Read South Giziga Jud 7 Bible Online

Jud 7 - South Giziga bible

Jud 7

¹Li naŋ muwun na, Holoferne a pula jiviɗ da soje naŋhay gar waɗ da mizli gar musoko nga jini naŋ na, ɓa a zuɓam jiviɗ nga Betuli, ɓa a tuɓaka li muzugudum vay muwãhaya, ɓa a gam vurum ati Israyeley.

²Ti di nana, mbur mupuɗaw ngi vurum gar a ru. Soje misi saraya taŋ durmuk skat ti kukur tarnaˀa, misi piliseye durmuk kuru nga cuw, mbak gazlanga ati mijijir naŋhaya le, taŋ zuguduw sikiniy lambaˀ.

³A ra hinam ar li micay gweˀ avi Betuli, gweˀ avi miviɗiviɗi ngi yam, a tuɓaka li zle a Dotaŋ, hã seŋseŋ a Belbayim, yo a ndaham ti jeke, zle a Betuli hã seŋseŋ a Kiyamoŋ misek duba cakay ati Zizreyel.

⁴Mizli Israyeley mupuraka, taŋ misikinih tuwa na, a muɗa taŋ didak le haɗa, joˀ a ɓam ar wala taŋ: «Na, a sa musukuɗoko ruwuyo tur wãˀ asi sara, ko muwã musuburoy, ko heleleŋhey, ko li miɗigaray kwana, anta sa sirtaka taŋ ɓulum.

⁵Mbur gar a hila gwat ngi vurum naŋ, a bulam vu ar hay musuburoyo, a dirba nah, a jiginaka li ngi duvuɗ nah kapa.

⁶Li mekelem muwun na, Holoferne a bo ti misi piliseye gar nga mbuŋ Israyeley misi Betuli.

⁷A jiɗa li musukunuh ngi jiɗ ng’ar walahay taŋhaya, yo a ra guno li misi yam taŋhaya gun gun, a tuɓa taŋ tiɓeˀtiɓeˀ, a pi mizli ngi vurumoy sek sek a mi taŋ, dar naŋ vuna, a mi ng’avi mizli naŋhay amuŋ.

⁸Akẽh na, buy Edomoy gar, komandaŋ ngi Moˀapay ati zeneral ngi ciki mizaw Mediteraneheye, a kurohoko ng’avaŋ, a ɓakaŋ:

⁹«Buy, da ki ngum le ɓa ki cina mingiɓi ndra na, naɓa ko gwat masa ga soje ɗikeye anta.

¹⁰Asi mizli Israyel tayna, anta njaham hiri nga taŋ asi gwat ngi vurumoy ta, amma asi taŋ misi a hirnga muwã na, ndil ng’adiga naŋ tuwaˀa.

¹¹Wurenna so na buy, anja i cinjaham ngi kiɗa vu, kaɓa magaka ar vurum na ta, da i cinjaham ti cinjih ta na, naɓa ko mbur pal masa zizi asi mizli ɗikeye anta.

¹²Ka ndir ar li pi sar ɗike, jigina soje ɗikeye gar, yo ɓa gawla ɗikey a jiginaka mi ngi yamay maɓuloko tisi muwã.

¹³Asi mizli Betulihey a sa nuwam yam ara. Madalyam a sa kiɗa taŋ, joˀ a sa vulam ndra walahaya. Ndra ati sojeheye, i sa jiɗam nga hirnga muwã migweˀ gweˀheye, i sa jiginaka li, ɓa ko mbur a bo tir walahaya ta.

¹⁴A sa mucam cek ti may, taŋ vuna, ngwas taŋhay, ati ziri taŋhaya, yo ɓa i ra ngumaka taŋ ti maslalam tikeˀe na, i ra lumaka taŋ ɓaˀ ɓaˀ ar jiviɗ madiɗa ngir walahaya.

¹⁵Taŋ mislikiɗam ɓi avi ka, a ngumam soko nga zlir ti ka, ɓa ki cifam zuy zuyo ta na, a sa wurkaka ti bonoy haɗi.»

¹⁶Mingiɓi taŋ a cira hiri le da Holoferne ati madiɗa ngi soje naŋhay gar, joˀ a pula taŋ jiviɗ ɓa a gaka kaɓa taŋ miɓaka vuna.

