga, a tikaŋ ˀay, a juwakaˀ kaˀ ti celelu kutumo si.

⁴A pulaka ti Tobiye, a gicaka miviŋ ar taŋ. Tobiye a slikiɗ tir arngawo, a ɓa ngwasa: «Ngwas ɗu, slikiɗ ɗagay, anja i diram dibiɗ, i tumbuloko Bumbulvuŋ ɓa a pura ndra ircece, yo a jigina ndra.»

⁵Sara a slikiɗ, joˀ a diram dibiɗ, a tumbuloko Bumbulvuŋ ɓa a jigina taŋ. Dir dibiɗ ngi Tobiye n’ani: «Buymisemuŋ ngi dideˀ ndrahay, i ra hunumukuw! Anja slimiɗ ɗik a zil vur dideˀ vur dideˀ. Anja muŋ ati gwat ka miga taŋ gar a ɗuvukuw hirnga ngi set.

⁶Miga Adamu i ka, miga gwas naŋ Hawa, i ka ɓa a jinaŋ, yo a jaŋ haŋ, sukwi ngi mizli a bawa tivi taŋ cuw taŋ. Ki ɓi: «A zlir ɓa mbur zil a cifi pal naŋ ta, gukum mijini naŋ, mabam vu ati naŋ.

⁷Aw Bumbulvuŋ ɗu, ya mizuɓa ngwas hana na, i wuluk mala sar ta, amma i wuɗ i gi teŋteŋ avi ka. Ambuh, puraŋ ndra ircece, yo anja i ndilam ar gi gala cuw ndra.»

⁸Dar a ɓam: «Anja kine! Anja kine!» arleˀeŋ ti ˀay pula.

⁹Dar a hinam tutup ngi duvuɗo.

¹⁰Raguwel a slikiɗ le zle, a ɓa gawla naŋhaya ɓa a ra lam vigiɗi. Asi a ɓi na: «Da mangal a muc le na, mizli a sa singiram ar ndra, yo a sa zam ndra.»

¹¹Taŋ mikiɗaka mi ngi li vigiɗe na, Raguwel a mawa, a zila ngwas naŋ.

¹²A ɓaŋ: «Slin ngwas migi slrahay na pal, ɓa a ra puro Tobiye, da n’ada kwana. Da a muc le na, i sa dikaka manja mbur a sina.»

¹³A zilo ngwas migi slra, a vulaŋ lampe, a wunaŋ miviŋ. Ngwas migi slra a ci, a ra luma ti Tobiye ati Sara a hinjam le ɗokɗok.

¹⁴A bawa, a sa ɓa taŋ: «N’ada ti siifa! Ko gwat migi anta.»

¹⁵Dar Raguwel a ga dudok da Buymisemuŋ a ɓi: «Aw Buymisemuŋ ɗu, ki ndila le ɓa mizli misi mevel mezlehey a hunumukuw. Anja a hunumukuw ngi sete.

¹⁶Sise vur ka miga ɓa i cir hiri haɗa na! Asi a gi kaɓa ya mawuluka zle na ta. Amma ki gi ti ndra le weˀe asi pura ircece haɗa tuwa.

¹⁷Sise vur ka mupura ircece da ziri kirmalayay mucuw na. Pura taŋ ircece, jigina taŋ, yo ga ɓa a ndiram ti mumul ar siifa taŋ mbele ka vuna.»

¹⁸Dar a ɓa migi slra naŋhaya ɓa a dikaka vigiɗe manja pas a bawa.

¹⁹Raguwel a ɓa ngwas naŋ ɓa a di peŋ haɗa, waɗ a ru ng’ar gezleŋ, a jo slahay cuw waɗ zlengerekey mufaɗ, a ɗiyaka useˀ naŋhaya weˀ vu. Dar a zlaka ɗiya gwat ngi muguzlumoyo so.

²⁰A zilo Tobiye, waɗ a ɓaŋ: «K’anta sa kirih kirah le ti ka ta, hã hin kuruˀ nga mufaɗa. Amma ki sa cifi, ki zum gwat, ki si gwata a hay ɗu, waɗ ki sa vula mumul da zuŋ ɗu. Naŋ, a ro ar ɓi ngi menderehey na aruŋ.

²¹A dirba naŋ ki sa hila reta ngi zlili ɗu, ki sa mi nga hay bunuko manja gwat a guw. Reta numuŋ, da ndra misa mucam le ati ngwas ɗu na, a sa ndir da kum. Mbur mbor mangal ɗu. Zle wurenna hã ngi wãˀa, yi bunuk, Etna i munuku. Ndr’ada aciki kum ati ndwas ɗike, zle wurenna hã ngi sete. Ka mbur mbor mangal ɗu.»