Read South Giziga Jud 10 Bible Online

Jud 10 - South Giziga bible

Jud 10

¹A dirba Zudit mitika tila mi da Buymisemuŋ ngi Israyel, a tika mingiɓi naŋ le muduba na,

²naŋ muhuruk tuwa, a slikiɗ deŋ, a zila ngwas migi slra naŋ, a pi sar ng’ar hay naŋ macifi ara tapas hin ngi sabat ati hin ngi muguzlumoyo.

³A cuko zana ngi vagay miɓaˀ a vu vu naŋ tuwa avra, a cuko zana naŋ ngi wudiga, a bun ceɗ ceɗe, joˀ a gi mal migidaŋ mazĩˀĩ ndum, a njuro hirnga njor njor, a tuwuɗa tuwaɗ tuwaɗ ti zana, dar aka zana ngi muguzlumoy naŋ maka taŋ ti zil naŋ Manase misi ada aruŋ.

⁴A ca tarakaya, a luwa virzle naŋhay asi ˀay, a ca gwat ngi haŋhaya, dangwa naŋ, gwat ngi slimiɗey, waɗ gwat ngi wuyahaya gar, a tiri duk melef, ɓa ngi ɗiɗa mizli masa purakaŋ.

⁵A wuɗ kwenekwene ti mbaazla araŋ waɗ gojogoɗ ti mal araŋ, a wuɗ gabal ti hapa ngi daw giziŋ araŋ, maɗaf tos tos ti yi ngi widis moˀolo ara, peŋ waɗ ɗuwa mihindr’ikaŋ, a juwa gwat tayna ngiriɗ ngiriɗ kuy kuy, joˀ a zuɓa nga hirnga ngwas migi slra naŋ tuwa.

⁶A bam tir mizlingre mabi ti Betuli, a ra luma Oziyas ati mizli cuw awuzla micawwa ngir walahaya, i ti Kabri ati Karmi, a roko dedeŋ adiga.

⁷Taŋ mupurakaŋ, hiri naŋ a mbiɗi le, yo a mbiɗa zana le na, a ŋhiyaka kuy naŋ teˀe, joˀ a ɓakaŋ:

⁸«Anja Buymisemuŋ ngi dide ndrahaya, a pulukuw jiviɗ ngi luma gi mezle, yo gwat ka mujuwa ngi gi na, a gi muduba, ɓa ngi ɗuva hirnga da Israyeley waɗ ngi ga dudok da Zeruzaleme!»

⁹A dilik ngi diradibiɗ da Buymisemuŋ, dar a ɓa mizli mimakir tuwa: «Ɓam daˀ na, ɓa a wunikiy mizlingre ngir walahaya, ɓa i bi, i ra ga gwat ndra miɗiyaka ɓi naŋ ati kum tuwa.» A pulaka jiviɗ da gawlahaya, ɓa a wunakaŋ di ka naŋ miɓa na.

¹⁰A gaka kanah, joˀ Zudit a bam ati ngwas migi slra naŋ. Mizli ngir walahaya, a roko hiri taˀ avaŋ, hã a po sar ti muwã, a tuwuɗa sozo, akẽh so na, a puraka mata.

¹¹A sipa sozo silaɓɓa, soje mudumbuŋ ngi Asiriheye, a sa jam di hirngaŋ.

¹²A jakaŋ, joˀ a cufuɗakaŋ: «Ka tisi waniy ka? Ki so ti damaka? Ki ru nga maka?» A mbiɗa taŋ di: «Yi zuŋ Heber, yi kil na ti wuzla taŋ ti kil, asi a ndir mata ɓa a cam asi haŋ kum.

¹³Yi ru na nga pura Holoferne, zeneral miwa soje kumoy, ɓa i ra ɓaŋ ɓi mikaslsla, yo i sa bugaŋ jiviɗ, ɓa a tiri buy miwa li vay muwã gar, ɓa ko mbur titira mazizi loŋ asi nganaŋhay anta.»

¹⁴Mizli micinaka mingiɓi naŋ, a singilaka ng’avi hiri na, naŋ kuy teˀe, mizli tuwa a ɓakaŋ:

¹⁵«Ka mukuɗo vu ngi po sar nga pura buy ndra na, ki laha hutuŋ ɗike le. Wurenna, so ng’ar guɗuk naŋ aka, mizli asi ndra, a sa kusukuw seŋseŋ avaŋ.

¹⁶Ka misa cici le deŋ a mbuŋ Holoferne na, ko ki zluwun ta, ma hiri ngi ɓi ka miɓa ndra di ani na, naɓa a sa guw mezleŋ.»

¹⁷A wunam mizli skat asi taŋ ngi kisa Zudit ati ngwas migi slra naŋ, a ram di seŋseŋ aciki guɗuk ngi Holoferne.

¹⁸Mizli ngir walahay a kusoko tika tika timbilik a hirnga taŋ, asi a tilam mi ti so ngi Zudit le ar walahay guɗuko, a ndaham a hirnga nah ndah ndah, naɓa Zudit vuna a ro deŋ avra, a ciki guɗuk ngi Holoferne, a ra kutuko ɓa a ra ɓakaŋ ɓi nah kwaɗay.

¹⁹A ra ŋhiyaka kuy naŋ na, joˀ a ŋhiyaka mizli Israyeley asi naŋ ya, dar a ɓam ar wala taŋ: «Sukwi misi ngwas mezlehey kahana na, masa hirsa taŋ i waka? Ko a tuɓaŋ ɓa i pulam mbur Israyel pal le ti siifa ta, asi mizli mindiram le ti siifa na, a sa tikinaka mizli ngisi ruwuyo keɗeɗe.

²⁰Mijigina Holofernehey ati madiɗa ngi soje naŋhay a boko, joˀ a cam ti Zudit ng’ar guɗuku.

²¹Holoferne a ro musuk vu tup ar arngawo naŋ, asi senge mija ti gugumay mindezze, ti gugumay ngi ɓiri hirnga waɗ ɗugur meɗelek meɗelek ati ɗugur mupuɗaw puɗaway mbizeˀe mbizeˀe.

²²Taŋ miɓakaŋ di Zudit n’ada avra na, a bi nga miviŋ ngi guɗuk naŋ, gawla misi dalivu ngi ɓiri barahay sek a mbuŋ.

²³Ti Zudit mindilo a mbuŋ naŋ ati madiɗa ngi soje naŋhay na, mizli gar a ŋhiyaka mihiri naŋ. Zudit a huruk huruk a mbuŋ naŋ, joˀ gawla naŋhay a slikiɗakaŋ deŋ.