Read South Giziga Jud 14 Bible Online

Jud 14 - South Giziga bible

Jud 14

¹Zudit a ɓa taŋ: «Inga cinikiy di ɗi sukum ɗuwoy. Zuɓaka hirnga ngi Holoferne, a ra ngaka kaˀ a hirnga mohol.

²Ti miprik prik, pas misa bo le ndurro so na, mbur gar a sa zuɓa gwat ngi vurum naŋ. Mizli mupuɗaw puɗawaya, a sa bam tir walahaya. Wunam buy soŋ asi kumo, gam kaɓa ki ra pam sar ng’ar li micay, cir ng’ar li cici mudumbuŋ ngi mizli Asirihey, amma ki pam sar ta ɓula.

³Soje Asirihey a sa hilaka gwat ngi vurum taŋhaya, a sa kilam kutum ng’ar li pisar taŋ, nga puɗuko zeneral ngi soje Asirihey, zeneralay kwana, a sa kilam ng’ar guɗuk ngi Holoferne, amma t’anta sa lumakaŋ ti siifa ta. Dar zluwun a sa ga taŋ, joˀ a kilam kileŋ avi kumo.

⁴Kum ati mizli Israyeley gar, ki sa gidiɗaka taŋ, ki sa kiɗaka taŋ a jiviɗi.

⁵Amma ɓa ki sa gam kanah na, inga zilikiy Akihor mbur Amoŋ na ɗagay, ɓa a pura, a sina mbur mihirsa Israyel, naŋ mislino di nga muc ati ndra tuwa.

⁶A ziloko Akihoro ti hay Oziyasa. Naŋ mindilawa, keɗ na, hirnga ngi Holoferne kaw a haŋ mbur, a wuzla mizli micikilama, a diɗ kuɓ, sumtraˀ.

⁷A slikiɗakaŋ na, a diɗ ng’asi sar ngi Zudit, a huruk huruk a mbuŋ naŋ, joˀ a ɓaŋ: «Anja Buymisemuŋ a ɗuwuluw mi a wuzla mizli Yudehey gar! Sukwi ngi mizli gar misa cinam ɓi ɗik le na, a sa zliɗa taŋ lesle.

⁸Wurenna so na, inga slifiy gwat ka miga ar hin hana gar: Dar Zudit a slufaŋ di cek cek a wuzla zuguduwo, zle avi hin naŋ mibi tir walahay, hã a ndila hin naŋ maslufa taŋ ɓi vuna.

⁹Naŋ mikiɗa mi ngi slufa taŋ ɓi na, mizli salalay, salalay a zuɓa walahaya huɓuk huɓuk.

¹⁰Gwat Buymisemuŋ ngi Israyel miga, Akihor mupura keɗ keɗ na, a tuɓa Buymisemuŋ ti gidaŋ wãˀ, a cakaŋ a mizaw, joˀ a ci ng’asi Israyeley hã dana.

¹¹Li muwun muduba na, a ngaka hirnga ngi Holoferne tuwa kaˀ ar mohol. Akẽh na, mbur gar a zuɓa gwat ngi vurum naŋ, joˀ a bam ti ngay ti ngay ng’ar muzugudum ngi muwã.

¹²Mizli Asirihey mupuraka taŋ na, a slinam nga ɓa ɓi naŋ da madiɗa ngi soje taŋhay, taŋ kwana, a ram ti ɓi naŋ ng’avi zeneral taŋhay, ng’avi kolonel taŋhay ati Komandaŋ taŋhaya ya.

¹³Aram ng’ar guɗuk ngi Holoferne, a ɓaka ɓi naŋ da Bagowas miji kaw naŋ, a ɓakaŋ na: «A ra puɗuko buyo, asi mizli beke tayna, a zlam ɓi le ngi po sar nga kiɗa vu ati ndra, i sa ngizlaka taŋ talalaˀ wãˀ.»

¹⁴Bagowas a ci ng’ar guɗuko, a kiɗa haŋ avi miviŋ, asi a pura na, kaɓa Holoferne a roko sluruɓ ati Zudit.

¹⁵amma ko mbur mumbuɗaŋ di anta, a nguya zana minjar avi miviŋ ngway, joˀ a ci nga viŋ ngi hin tuwa, a ra luma vagay naŋ ɓaˀ ar janga, hirnga i mubuko le.

¹⁶Bagowas tuwa a hiziga widi, a kuɗuma tuwuy, a hislik, mbak widi ti gidaŋ, dar a ngira zana naŋhaya.

¹⁷A ci ng’ar guɗuk Zudit mahin ara na, a luma ta. A wuso vu ng’avi mizli ti widi, a ɓa taŋ:

¹⁸«Bekehey tuwa a slikiɗam ɓi le, ngwas Heber purla a pa mesem le da buy Nabukodonozoro. Puraka Holoferne a ro ɓaˀ a ruwuy manja hirngaŋ.»

¹⁹Buy Asirihey micinaka mingiɓi hana cin na, a ngiraka zana taŋhaya, a zliɗa taŋ lesl le wãˀ. A zlaka widi, a tuwam cərəw cərəw, tuwuy taŋ a zuɓa walahay guɗuko ngiɗ ngiɗ.