Read South Giziga Tob 9 Bible Online

Tob 9 - South Giziga bible

Tob 9

¹Dar Tobiye a zila Rafayele, a ɓaŋ:

²«Sukum ɗu Azriya, hil gawlahay asi ka mufaɗ waɗ zlogomohoy cuw. A ru nga Rages, a hay Gabayel. Vulaŋ ɗerewol mutohoko ɓi ngi pi dala waɗ haŋ taˀtaˀ ara na, tuɓo dala, yo soko ati Gabayele ng’ar muguzlum ngi kisa ngwasa.

³Ki sina le, baha a ra slufa hine adiga ko mbak le ta. Da i zik le hin pal ava na, i sa vulaŋ bonoy haɗa. Waɗ mana, ki pura Raguwel muhudum tuwa le, y’anta ga gwata mbak ɓi ngi hudum naŋ na ta.»

⁵Rafayel a ru ti gawlahay aseˀe mufaɗ waɗ zlogomohoy cuw nga Rages, ruwuy Medi tuwa. A pam sar ngi duvuɗu a hay Gabayel. Rafayel a vulaŋ ɗerewol mutohoko ɓi ngi pi dala waɗ haŋ taˀtaˀ ara tuwa, joˀ a ɓaŋ Tobiye, mangal ngi Tobi a zuɓ ngwas le, a ra ziluw ng’ar muguzlum naŋ. Gabayel a slufaŋ gabal ngi dalahaya, jom ti haŋ muɗuvaka ara tuwa kutum si, dar a paka taŋ ng’ar zlogomohoy.

⁶Ngi miprik prik na, a ram arleˀe ng’ar muguzlum ngi kisa ngwasa. Taŋ mindilam a hay Raguwel na, a ra lumaka Tobiye a ra zum ɗafa. Tobiye a slikiɗ bap, a ja haŋ da Gabayele. Ŋha Gabayele a tuwuy kol kol, dar a ga sise da Tobiye, a ɓaŋ: «Ki mangal mezle, yo ki bo tivi cine mezle, mijeŋŋe, mawuɗ vu! Anja Buymisemuŋ a ɗuwulukum mi zle a muŋ daka, da ngwas ɗik, da cine ati mumuŋ ngi ngwas ɗiki. Sise da Buymisemuŋ, asi ya mupura sukum ɗu Tobiye na.»