Read South Giziga Jud 1 Bible Online

Jud 1 - South Giziga bible

Jud 1

¹Nabukodonozoro, a ɓul di vi mukuruˀ nga cuw naŋ ar buy ar walahay madiɗa Niniv, ruwuy Asiri, naɓa Arpakzat a ra zum buy a Ekbataŋ, hirwuy Medi.

²Arpakzat a ndir mohol ti ɗugur miciɗa ti ciɗ, gun gun hirnga ngi Ekbataŋ, ɗugur gar na, sliprik naŋ metir pal ti reta, jek naŋ metir makir. A gila moholo metir kukur makir ti reta, ɓiɓir naŋ kwana, metir kukur cuw ti zlum.

³A ndir hay musuburoy a mizlingre, gil taŋ nga muŋ, metir kukur zlum, kukur zlum, sliprik ngi si virzi taŋ, metir kukur makir, kukur makir.

⁴A pul miviŋhey avi taŋ, miviŋ gar na, gil naŋ nga muŋ metir kukur makir ti zlum zlum, sliprik taŋ metir kukur cuw kukur cuw, ɓa soje migi vurum naŋhay ati misi saraya, a bam gu.

⁵Buy Nabukodonozor a ra gi vurum ti buy Arpakzat ar li micay, mifirndiw ngi ruwuy Rago.

⁶Mizli vay muwãhay gar, mizli ngi ciki mizaw Efrat ati Tiger gar, ngi Hidaspe waɗ ngir li micay ngi Ariyok buy ngi ruwuy Elimay ati sukwi ngi mizli haɗi mujumom ng’avi Nabukodonozor ngi gi vurum ati ziri ngi Kelewutoy.

⁷Nabukodonozor buy Asiri a slin ng’avi mizli micifam a Perse gar, waɗ misi tisi pas ngi pastaˀ gar, misi a Silisi, a Damas, a Libaŋ waɗ misi a Antilibaŋ, ng’avi mizli ngi ciki mizaway gar,

⁸ng’avi mizli vay muwã Karmel, Galaˀat, Galile vay muŋ, waɗ ngir li micay firndiw ngi Zizreyel.

⁹Ng’avi mizli ngi ruwuy Samari gar jom ti walahay naŋhaya, ng’avi mizli ngi dubazaw Zurdeŋ hã seŋseŋ a Zeruzalem, Batane, Kelus, Kades, hã a ciki mizaw ngir makway ngi Ezipte, hã seŋseŋ a Tapanes, Ramses waɗ ruwuy vay Goseŋ gar,

¹⁰nga duba Tanis ati Memfis waɗ mizli micifam a Ezipte gar, hã seŋseŋ ar makway ngi Etiyopi.

¹¹Mizli ngisi ruwuy gar, a ra hirsaka mingiɓi ngi Nabukodonozor buy ngi Asiriheye, a ngumam jum ng’avaŋ ngi gi vurumo ta, asi t’anta zluwunam di ta, amma a cicam kaŋ kaŋ avaŋ ti ˀay purla, a ɓulaka mislineye haŋ kavbar kine, mesem mesem.

¹²Nabukodonozor a ji mevel le haɗi ar mizli ngi ruwuy tayna. A hudum ti li cifi naŋ ngi buyo ati li zuma buy naŋ, ɓa a pula bol naŋ avi mizli ngi ruwuy Silisi, ngi Damas waɗ ngi Siri. Yo mizli Moˀapay, ziri ngi Amoŋhoy, mizli Zudehey ati Eziptehey keɗeɗe waɗ seŋseŋ ar makway ngi Mediterane ati mubuliy gaza na, i ngi ngizl taŋ ti maslalamay.

¹³Ti Nabukodonozor maɓula vi mukuru nga tarnaˀ naŋ ar buyo na, a cinjaham ati soje naŋhay ngi kiɗa vu ati buy Arpakzat, a lum bugawla a hirnga naŋ, a zliɗa hirnga ngi soje ngi buy Arpakzataya, misi pilisey ati misi mota ngi vurum naŋhaya mber mber cek.

¹⁴Nabukodonozor a tiɓa walahay naŋhaya, a ndil seŋseŋ a Ekbataŋ, a tuɓa hay musuburoyo, a vaka gwat ngir lumahaya, walahay mawucuɗ zleˀe tuwa, a tiri di diŋ girɓaŋ girɓaŋ.

¹⁵A ra ja buy Arpakzata ar muwã Rago, a cika gor njoŋ ti ziwiti, a tikaŋ is ngi wãˀ.

¹⁶A moko ati soje naŋhaya nga Ninivi, i zuguduw taˀ hiɗim hiɗim. A cifam akẽh, a musukom vu, a gam muguzlum ati soje naŋhaya hã hin skat ti kukur cuw.