Read South Giziga Jud 6 Bible Online

Jud 6 - South Giziga bible

Jud 6

¹Mizli mugun hirnga ngi guɗuk ngi mingila wuy ngi Holoferne, zeneral ngi soje ngi Asuroyo, mi taŋ muwuwwo mikiɗ mi muduba na, Holoferne a ɓa Akihoro a mbuŋ mizli mulakay gar ati Moˀapay gar:

²«Akihor, ki wa maka, yo kum mihiɗika le da Israyeley ma na, ki ɓam ndra dana kaɓa kum i mijiviɗey, ɓa i ra kiɗaka sukwi Israyele ta, asi Bumbulvuŋ taŋ a sa cik vu ar taŋ na, mbri mbri maka? Bumbulvuŋ mekelem ada mbak Nabukodonozoro kwa? Masa slin ti soje naŋ migidaŋhay i naŋ, ɓa a ngizla taŋ kuɗup asi ruwuyo, ko Bumbulvuŋ taŋ anta sa laha taŋ ta.

³Amma ndra gawla ngi Nabukodonozoroyo, i sa kiɗaka taŋ tay kaɓa i mbur purla, ko t’anta sa ɓusaka gidaŋ ngi misi pilis ndrahaya ta.

⁴I sa wuraka taŋ suɓulak, muwã taŋhay asa mbam ti pumbus taŋhaya, yo li taŋhay micay caya, a sa naham ti vagay taŋhay mukuros kuroso. Ko t’anta sa cicam dedeŋ a mbuŋ ndra gu ta, amma a sa mucam muc mukuyta wãˀ. I Nabukodonozor buy madiɗa miwa si ruwuy keɗeɗe maɓi, asi a ɓa le, yo mingiɓi n’anta ngi a ruwuyo ta.

⁵Naka Akihor, migi slra ngi dala avi mizli Amoŋhoy, ki ɓa mingiɓi ɗike kaɓa mbur mimbiɗi hirnga le, zle dana, hã ya masa lum bugawla ar sukwi ngi mizli mikila ti ruwuy Ezipte tayna na, k’anta sa pura mihiri ɗu mata.

⁶Ti ya masa mawa na, soje ɗuwoy ati madiɗa taŋhay, a sa zlugukuw cakaya ti maslalam ati ziwitey, a sa hizigukuw nga wuzla misi waˀa ngi Israyeley.

⁷Gawla ɗuwoy a sa ram ti ka ng’ar vay muwã, a sa pulukuw ar walahay purla awuzla misi ar zugudum.

⁸ki sa kutuko masa ngizlaka Israyeley na, a sa ngizlukum jom adiga.

⁹Asi ki ɗuva mevel ɗike le taˀ, anta sa jaka Israyeleye ta mana, anja ki nduruɓ hiri ta so. I ɓa le, yo mingiɓi ɗu loŋ masa ngi a ruwuy anta.»

¹⁰Holoferne a pula jiviɗ da gawla naŋhay misi asi guɗuk naŋ akẽh, ɓa a jaka Akihoro, ɓa a ram di nga Betuli, a ra vulaka asi haŋ ngi Israyeley.

¹¹Gawlahay a jaka, a bam di tir walahay guɗuko ng’ar li micay. A pulaka li mukutuko, a jiɗam ng’ar vay muwã, a ndilam a ciki miviɗiviɗi ngi yam misi asi virzi ngi Betuli.

¹²Mizli ngir walahay misi a hirnga muwã tuwa mupuraka taŋ keɗ na, a hilam gwat ngi vurumoy, a boko tir walahaya, mizli misi vẽvẽluhoy gar a tikaka taŋ ɓa a jiɗam ta, a lahaka taŋ ti ɗugur.

¹³Mizli Asirihey tuwa, a moko nga sar muwã, a juwaka Akihor tuwakaˀ kaˀ, a pulaka ɓaˀ a sar muwã ŋkeh, dar a mam ng’avi buy taŋ Holoferne muŋ.

¹⁴Amma Israyeley a poko sar ti muwã, a ndilam kasl avi Akihoro, a puskakaŋ, a ram di nga Betuli, a ra bugaka da buy ngir walahay taŋ.

¹⁵Buyo ti nana, i ti Oziya mangal ngi Mika, ngir sukwi ngi Simeyoŋ, Kabri mangal ngi Otniyel waɗ Karmi mangal ngi Melkiyel.

¹⁶A ziloko mizli micawwa ngir walahaya cek cek, gawlahaya cek cek, joˀ ngwasay a kiloko ng’ar cikile ya. A cicaka Akihor tuwa deŋ awuzla mizli, dar Oziyas a cufuɗaŋ da i mi migi ka na.

¹⁷Akihor a mbiɗa taŋ di ti mingiɓi ngi Holoferne mingil di wuy na, mingiɓi naŋ miɓa awuzla buy ngi Asuroy na gar, waɗ mingiɓi madiɗa madiɗa naŋ mizi di Israyeley na.

¹⁸Joˀ mizli Israyeley a hurukom huruk huruk a mbuŋ Buymisemuŋ, a dirakaŋ dibiɗ ti gidaŋ, a ɓam:

¹⁹«Aw Bumbulvuŋ Buy muŋ, pura mesene ndrahay mahuhumom, pura ircece da sukwi ndra, mizli mahirsaka na, pura hiri ngi mizli muvula le daka na dana.»

²⁰A dirba nah, Israyeley a tusoko didak da Akihoro, a ngilam di wuy haɗi.

²¹Oziyas a zuɓa baɗ ar cikile, a ru di nga hay naŋ, joˀ a di ɗaf ngi muguzlum da mizli micawwahaya. A wunam li daŋ daŋ ar li zila Buymisemuŋ, ɓa a kulo widi taŋ.