Read South Giziga Jud 8 Bible Online

Jud 8 - South Giziga bible

Jud 8

¹Ar nah na, mingiɓi naŋ a ndil avi Zudit, zuŋ ngi Merari mangal ngi Oksi, Oksi mangal ngi Zozef, Zosef mangal ngi Uziyel, Uziyel mangal ngi Hilkiya, Hilkiya mangal Ananiyas, Ananiyas mangal Zedeyoŋ, Zedeyoŋ mangal ngi Rafayim, Rafayim mangal ngi Akitop, Akitop mangal ngi Eli, Eli mangal ngi Hilkiya, Hilkiya mangal ngi Eliyap, Eliyap mangal ngi Natanayel, Natanayel mangal ngi Salamiyel, Salamiyel mangal ngi Sarasaday, Sarasaday mangal ngi Zakop.

²Zil ngi Zudit a zilaka Manase, mbur ngir sukwi naŋ, i muy naŋ, a muc hirak ti sifi ngi daw giziŋ.

³A jigin mipi daway a mizer ar li micay. Pas micãˀ cãˀ a zlumaŋ hirnga, a hin tup ar arngawo naŋ, joˀ a muc ar walahay naŋ a Betuli. A dikakaŋ a wuzla dide naŋhay, ar guva misi ar wala ngi Dotaŋ ati Balamuŋ.

⁴Zudit a ndir wudiga, joˀ pal naŋ a hay naŋ, a gi le vi makir ti kiya mufaɗa.

⁵A ɗiyi mazlaɓ le a hirnga gbale naŋ, a ki zana ngi vagay waɗ zana naŋ ngi wudiga ɓaˀ a hirnga naŋ.

⁶Diga zil naŋ mumuc pam si na, a ra gi dalyam ti hin gar, sey hiikuɗ ɓa li a wun hin ngi sabat jom ti hin ngi sabat naŋ, hiikuɗ ɓa li a wun kiya a slawa jom ti hin ngi kiya mikaˀa, hin ngi muguzlumoy waɗ hin ngi mumul ngi Israyeley tewle.

⁷Zudit naŋ kuy teˀe, yo a ga mburo zer zer. Zil naŋ Manase a pulaŋ ɓiri hirnga, ɓiri bara, gawlahay ati ngwas migi slrahay, ginewey waɗ guvahay, i naŋ mawa taŋ gar.

⁸Mbur ɓa a ɓi ɓi malambaˀ a hirnga n’anta, asi a zluwun ti Buymisemuŋ haɗi.

⁹Zudit a cina na, yam anta mata, mizli a roko tilngir tilngir, a ra ɓam ɓi malambaˀ a hirnga buyo. Zudit a cina mana, Oziyas a hudum le, ɓa angi hin zlum na, a pula ruwuyo da Asirihey.

¹⁰Zudit a slina ngwas migi slra majaŋ zlili naŋ gara, ɓa a zilo ti Oziyas, Kabris waɗ Karmi, mizli micawwa ngir walahay.

¹¹Buyoy musoko nga hay Zudit tuwa na, Zudit a ɓa taŋ: «Buy Betulihey, cinikiy di ɗi, Mingiɓi kum miɓaka ngadana a mbuŋ mizli, kum muhudumom ar wala kum ati Buymisemuŋ, yo ki ɓam mana, da Bumbulvuŋ a kilo widi ndra ta na, ki sa vulaka ruwuyo da mesene ndrahay na, naŋ kasl ta.

¹²Ani wurenna, ki jiginam mi le dana avi Buymisemuŋ, yo ki wuɗo cam ar li naŋ awuzla Israyeley ma na, kum i waniy ka?

¹³Wurenna ki wuɗo cam a kwacay Bumbulvuŋ misi gidaŋ gidaŋ wãˀa, amma kum anta sa sinaka wuluk naŋ ta ndidaˀ wãˀ.

¹⁴Kwacay ngi mbur asin ta, yo kum anta sinaka wuluk naŋ ta ndidaˀ wãˀ. Na kumo ma na, Bumbulvuŋ miga gwat tayna gar vuna, ki wuɗam ci a kwacay naŋ na mbri mbri maka? Ki sinaka wuluk naŋ gu kwa? Yo gwat naŋ mujuwa a mevel naŋ ngi gi ngi gi na, ki slaka wala nah gu kwa? Kanah ta sukum ɗuwoy, ki jaka mevel da Bumbulvuŋ Buymisemuŋ ndra ta.

¹⁵Asi da wuluk naŋ anta ngi kilo widi ndra angi hin zlumo ta na, n’ada ti gidaŋ ɓa a laha ndra nga mbuŋ, malla ɓa a ngizla ndra kuɗup a mbuŋ mesene ndrahaya.

