Read South Giziga Jud 13 Bible Online

Jud 13 - South Giziga bible

Jud 13

¹Hiikuɗ maji muduba na, gawla ngi Holofernehey a wusam vu ngi cuh le. Bagowas a waha mizli misi akẽh, a gica miviŋ ngi guɗuk ngi buy naŋ Holoferne tiavra, joˀ a ra hinam tup tup. Naŋ kine, taŋ gar a giram le, asi a sam mbaazla le haɗa.

²A pulam asi guɗuk ngi Holoferne, sey Zudit pal naŋ, Holoferne a ro gilɓaɓ ar arngawo naŋ, asi mbaazla a waŋ le tulus wãˀ.

³Zudit a ɓa beke naŋ tuwa, ɓa a bi tir vin ngi hine, a ra cici a avra, ɓa a jigina li, ɓa Zudit a bi nga diradibiɗ ka naŋ maga ŋhoyyo. A ɓa Bagowasakanah ma.

⁴Mizli a bam tir vin ngi hine cek, zuŋ a sin ta, mbur madiɗa a sin ta. Zudit a cici deŋ a ciki arngawo ngi Holoferne tuwa, a ɓi ti kwacay naŋ na: «Bumbulvuŋ, Buymisemuŋ misi gidaŋ wãˀ, angi ler mesenna, inga pura slra ɗu ya maga ngi ɗuva hirnga da Zeruzalem na.

⁵Asi pas naŋ a ndila le wurenna, ɓa ki ki slimiɗ ar mizli ɗikeye, ɓa ɓi ya mujuwa a mevel ɗu, ngi ngurfo mesene ndrahay mislikiɗam ng’ar ndra na, i kiɗa mi naŋ wãˀmuduba.»

⁶Akẽh Zudit tuwa, a kuroho ng’avi ɓiri ngi arngawo, migweˀ avi hirnga ngi Holoferne, a muɗa maslalam naŋ tehhe.

⁷A kirih ki rah ng’avi arngawo, a jaŋ himac ngi hirngakaw, joˀ a ɓi: «Bumbulvuŋ, Buymisemuŋ ngi Israyel, inga vuliy gidaŋ ar hin hana takwa.»

⁸A mbura vu mbar, a maŋ ngum ti maslalama is cuw asi ˀaya, joˀ a bukoŋ hirnga kpaŋ wãˀ.

⁹A gidigila dum vu naŋ ng’asi arngawo, a kurto senge misi avi li luw naŋ kurut kurut. A zik neˀ na, a bo ti hirnga ngi Holoferne tuwa, a vula da ngwas migi slra naŋ.

¹⁰ngwas tuwa kwana, a ɗumo cisl ng’ar gabal jiɗe misi gwat ngi zum naŋ angaŋ. Dar a boko jiraˀ cuw taŋ arleˀe nga diradibiɗe kaɓa taŋ magaka ŋhoyyo. A tuwuɗaka walahay guɗuko, a gunom gun a duba hurjijiŋ, a jiɗam nga muwã Betuli, a ndilam a mizlingreŋ.

¹¹Zudit a tila mi da mijigina mizlingreheye diga naŋ misi kileŋ: «Wunakaŋ, wunaka mizlingre kutum. Buymisemuŋ, Buymisemuŋ ndra n’ada ati ndra, a ra buga wirwir naŋ da Israyel, a ra buga gidaŋ naŋ ar mesene ndrahaya, kaɓa naŋ mubuga dana ani na.»

¹²Akẽh, mizli ngir walahay naŋ micinaka ˀay naŋ na, a pam sar kutum nga mizlingre ngi walahay taŋ, a ziloko mizli micawwa ngir walahaya.

¹³Mizli gar a kiloko, diga ziri memeɗehey hã avi mizli madiɗahay, asi mo naŋ na, a zuma taŋ hirnga le. A wunaka mizlingre, a tuɓaka taŋ mulaka, a bulam vu ngiɗ ɓa li a pur, a gunom a hirnga taŋ gun.

¹⁴Dar Zudit tuwa a ɓa taŋ ti gidaŋ: «Hunumaka Buymisemuŋ. Hunumakaŋ. Hunumaka Buymisemuŋ mupula pura ircece da Israyeley mbak le ta, a ngurfo mesene ndrahaya le ngi duvuɗ dana tisi haŋ ɗo.»

¹⁵A dirba nah, A bo ti hirnga ngi Holoferne tuwa tir gabala, joˀ a ɓa mizli: «Hirnga ngi Holoferne, zeneral ngi soje ngi Asirihey tuwa n’ani, yo senge naŋ miwi tup aseˀe tuwa kwana, n’ani ma. Bumbulvuŋ a kiɗa le ti haŋ nga ya ngwasa.

¹⁶Kaɓa Bumbulvuŋ misi ti siifa, naŋ mijiginiy ar jiviɗ ya muzuɓa na, kuy ɗu a tikina Holoferne le, ɓa a zizaŋ manja i gam mungra, vur naŋ maciy ar dili, yo mapiy mesem.»

¹⁷A zuma hirnga le wãˀ da mizli gar, a guɓom guɓ guɓ, a diram dibiɗ da Buymisemuŋ ti ˀay purla, a ɓakaŋ na: «Yawwa Bumbulvuŋ ndra, nga dana, ka miga mesene ngi mizli ɗikeye geˀgeˀ kiɗip na, i gukuw sise.»

¹⁸Oziyas a ɓa Zudite na: «Anja Buymisemuŋ mifineˀ gwat gar, a ɗuwuluw mi fineˀ ngwasay misi ar duniya keɗeɗe na zuŋ ɗu. Sise da Bumbulvuŋ Buymisemuŋ miga muŋ ati ruwuy, naŋ mikisuw nga buko hirnga ngi buy ngi mesene ndrahay na.

¹⁹Naŋ kine, ɗuva wuluk ɗik mitaˀ na, mizli anta sa puyukom di hirnga ta ndidaˀwãˀ, a sa wulkam keŋ ar wirwir ngi Buymisemuŋ hã ngi sete.

²⁰Anja Buymisemuŋ a guw ɗongor ngi caˀ, yo a sirtuw ti gi mezle naŋ, asi ka mupula siifa ɗike mbak vur mapaka mesem da sukwi ndra, amma ki cici le kaŋ kaŋ ɓa i zizam ta, ki ru cir cir a mbuŋ Buymisemuŋ ndra.» Joˀ mizli gar a ɓam: «Anja kine! Anja kine!»