Read South Giziga Jud 12 Bible Online

Jud 12 - South Giziga bible

Jud 12

¹Holoferne a ɓi ɓa a cam ti Zudit ng’ar li zum naŋ, misi taasa ngi ɓiri barahay. A ɓi ɓa a vulakaŋ gwat ngi zum ati gwat ngi si misi purla ati nga naŋ.

²Amma Zudit a ɓaŋ: «I zuma gwat ɗike ta, vur ya mazluɓ ɓi a mbuŋ Buymisemuŋ ɗu, gwat ya muso di ngi zum vuna, naŋ muk ti ya si»

³Holoferne a ɓaŋ: «Da gwat ngi zum ka muso di vuna, a tiki le na, i sa lumoko gwat ngi zum misi kanah, ɓa i vulukuw di na amaka? Asi muy ɗik anta loŋ a wuzla ndra aka ta.»

⁴Zudit a ɓaŋ: «Kaɓa ka misi ti siifa gisiŋ na buy, naŋ kanah ya, ɓa hã i ra tika gwat ngi zum ya muso na tikeˀe na, naɓa Bumbulvuŋ a ga gwat naŋ mawuɗ a ga tisi ya na le si.»

⁵Madiɗa ngi soje ngi Holofernehey a cam di ng’ar guɗuku, a hinje hã wuzla duvuɗ. A sa slikiɗ weˀe avi li.

⁶A slin ng’avi Holoferne ɓa a ɓakaŋ: «Inga pula beke ɗike a bi nga diradibiɗ takwa buy.»

⁷Dar Holoferne a ɓa gawla naŋhaya daˀ daˀ le, ɓa anja a tikakaŋ ngi be ta. A gi hin makir ar walahay guɗuko. A bi ti duvuɗo ng’ar heleleŋ ngi Betuli, dar a bun ar miviɗiviɗi ngi yam adiga.

⁸Da Zudit a ra bo tir yama na, a diradibiɗ da Bumbulvuŋ Buymisemuŋ ngi Israyele, ɓa a jinaŋ ngi laha mizli naŋhaya.

⁹Da naŋ mubun le, a mo le nga haya na, a ndir asi guɗuko hã ng’avi pastaˀa, joˀ a rakaŋ ti gwat ngi zumo ng’adiga.

¹⁰Ar hin mumufaɗ naŋ na, Holoferne a di ɗaf ngi muguzlum da gawla naŋhay keslsle. Ko a zilo buy ngi soje ta.

¹¹Holoferne a ɓa gawla naŋ Bagowas, mbur munguɗo misi gwat naŋhay gar asi haŋ naŋ, a ɓaŋ na: «A ru ng’avi ngwas Yude na, a ra ko mi naŋ, ɓa a so nga ciki ndra aka, ɓa a zum, a si gwat ati ndra.

¹²Da i pulaka ngwas naha le manja i hinam di na, naɓa i mesem avi ndra. Da i koko mi naŋ ta na, a sa singir ar ndra.»

¹³Bagowas a bi tisi guɗuk ngi Holoferne, a ci nga hay Zudit, joˀ a ɓaŋ: «Ngwas mukuy haɗi, anja ki wuluk cuw cuw ngi ru ng’avi buy ɗu ta, a ru ɓa a ɗuvukuw hirnga a mbuŋ naŋ, ki sa si mbaazla ati ndra ti mumul, dana ki sa tiri kaɓa ziri diyli Asirihey misi a hay buy Nabukodonozor.»

¹⁴Zudit a ɓi: «Yi wa ɓa i zirɗa mi ngi buy ɗu ka? Gwat maciraŋ hiri gar na, i sa ga ti wusa vu, a sa gi avi ya, i ngi mumul di hã pam.»

¹⁵A slikiɗ, a ka zana naŋ ati gwat ngi wuya ngi ngwasaya. Beke naŋ a ra ciyaŋ garak Bagowas muvulaŋ di ngi zik ti hin gara, cay a ruwuy, hiri taˀ ar Holoferne, ɓa Zudit a ra ginisl ginasl ara ngi zum.

¹⁶Zudit a ci, a ginisl ginasl a ruwuyo, a zliɗa lesl ngi Holoferne le biliyah, membezleŋ ngi vu naŋ a wus jaɓ jaɓ ng’ara. May naŋ a ra gaŋ zer zer ɓa a zliram. Diga hin naŋ mupura keɗ na, a ra sipi pas zliv ɓaka mi naŋ gu.

¹⁷Holoferne a ɓa Zudit tuwa: «Si gwat, yo mumul ati ndra.»

¹⁸Zudit a ɓaŋ: «I sa si gwata buy ɗu, asi diga miyikiy cak na, ko i lum ɗuva hirnga misi ka nga dana na daˀ ta.»

¹⁹Gwat ngwas migi slra naŋ miwaŋ di vu tuwa, Zudit a zuɓa, a zuma a mihiri ngi Holoferne.

²⁰Zudit a cira hiri le haɗi da Holoferne, joˀ Holoferne a sa mbaazla kuɓoc kuɓoc. Diga miyakaŋ caka, ko a si mbaazla daˀ ka ngi pas nah ta.