Read South Giziga Jud 16 Bible Online

Jud 16 - South Giziga bible

Jud 16

¹Zudit a zla dimise na: «Boko ti ˀay ngi dimis da Buymisemuŋ ɗu, asi badaka, hunumaka Bumbulvuŋ ti dimis asi jãwjãw, hunumakaŋ ti dimis jakaŋ salalay, zilaka slimiɗ naŋ.

²Asi Bumbulvuŋ i Buymisemuŋ matika vurumoy, a tuɓo ya le tisi haŋ ngi mizli maɓulikiy, a cifiy joˀ ar walahay a wuzla mizli.

³Soje Asirihey a soko tir vay muwã vay muŋ, sojehey sikiniy, a slufam ta, sikiniy taŋ a tika mekepele, yo misi pilis taŋhaya, a sirtaka ɗigaraya sirit sirit.

⁴A wuɗam zleˀe ɓa a ɗuvaka vu da ruwuy ndra, a ngizlaka ziri gawla ndrahay ti maslalam, a buɗuslaka ziri gaza ndrahay da ruwuy, a hilaka ziri ndrahaya ng’ar beke, yo ɓa a hilaka ziri diyli ndrahaya.

⁵Bumbulvuŋ misi gidaŋ wãˀa, a tika taŋ le ti gidaŋ ngi ngwasa.

⁶Mikiɗaka bugawla taŋ i gawlahay ta, i mizli misi gidaŋhay mikiɗaka ta, anta i mizli suburohoy mikiɗaka ta ma, amma i Zudit, zuŋ ngi Merari, migaŋ dungurvuy ti kuy naŋ.

⁷A cuko zana naŋ ngi wudiga, ɓa ngi laha Israyel magi bonoy na. A ga urdi da hiri,

⁸a juwa ngwic hirnga wak ti gabaga, joˀ a ki rop ngi gugumay mislirkeɗ, ngi ka mi ngi zenerala.

⁹Tarak naŋ a ga zenerala kuyyo ngi puro, kuy naŋ a ci le a mevel naŋ. maslalam a bukoŋ hirnga.

¹⁰Mizli Persehey a jijikam asi wirwir naŋ, yo tumo vu naŋ, a ga zluwun le da Mediheye.

¹¹Akẽh na, sukwi ndra mahin hirnga tuwa, a hiziga widi ngi vurum, joˀ Asirihey a zluwunam. Sukwi ndra mihĩya tuwa, a hiziga widi, joˀ a muɗa taŋ didaka. A zuɓaka ˀay a muŋ, joˀ a zliɗa taŋ lesle.

¹²Mizli taŋ mapuraka taŋ hiris le tuwa, a zligaka taŋ le gor njoŋ gor njoŋ. A gaka taŋ waˀa ngi muc ngi muc, a tiram kaɓa kaɓa mihĩyahay. a zizam le ar vurum ngi Bumbulvuŋ ɗu.

¹³I sa hunuma Buymisemuŋ ɗu ti dimis nawayaŋ, Aw Bumbulvuŋ ɗu, ka gidaŋ, yo ka dudoko, gidaŋ ɗike naŋ himaˀ, ko mbur matukuw ˀay gu anta.

¹⁴Anja gwat ka miga gar, a gi gawla ɗiki, asi ki ɓi daˀ si na, gwatay a gam le. Ki slono ˀUf ɗiki, joˀ a ɗiya taŋ. Ko mbur macici kaŋ kaŋ avi mingiɓi ɗike gu anta.

¹⁵Muŋwahay mupurukuw le keɗ na, a luwuslam joˀ a jihiɗam ati yam ngir mubuliy. Gidigil muwãhay a sa luwuslam a mbuŋ ɗike kaɓa tebeɗe. Amma ki ndir ka jeŋŋe avi mizli mazluwunam ti ka.

¹⁶Asi mikuli gar na, i gwat meciɗek lambaˀ, ko a ndiluw ngi zĩˀĩ ndumo ta, yo useˀ misi mala, i gwat ngatara lambaˀ, a ndila ɓa a zlumukuw di zlam zlama ta. Amma mbur mazluwun ti Bumbulvuŋ na, a ndir i mbur madiɗa ndrehhe.

¹⁷Sukwi ngi mizli mawuɗam gi vurum ati mizli ɗuwoy na, i bonoy avi taŋ! Bumbulvuŋ misi gidaŋ wãˀa, a sa pula cuwal taŋ tapas hin ngi kiita, a sa pa taŋ vu ati mumuyuŋhoy, ɓa a zumaka taŋ. A sa ndiram ar li tuwuy ti bonoy hã ngi sete.»

¹⁸Ti taŋ mindilam a Zeruzalem na, a dilikam a mbuŋ Buymisemuŋ, yo a dirba mizli muzuɓaka dili taŋhay avra muduba na, a gaka mikuli taŋ mizlam zlamay, mikuli ngi mongoyoy waɗ a vulaka gwat ngatara taŋhaya.

¹⁹Gwat ngi Holofernehey, mizli muvulaka taŋ da Zudit tuwa, Zudit a vula ng’ar hay ngi Buymisemuŋ. Senge naŋ muzuɓa da naŋ ar vin ngi Holoferne na, Zudit a vula da Buymisemuŋ, kaɓa i gwat mulumo di ar vurum, mihĩˀĩ ngi vul da naŋ.

²⁰Mizli gar a gam kiya makir ar li mumul a Zeruzalam, a mbuŋ li mipala , Zudit n’ada ati taŋ.

²¹A dirba hin tayna na, mbur gar a mi nga ruwuy naŋ nga ruwuy naŋ. Zudit a mi nga Betuli, a ra cifi joˀ ar hirwuy nganaŋ. Ti na na, slimiɗ naŋ a zil kaˀ asi ruwuy gar.

²²Mizli haɗi a ŋhiyakaŋ ngi ngwasa, amma ar siifa naŋ gar, diga zil naŋ Manase mumuc pam waɗ dak dak na, ko a ngum zuɓa zile mata.

²³Zudit a ra gi madangwas, a ra lum dudok ti gidaŋ, a gi gal ar hay ngi zil naŋ, hã vi skat ti zlum. A pula ngwas beke naŋ diimu, joˀ a muc a Betuli. A dikakaŋ ar zivi ngi zil naŋ Manase.

²⁴Mizli Israyeley a gaka vagay naŋ hã hin tarnaˀ. Ti Zudit mawuɗ a muc na, a wunuka zlili naŋ da muy migweˀ gweˀ ngi zil naŋhay ati migweˀgweˀ nga naŋhay.

²⁵Ti Zudit misi ar siifa aruŋ na, ko mbur maga zluwun da Israyeleye anta mata, yo hã a zikam haɗi manja zluwun a dirba muc naŋ ma.