Read South Giziga Jud 4 Bible Online

Jud 4 - South Giziga bible

Jud 4

¹Nabukodonozor buy ngi Siri, gwat Holoferne zenerel naŋ miga da sukwi ngi mizli, naŋ miva gwat ngir hay Bumbulvuŋ taŋhay, yo mbak mizli a wahaka hay ngi Bumbulvuŋ taŋhaya gar na, Israyel ngi Yudehey a cinaka ɓi nah le.

²A ga zluwun le da Israyeleye haɗi, yo didak a ra muɗa taŋ vur Zeruzalem ati hay ngi Buymisemuŋ taŋ.

³Asi taŋ mumoko tir beke, yo taŋ micikilam hirnga a Yude na, a zik t’aruŋ. Hay ngi Bumbulvuŋ, gwat ngi slrahay ati li gi mikuli, migam taŋ lambaˀ lambaˀ zleˀe, yo taŋ misa vulaka taŋ ngi gi slra ngi Bumbulvuŋ amuŋ na, a zik t’aruŋ.

⁴Akẽh na, a slinam mizli asi ruwuy Samari keɗeɗe, a Kona, Bet-Horoŋ, Abel-mayim, Zeriko hã seŋseŋ a Koba, a Hasor waɗ ng’ar li micay ngi Salem.

⁵A tuɓaka hirnga muwãhaya cek cek, a gunoko walahay ngi digahaya cek ti mohol, a wam vu ti gwat ngi sa zum ar vurumo, asi a gaka sifi wureˀe.

⁶Ti di nah, naɓa masay madiɗa ngi Zeruzaleme i Zoˀakim, a toho ɗerewol da mizli ngi Betuli ati Betomestayimey, ruwuy misek duba cakay ati Zizreyel, avi li micay gweˀ avi Dotaŋ.

⁷A ɓa taŋ ɓa a tuɓaka jiviɗ vay mijik ngi muwã, asi i jiviɗ maru nga Zude, ɓa a jaka mizli macohom cuw cuwo, ti tuwaˀ ta, asi li cuhu naŋ ɓuc.

⁸Mizli Israyeleye, a gaka kaɓa Zoˀakim masay madiɗa ati mizli micawwa mingila wuy ngi Israyeley gar micikilam a Zeruzalem, miɓaka daˀ le tuwa.

⁹Mizli Israyeley gar a wudam ti gidaŋ ng’avi Buymisemuŋ, joˀ a gam dalyam hirdam hirdam,

¹⁰taŋ, ngwas taŋhay, dide taŋhay ati ginew taŋhay waɗ mulakay mazikam asi ruwuy taŋ gar, migi slra ngi dalahay ati beke taŋahaya gar, a kam zana ngi vagay a vu vu.

¹¹Mizli Israyeley gar, ngwasay, ziri, mbur misi a Zeruzalem gar na, a hurukom huruk huruk a mbuŋ hay ngi Bumbulvuŋ, hirnga turluŋŋo ti fucu, joˀ a bugaka vu taŋ ti zana ngi vagayay tuwa a mbuŋ Bumbulvuŋ, ɓa a pura taŋ ircece.

¹²A sirtaka li gi mikuli sirik ti zana ngi vagay vuna ya, joˀ a widam ng’avu Bumbulvuŋ ti ˀay purla, ti gidaŋ, a cufuɗakaŋ ɓa anja a pula mizli a cohom ti dide taŋhaya ta, a huloko taŋ ngwasaya ta, a wahaka taŋ walahayaya ta, a gam ti li mipala lambaˀ lambaˀ ta, yo a lumam bugawla ar mizli, a guzuvuraka taŋ ta.

¹³Bumbulvuŋ a cina tuwuy taŋ le, joˀ a pura bonoy taŋ. A ruwuy Zude gar waɗ a Zeruzaleme, mizli a roko gam dalyam hin mbeˀ mbeˀ a mbuŋ li dili ngi Bumbulvuŋ Buy misi gidaŋ wãˀa.

¹⁴Zoˀakim masay madiɗa ati masayay gar waɗ gawla ngi Bumbulvuŋhoy gar na, a roko dedeŋ a mbuŋ Bumbulvuŋ, zana ngi vagay ɓaˀɓaˀ a vu vu, a ra gam mikuli mizlam zlam ngi hin gar, gwat ngi vul ngi jimi waɗ gwat mizli mavulaka ngi mongoy taŋ.

¹⁵Lopon taŋhay gar i fucu tullo, yo a ra widam ti gidaŋ ng’avu Bumbulvuŋ, ɓa a jiniˀis asi Israyeley gar.