¹⁷Soje Amoŋhoy ati ngi Asuroy durmuk zlum, a ram, a ra pam ar sozo, joˀ a tuɓaka mi ngi yamay ati miviɗiviɗi ngi yam ngi Israyeleye.

¹⁸Soje Edomoy ati Amoŋhoy, a jiɗam, a ra pam sar ar vay muwã, sek duba cakay ati hirwuy Dotaŋ. Dar a slinam ti mizli asi taŋ ng’ar vay ruwuy, ng’asi pas ngi miprik misek duba cakay ati Egrebel migweˀ avi ruwuy Kus ngi ciki mizaw Mokmur. Is ngi soje Asirihey a pam sar ar li micay, a tuɓaka li cek cek. Guɗuk taŋhay ati gazlanga taŋhaya, a tuɓa li sirgiɗim, i zuguduw sikinih.

¹⁹Akẽh na, mizli Israyeley a tilaka mi da Bumbulvuŋ Buymisemuŋ taŋ. Vagas a ra ga taŋ, asi mesene taŋhay a gunoko taŋ le gun, yo t’anta sa laham ti wuzla taŋ gu ta.

²⁰Soje Asirihey cek cek, misi saray, misi mota ngi vurumoy, misi pilisey, a roko gun gun hirnga taŋ hã hin kukur makir nga mufaɗ. Mizli Betulihey gar, a puraka na, yam taŋhay a wuɗo tikam.

²¹Yam ngir futuŋ taŋhay a ra tikam, ko yam a ndila hiipasa gu mata, asi a waka yam ngi si ti wi.

²²Gidaŋ anta avi zir gaza taŋhaya mata, ngwasay waɗ gawla ati diyliheye, madalyam a ŋhihiya taŋ le, a diɗam ɓaˀɓaˀ ar jiviɗ ngir walahaya, ɓaˀɓaˀ a mizlingrehey, ko gidaŋ taŋ anta mata.

²³Mizli gar, gawla ati diylihey, ngwasay ati ziri, a cikilam cek ng’avi Oziyas ati buy ngir walahayaya, a tilam mi ti gidaŋ, a ɓam a mbuŋ mizli micawwahaya:

²⁴«Anja Buymisemuŋ a ga ndra kiita ar wala ndra ati kumo. Kum miɗiyam ɓi ngi cifi zuy zuy ati mizli Asirihey ta na, ki gam ndra malambaˀ madiɗa le.

²⁵Ani wurenna, ko mbur makilo widi ndra anta, Buymisemuŋ a pula ndra le zlaɗ asi haŋ taŋ, ɓa may ati mendere madiɗa a sla ndra zlambar, i diɗam kros kros a mbuŋ taŋ.

²⁶Ziloko mizli ngi Holofernehey ati soje naŋhaya, vulaka taŋ walahaya wãˀ, ɓa a hilaka gwataya.

²⁷Zuwen taŋ mijam ndra, a funa ndra mamucam ti may na le. I sa tiram beke ɓula, amma i sa ndiram ti siifa, naɓa ko ndr’anta sa puram ziri gaza ndrahay, ngwas ndrahay ati ziri ndrahay mamucama mata.

²⁸I tumbulukum ti slimiɗ ngi muŋ ati ruwuy, waɗ ti slimiɗ ngi Buymisemuŋ ndra, Bumbulvuŋ ngi dide ndrahay, ma pula bolo weˀe avi zluɓa ɓi ndra ati mungra ngi dide ndrahay na, anja a ga ndra di dana kaɓa naŋ miɓa na so.»

²⁹A wuzla cikile, mizli gar a niˀicam ŋfo arleˀe, a tilaka mi da Bumbulvuŋ ti gidaŋ.

³⁰Oziyas a ɓa taŋ na: «Tumom vu tam sukum ɗuwoy. Ɓusukum di ngi hin zlum ava kwaɗay, ar hin nah, Bumbulvuŋ Buymisemuŋ ndra a sa pura ndra ircece, asi n’anta sa pula ndra zlaɗ hã avi kiɗa mi naŋ ta.

³¹Da hin muzlum na a cuh le, i lumam mijina ise ta na, i sa gakaɓa kum miɓaka vuna.»

³²A waha mizli ng’ar li taŋ ng’ar li taŋ, mekelemeye nga ciki mohol ngi walahay, numuŋhoyo ng’ar hay musuburoy, yo a ɓulaka ngwasay ati ziri nga hay. Mizli ngir walahay gar a roko tilngir tilngir.