Read South Giziga Jud 5 Bible Online

Jud 5 - South Giziga bible

Jud 5

¹Holoferne, zeneral madiɗa ngi soje ngi Asirihey a cina na, mizli Israyeley a ra juwam vu ngi gi vurum, a gicaka zlungur ngir muwãhaya le kap kapa, a gunoko hirnga muwã musuburoyo le cek ti mohol, yo a wam vu le ɗum ɗum ar li micay cay taŋhaya.

²Akẽh na, Holoferne a ji mevel fõh fõh, a zilo buy Moˀapaya gar, zeneral ngi Amoŋhoy waɗ buy miwi li vay ciki mubuliy Mediteranehey gar.

³Dar a ɓa taŋ: «Kum Kanaˀanhay vuna, inga ɓikiy di so, mipam tir vay muwã vuna i waniy ka? Walahay taŋhay i wana wanaka? Soje taŋhaya taŋ kiteka? I mizli migidaŋhay haɗa, yo taŋ wirwir kwa? Buy miwi soje taŋhay i waka?

⁴Mizli misi tisi pas ngi pastaˀhay gar, a soko le avi ya, na taŋ a ngumam so ta vur mike?

⁵Akihor, madiɗa ngi soje ngi Amoŋhoy a ɓa Holoferne tuwa: «Zeneral ɗu, inga cina mi ngi balam ɗu, ya gawla ɗike, naɓa i sa ɓuw ɓi mikaslsla naŋ, a hirnga mizli misi tir vay muwã migweˀ avi ka tayna. Mingiɓi ngi slir anta sa bo ti balam ɗu ya gawla ɗike ta ndidaˀ.

⁶Mizli tayna, a boko tir sukwi ngi Babiloŋhoy.

⁷A pam dumbuŋ dumbuŋ a Mezopotami, asi t’anta ngumam sipa jiviɗ ngi kuli ngi dide taŋhay misi a ruwuy ngi Babiloŋhoy na ta.

⁸A gwaham avi sipa jiviɗ ngi dide taŋhaya, joˀ a dilikam a mbuŋ Buy muŋ, Bumbulvuŋ taŋ misinaka diga zlezle. A ɓulaka taŋ kileŋ avi kuli taŋhaya, a ra ɗumom a Mezopotami, a zikam haɗi adiga.

⁹A dirba nah, Bumbulvuŋ taŋ a ɓa taŋ ɓa a pulaka li taŋ misi ara na, ɓa a ram nga ruwuy Kanaˀan. A cifam adiga, a lumam ɓiri hirnga, ɓiri bara waɗ ginewey haɗi

¹⁰Akẽh, may a gi asi ruwuy Kanaˀan gar, dar a cohom nga Ezipte, a cifam adiga, a lumam gwat ngi ngir ar siifa taŋ, joˀ a jam wenewene adiga, ko a slufam ta.

¹¹Amma buy Ezipte a mbiɗi hirnga avi taŋ, a ga taŋ bonoy ti slra ngi kiɗa brik, a tika taŋ ˀay, joˀ a tiri taŋ beke.

¹²Taŋ a tilaka mi da Bumbulvuŋ taŋ, Bumbulvuŋ taŋ a ga bonoy da ruwuy Ezipte gar, bonoy misi slalak n’anta, dar Eziptehey a ɓulaka taŋ tisi ruwuy taŋavra.

¹³Buymisemuŋ a hila yam ngir mubuliy gaza ŋkaak a mbuŋ taŋ,

¹⁴dar a ki sa taŋ ng’ar jiviɗ ngi muwã Sinay, ngir ti Kades-Barneya, a ɓulaka mizli ngi wuzla ɓuh mikirɗak kirɗaka pay pay avra.

¹⁵A ra pam a ruwuy ngi Amorihey, a lumam gidaŋ, a ngizlaka mizli Heseboŋhoyo pay. A dirba taŋ mutuwuɗaka mizaw Zurdeŋ na, a tuɓaka ruwuy vay muwãhaya cek cek.

¹⁶A ɓulam a mbuŋ taŋ, i mizli Kanaˀanhay, Perizihey, Zebusihey, Sisemey ati Girgasihey gar, joˀ a cifam adiga hã a zikam haɗi.

¹⁷Da a gam mungra a mbuŋ Buymisemuŋ taŋ ta na, naɓa taŋ ar wuya na si, asi gwat mijeŋ ta na, Buymisemuŋ misi ati taŋ na, anta wuɗ ta.

¹⁸Amma da taŋ miram le kileŋ avi jiviɗ naŋ mubuga taŋ di na, a ngizlaka taŋ kap kap ti vurumoy mbeˀmbeˀe, joˀ a hilaka taŋ nga ruwuy mulaka. A wahaka hay ngi Buymisemuŋ taŋ kirap kirap, dar mizli mazliram ti taŋ ta, a tiɓaka walahay taŋhaya.

¹⁹Ani wurenna, taŋ mumoko ng’avu Bumbulvuŋ taŋ na, a cikiloko hirnga ti cikil, asi a zliɗam hirnga le zleˀe. A pam a Zeruzalem, asi hay ngi Buymisemuŋ taŋ naŋ adiga, yo a pam ar vay muwãhay asi i ɓuh manja hay.

²⁰Wurenna so na, buy kumani ɗu, da gwat a kic le avi mizli tayna, a gam mungra le avi Buymisemuŋ taŋ, keɗ keɗ na, a gam mungra ani ani na, naɓa i ra zlaka taŋ ngi kiɗa vu so.

²¹Amma da mizli taŋhay a gam gwat malambaˀ ta na, ka cuh weŋŋe kumani ɗu, vur Bumbulvuŋ taŋ Buymisemuŋ macik vu a hirnga taŋ. Naɓa mizli ngisi ruwuy gar, a sa singiram ar ndra.»

²²Akẽh, Akihor mikiɗa mi ngi ɓi naŋ hana na, mizli mugun gun guɗuk ngi Zeneral tuwa, a hilaka me wuwwo, madiɗa ngi soje ngi Holofernehey, mizli ngi ciki mizaw Mediteranehey ati mizli Moˀapaya, a ɓam ɓa a sliɗaka Akihoro.

²³Asi a ɓam na: «Ko mizli Israyeley anta gam ndra zluwun neˀ le ta, asi taŋ manja gwat ngi kiɗa vuhoy, yo da vurum a bul vu le na, gidaŋ taŋ anta.

²⁴Zeneral Holoferne, akum so, ndra soje ɗikey, i sa caka taŋ kolyom balam pal.»