Read South Giziga Jud 11 Bible Online

Jud 11 - South Giziga bible

Jud 11

¹Holoferne a ɓaŋ na: «Tum vu tam ngwasa, ko ki zluwun ta, asi da mbur a wuɗ gi gawla ngi Nabukodonozor buy madiɗa miwi si gazlavay keɗeɗe na, yi gaŋ malambaˀa daˀ ta.

²Na wurenna, da mizli ɗikey misi tir vay muwã na, a hirsikiy zleˀe ta na, anja ani i hil gwat ngi vurumoy ng’ar taŋ ta, na i taŋ muwuɗam.

³Wurenna, inga ɓiy di so, ka mukulo tivi taŋ ng’avi ndra na, vur mike? Naŋ kine, ki so nga laha hirnga ɗiki. Tum vu tam, duvuɗ dana ki sa ndir ti siifa waɗ nga mbuŋ ma gar.

⁴Ko mbur pal masa guw malambaˀ anta, a sa gukuw mezle jaka, kaɓa magaka da gawla ngi kumani ɗu, Nabukodonozor buy madiɗa.»

⁵Zudit a mbiɗa da Holoferne: «Tuɓa mi ngi beke ɗike, anja ngwas migi slra a ɓi a mbuŋ ɗike, ɓi ya masa ɓuw di ti duvuɗ dana na, i ɓi ngi slir ta.

⁶Da ki tuɓa mi nga ya ngwas beke ɗike le na, Buymisemuŋ a sa kiɗa mi ngi slra naŋ jom ati ka, yo Bumbulvuŋ ɗo, gwat naŋ muwuɗ le ngi sa gi na, ɓa a sa gi ta na anta.

⁷I hudum ti siifa ngi Nabukodonozor, buy miwa duniya keɗeɗe, yo ti gidaŋ nga naŋ mihaɗi na, a slino ka, ɓa ngi cica gwat misi titiri gar ar jiviɗ mikslsla, mizli magam gawla naŋ na, mbele ka, anta i mizli magam gawla naŋ pal ta ma, ko gwat misãmi ngi ɓuhoy, ngi hayay ati ɗiyuw ngi ɓuhoy gar, a sa lumam siifa tisi wirwir ɗik vur Nabukodonozor ati hay naŋ gar na.

⁸Asi sin ɗik mijileŋ ati sina gwat ɗik na, i cinaka ɓi nah le, ar zuma buyo, mezle i ka pal ɗiki, a ra ɓaka ɓi naŋ asi gazlavay kurzluˀ gar, ka gidaŋ ar sina gwata, yo a ŋhiyukuw ar ɓi ngi vurumo ma.

⁹Minbiɓi Akihor miɓa ar ngilawuy ɗik na, i cinaka ɓi nah le, asi mizli Betulihey milahakaŋ na, a ɓa taŋ ɓi naŋ miɓa a mbuŋ ɗik aka na le cek ceke.

¹⁰Vurˀe buy kumani ɗu, ki zirɗa mingiɓi naŋ na ta, amma wi di vu a mevel ɗiki, asi naŋ kanah vuna gisiŋ. Asi da sukwi ndra a gi mungra avi Buymisemuŋ ta na, a kutakaŋ ti bonoyo gu ta, yo maslalam anta gaŋ gwat ta.

¹¹Na wurenna, ɓa a ɓulukuw ka buy ɗu ta, ki ndir ti gidaŋ na, muc a sa pi sar ar Israyeleye, asi mungra a ci le avi taŋ si, taŋ miki raham le kileŋ avi Buymisemuŋ taŋ gar na, a slikiɗaŋ mevel.

¹²Ani gwat ngi zum a kic le avi taŋ, yo yam a tiri le tuwaˀa. A juwaka le a mevel taŋ, ɓa a kiɗaka ginew taŋhaya ngi zum, yo gwat ɓimujuwa ngi Buymisemuŋ mitika le gar ngi zumo na, a ɗiyaka ɓi nah le ɓa a zumaka.

¹³Daw alkamari micikiɗeffe, mukuruˀ ngi mbaazla ati ngi mal taŋ miwam di vu kuy kuy ngi vul da masayay midedeŋ a mbuŋ Buymisemuŋ ndra a Zeruzalem na, a juwaka le a mevel taŋ ɓa a zumakaŋ, na ko jiviɗ n’anta ɓa mbur ngi wuzla mizli a ja haŋ ava vuna ta.

¹⁴Mizli ngi Betulihey a slinam mizli le nga Zeruzaleme, ng’avi mizli micawwa mingilawuyoy, ɓa a pulaka taŋ jiviɗi, asi taŋ ngi Zeruzalemey vuna, a ngilaka ɓimuɗuva hana le si.

¹⁵Tapas mizli ngi Zeruzalemey misa pulaka taŋ jiviɗ le, a zumaka le na, naɓa Buymisemuŋ a vuluw taŋ le asi haŋ ɗik ɓa ki ziza taŋ.

¹⁶Ya ngwas migi slra ɗik mukulo tivi taŋ na, asi i sina ɓi hana le ceke. Buymisemuŋ a slino ya ng’avi ka, ɓa gwat mizli ngi duniya keɗeɗe misa cinaka ɓi nah le, a zuma taŋ hirnga le na, i gaka ati ka.

¹⁷Asi ya beke ɗik na, yi ngwas mazluwun ti Buymuŋ, duvuɗ ti papas gar, i ra dir dibiɗ da Buymisemuŋ. Zle dana, i sa ndir a ciki ɗiki kumani ɗu, ya beke ɗike, i sa bi ti duvuɗ ng’ar heleleŋ, joˀ i ra diradibiɗ da Buymisemuŋ, da a gaka mungra taŋ na le na, a sa ɓiy di.

¹⁸Ya kwana i sa fuw ɓi nah ya, joˀ ki sa bi ti soje ɗikeye gar, naɓa ko mbur masa ndir ti siifa loŋ asi Israyeley anta.

¹⁹A dirba nah, i sa kisuw, i ngiraka ruwuy Zude ŋkaak hã seŋseŋ a Zeruzalem, i sa ɗuvuw janga ɗike taˀ a wuzla walahay, joˀ ki sa ɓula taŋ kaɓa maɓulam tunuŋ manja mijiginey, ko kiri ŋwew masa wuduw anta. Asi Buymisemuŋ a ɓiy di le, a tiliy di mi le daf dumbuŋ, a slino ya na, ɓa i suw ti ɓi nah.»

²⁰Mingiɓi ngi Zudit na, a cira hiri le da Holoferne ati madiɗa ngi soje naŋhaya, a ŋhiyaka sin naŋ mijileŋ na le, joˀ a ɓam:

²¹«Kuy ngi hiri naŋ ati mingiɓi naŋ ngi lesl naŋ maɓa na, gun gun si diˀis keɗeɗe, ko ngwas mindil n’anta.»

²²Holoferne a ɓaŋ: «Buymisemuŋ mislino ka ng’aka, kileŋ avi mizli ɗikey na, ɓa i lum bugawla, yo ɓa mizli mihirsaka buy ɗu na ya kwana, a zizam.

²³Naka vuna, deŋ ɗike kuy haɗi, yo ki sina ɓiɓi le ma. Da ki ga le kaɓa ka miɓa na, naɓa Buymisemuŋ ɗiki a sa tiri Buymisemuŋ ɗu, ka vuna ki sa ndir a hay Nabukodonozor, joˀ slimiɗ ɗik a sa zil asi ruwuy gar.»