Read South Giziga Jud 15 Bible Online

Jud 15 - South Giziga bible

Jud 15

¹Soje Asirihey misi asi guɗuko, micinaka labara nah cin na, a muɗa taŋ membezleŋ le haɗi.

²A jijikam kirkir ti zluwuno, ki pur mbur deŋ a ciki cala ta, a waham ngbuw gajagaɗ gajagaɗ, a zliɗam hirnga mber mber ng’ar li micay waɗ ng’ar vay muwã.

³Mizli micifam zleˀe tir vay muwã a ciki Betuli tuwa kwana, a kilam le ya. Akẽh so na, mizli mupuɗaw puɗaw ngi vurum ngi wuzla Israyeley gar, a njikam njak asi taŋ.

⁴Oziyas a slin mizli nga Betomestayim, nga Bebay, Koba, Kola waɗ ng’asi ruwuy Israyel gara si, ɓa a ɓaka ɓi ngi gwat migi hana, yo a cufuɗa taŋ, ɓa a zliɗam hirnga ɓaˀ li ngi sipa mesene taŋhaya, ɓa a ngizlaka taŋ.

⁵Taŋ micinaka labara nah cin si na, mizli Israyeley a bam tul gar, a diɗam vu kuvbum ar taŋ, a ngizlaka taŋ hã seŋseŋ a Koba. Mizli Zeruzalemey a ndiloko ya, waɗ mizli vay muwãhaya cek cek, asi gwat migi ar walahay guɗuk ngi mesene taŋhay na, a tilaka taŋ di mi le. Mizli Galaˀatay ati Galileheye, a zlaka kiɗ taŋ tir cakay taŋ makilama, a kiɗaka taŋ sunok sunok hã seŋseŋ a Damas ati prok naŋhaya bal bal.

⁶Is ngi mizli Betuliheye, a diɗam vu kuvbum ar walahay guɗuk ngi Asiriheye, a vaka gwataya, a hilam di i zlili ngi jalaɓi ta.

⁷Mizli Israyeley mumoko tir li kiɗa Asiriheye, a hilaka is ngi gwatay mindirama. Mizli ngir walahayay ati muhuf ngir vay muwã ati ngir li micaya, a hilam gwat ngir vurumo haɗi, asi zlili naŋ haɗi wãˀ.

⁸Zoˀakim masay madiɗa waɗ mizli micawwa mingila wuy ngi Zeruzalemeye, a soko nga pura zlili Bumbulvuŋ muvula da Israyel, nga pura Zudit waɗ ɓa a jakaŋ haŋ.

⁹Taŋ micam kulaˀ nga hay Zudite na, a ɗuwulakaŋ mi gar taŋ arleˀe, joˀ a ɓakaŋ: «Maga ɗongor da Zeruzalem, maɗuva hirnga da Israyel i ka, yo sukwi ndra majijih gar na asi ka.

¹⁰Miga gwat tayna gar i ka, ki ga mezle le da Israyele, yo a cira hiri le da Buymisemuŋ. I gukuw sise tisi Bumbulvuŋ misi gidaŋ wãˀ ngi sete.» Dar mizli a ɓam: ‹Anja kine.›

¹¹Israyeley gar a gam hin kukur makir ar li hila gwat ngi Asiriheye. Guɗuk ngi Holoferne, gwat ngi ɓiri barahay gar, arngawo naŋhay, taasa naŋhay waɗ gwat naŋhaya gar, a vulaka taŋ da Zudit. Zudit a hila taŋ a duba zungu pilis naŋ mongoso, a hila is naŋ caɓ caɓ ar mota ngi pilisey, joˀ a ɗiɗakaŋ di.

¹²Ngwas Israyeley gar a kiloko nga pur naŋ, joˀ a ɗuwulakaŋ mi. Mekelemey asi taŋ a hunumakaŋ ti dimisi. Zudit a wuɗ kalaf ndiɗaŋ a haŋ, joˀ a vula da ngwasay maki sa kaŋ na.

¹³Naŋ vuna tahaŋ naŋ ati ngwas ngi seˀeheye, a tuwuɗaka hirngahaya tuwaɗ tuwaɗ ti kalaf ngi tutumbur, Zudit a ki ɓaˀ a mbuŋ mizli gar, ngwasay gar a roko hiɗim hiɗim aseˀe. Mizli Israyel mizilehey gar, vu kaˀkaˀ ti gwat ngi vurumoy, hirngahaya tuwaɗ tuwaɗ ti kalafa, a ra sipakaŋ ti dimis.

¹⁴Akẽh so na, Zudit a zuɓa dimis ngi gi sise awuzla Israyeley gar, joˀ mizli gar a tuɓaka dimis ngi hunuma vu nah ti gidaŋ.