Read South Giziga Jud 2 Bible Online

Jud 2 - South Giziga bible

Jud 2

¹Ar hin mukukur cuw ti cuw naŋ ngi kiya mudumbuŋ, ti Nabukodonozor maɓula vi mukuru nga dangafaɗ naŋ ar buyo na, a boko ti ɓi ngi pula cuwal asi ruwuy keɗeɗe gar, kaɓa Nabukodonozor buy ngi ruwuy Siri miɓa ɓi naŋ zleˀe tuwa.

²Nabukodonozor a zila madiɗa ngi soje naŋhaya gar waɗ mizli madiɗahaya gar, a ngilam wuy yaŋŋa ar wala taŋ, bonoy naŋ mujuwa ngi gi asi ruwuy gara, a bo di ti mi naŋ.

³A puraka na, ko waka gar mutuɓa mi ngi Nabukodonozoro ta na, a tuɓaŋ le ngi kiɗa vagay.

⁴Akẽh, taŋ mikiɗaka mi ngi ngila wuyo na, Nabukodonozor buy ngi Asirihey a zila Holoferne, zeneral, buy ngi wuzla soje naŋhaya, i mijingaˀ nga naŋ ar zuma buyo, a ɓaŋ na:

⁵«Ya buy madiɗa, kumani miwa si ruwuy keɗeɗe gar, i ɓuw na: Ki sa bi tivi ya ti ka, ki sa hil mizli gambara misi saray, durmuk skat ti kukur cuw, pilisey sikeɓ sikeɓ, waɗ mukukuro pilisey, durmuk kuru nga cuw.

⁶Ki sa ru nga zla ruwuy misi tisi pas ngi pastaˀa gar ngi kiɗa vu, asi a tuɓaka mi ngi balam ɗu ta.

⁷Ara ɓa taŋ ɓa a wikiy vu ti ruwuy waɗ yam, asi i ra bi ti mevel fõh fõh ng’ar taŋ, soje ɗuwoy asa tislaka ruwuyo keɗeɗe, i sa vula taŋ ruwuyo, ɓa a vaka gwat ngirahaya.

⁸Misi waˀa taŋhay, a sa nahaka hurjijiŋheye ndus ndus, mi ngi mizaway ati mizawaya, a sa naham hã a muŋ, ti vagay taŋhaya.

⁹Beke ya masa ja taŋ, i sa ru taŋ hã seŋseŋ asi ruwuy mira kuɗo mi.

¹⁰Naka na Holoferne, a ra tuɓa ruwuy taŋhaya ti slimiɗ ɗu, a sa ram ng’avi ka, ki sa wiy taŋ vu weˀ ngi kutuko hin ngi kiita.

¹¹Micina mihey ta na, pura taŋ bleŋ bleŋ, pula taŋ mbak a ngizlaka taŋ kuɗup, yo hilaka gwat ngi hay taŋhay asi ruwuyo gar.

¹²Kaɓa ya misi ti siifa gisiŋ na, ti gidaŋ ngi zuma buy ɗu, i ɓa le, i sa ga tahaŋ ɗu.

¹³Naka so na Holoferne, ki sa ngil mingiɓi nga ya buy ɗike, ko pal le ta, amma ki sa ga taŋ cineˀe kaɓa ya micicuw ɓi nah, yo ga taŋ kutum.»

¹⁴Holoferne a bo ti hay buy naŋ, a zila yarmahay, zeneralay ati madiɗa ngi soje ngi Asiriheye gar.

¹⁵A slufa mizli mindilaka le ngi gi vurumo, kaɓa buy miɓaŋ di tuwa, soje durmuk skat ti kukur cuw, waɗ misi gulumoy durmuk kuru nga cuw, gilaˀgilaˀ ar pilisey.

¹⁶A cinjaha taŋ cinjah cinjah, kaɓa macinjaham mizli ar vurum.

¹⁷A hil zlogomohoy, zunguhoy waɗ zungu ɓuhoy mbeˀmbeˀ ngi jijira taŋ gwataya. A vula taŋ tumuŋhoy, slahay waɗ ˀaway sikeɓ sikeɓ ngi zumo.

¹⁸A wam vu ti gwatay haɗi vur soje gar, a waka taŋ vu ti ɓiri hirnga waɗ ɓiri bara haɗi ngi wuruk taŋ, a boko di tir zlili ngi hay buy.

¹⁹Holoferne a bam ati soje naŋhay gar ɓa a ram dumbuŋ ar buy Nabukodonozoro, ɓa a tislaka li vay si pas ngi pastaˀa kurzluˀ ti mota ngi vurumoy, ti misi pilisey waɗ ti gaw misi saray.

²⁰Mizli a ram kirmiɗ kirmiɗ asi taŋ kaɓa jaray, sikinih kaɓa muyuŋ a wuzla ɓuh mikirɗak kirɗak, asi taŋ haɗi, a slufam ta.

²¹Aram zar avi Ninive, a gam hin makir ar li ru kini ng’ar li micay ngi Bektilete, a ram ti ŋkeh, a ra pam sar gweˀ a ciki muwã misi tir vay gula ngi Silisi vay muŋ.

²²A hila soje naŋhay gar, misi saray, misi pilisey, waɗ misi mota ngi vurumoyo gar, a kiraham ti ŋkeh ng’ar li vay muwã.

²³A kiɗa mizli ngi ruwuy Put ati Lut, a vaka gwat ngi ziri ngi Rasisey ati ngi Ismayeley mipam sek duba cakay ati wuzla ɓuh mikirɗak kirɗak, ng’ar vay ruwuy ngi Keleyoŋ na.

²⁴A tuwuɗa mizaw Efrata, a ngira Mezopotami ŋkaak, joˀ a ra musukuɗo walahay muguno ti moholoy misi ar sozo ngi Haboro, hã a ndil seŋseŋ a ciki mubuliy.

²⁵A tuɓa ruwuy ngi Silisiheye, mizli micicam le kaŋ kaŋ na, a nguma taŋ meɗ meɗ, a ru seŋseŋ a ruwuy Zafet, misi tir vay ruwuy, sek duba cakay ati Arabi na.

²⁶A ndahaka hirnga ngi ziri ngi Madiyanaya kucuwul, a wuraka walahay guɗuk taŋhaya, a cohom ti ginew taŋhaya neneh.

²⁷Hirak ngi sifi ngi alkamari mana, a pi sar ng’ar li micay ngi Damas ma, a wura guva taŋhaya cek cek, a pula a kiɗaka tumuŋhoy ati sla taŋhaya pay pay, a vaka gwat ngir walahay madiɗahaya, a hiryaka taŋ gwat ngir guvahaya, a kiɗaka gawla ati diyliheye ti maslalam.

²⁸Akẽh na, mizli ngi ciki mizaw Mediteraneheye, ngi Sidoŋhoy ati ngi Tirey, ngi Suroy ati Okina, waɗ ngi Zamniyahaya gar, ngi Asdotoy ati ngi Askaloŋhoyo, zluwun a ga taŋ, a jijikam deŋ.