¹⁶Amma gwat Bumbulvuŋ Buymisemuŋ ndra mujuwa a mevel naŋ ngi gi na, ki cufuɗam gwat mabuga bigeˀ le, i gisiŋ, ar deɗe naŋ ta. Asi Buymisemuŋ naŋ kaɓa mbur, ɓa i surokoŋ mi ta, yo naŋ kaɓa i mbur titira, ɓa i tikakaŋ ˀay ti tik ta.

¹⁷Vurˀe, ndra makutukom lih ti va na, zulukum di cici, ɓa a kulo widi ndra, da a pura le kuy na, a sa cina ndra di.

¹⁸Asi diga avi tizer ndra misi zlezle, hã dana, ko sukwi ndra, ko mizli ngi hay ndrahay, ko muy ndrahay, ko mizli ngir walahay ndrahay madilikam a mbuŋ kulihey mizli miɗiyaka taŋ ti ɗiyi, kaɓa madilikam zleˀe na anta.

¹⁹Dideˀ ndrahay midilikam a mbuŋ kulihey na, taŋ misam bonoy ti vurum, a vaka taŋ gwatay, yo mesene ndrahay mingizlaka taŋ pay gar na, vurˀe.

²⁰Na ndra, mbak nah le na, i sinam Bumbulvuŋ mekelem ta. I ɗuvaka wuluko taˀ na, anta sa pula ndra zlaɗ ta, a sa pula sukwi naŋ manja pura ircece ta, yo manja a laha taŋ ta ma.

²¹Asi da a tuɓaka walahay ndra le na, a sa tuɓaka Zude wãˀa ma, a sa vaka gwat ngir li ndra mipala , dar Buymisemuŋ a sa cufuɗa ndra ɓa hay naŋ mitiri hay muho gar na, i wurkaka ti pumpus ndra.

²²Da a ngizlaka mizli ndrahaya le, a tiram bekehey le a wuzla sukwi ngi mizli, yo ruwuy ndra a ndir le daŋ daŋ na, naɓa ɓi naŋ a sa mbiɗi nga hirnga ndra. Mizli mipam ndra hirnga na, a sa hirsam ndra, joˀ mesem a sa sirta ndra sirit a mbuŋ taŋ.

²³Asi ndra masa gam beke na, anta sa ga ircece da buy ndrahaya ta, amma Bumbulvuŋ Buymisemuŋ ndra sa pa ndra di mesem.

²⁴Wurenna so na sukum ɗuwoy, bugukum di da mizli ndrahaya, siifa taŋ naŋ asi haŋ ndra. Li mipal , hay ngi Buymisemuŋ ati li gi mikuli na, ɓi taŋ naŋ asi haŋ ndra.

²⁵Mbak nana le ma na, gukum sise da Bumbulvuŋ Buymisemuŋ ndra, vur naŋ maci a kwacay ndra, kaɓa naŋ mici a kwacay dide ndrahay zleˀe na.

²⁶Gwat naŋ miga gar da Abraham na, wulkaka keŋ kwaɗay, yo gwat naŋ miga da Izak ati gwatay gar migam avi Zakop a ruwuy Mezopotami vay muŋ, ti naŋ majigin tumuŋ ngi kawu naŋ Labaŋ na, wulkaka keŋ kwaɗay.

²⁷Buymisemuŋ migi ti taŋ, kaɓa mabam ti malambaˀ ngi gwat ar vu, ɓa ngi pura jileŋ ngi mevel taŋ na, naŋ kine ya, n’anta pul di i bol ti pul avi ndra ta. A ga taŋ di kanah, ɓa ngi buga: Buymisemuŋ a kuta mizli migweˀ ngi vaˀahaya ti bonoy.»

²⁸Oziyas a ɓaŋ: «Mingiɓi ka miɓa ani gar na, ki ɓa ti mevel purla, ko mbur pal masa nguluw mi anta.

²⁹Asi sin ɗik mijileŋ minjak ar li babara na, a zli diga nga dana ta, amma diga muyukuw caka, mizli gar a sinakale, ki mbur misi lesle, yo gwat mezle ka mabo di tir mevel ɗik na, a sinaka le ma.

³⁰Amma yam mawuɗo kiɗa mizli tuwa na, a tikam ndra ˀay ɓa i ɓam kaɓa ndra miɓaka taŋ na, joˀ i jumomˀay ti hudum ɓa i ngilaka ɓi nah ta.

³¹Wurenna so na, dir dibiɗ vur ndra, asi ki ngwas masipa jiviɗ ngi Bumbulvuŋ gisiŋ gisiŋ, cufuɗaŋ ɓa a vulo ndra vuŋ, ɓa a naha futuŋ ndrahaya mbaf mbafa, ɓa madalyam a sla ndra zlambar mata.»

³²Zudit a ɓa ttaŋ so na: «Inga cinikiy di ɗi: I wuɗo gi gwat misi dide ndrahay a sa ɓaka ɓi naŋ da dide taŋhay nga mbuŋ nga mbuŋ.

³³Ti duvuɗ dana, ki sa cicam a mizliŋgreŋ, i sa bam ati ngwas migi slra ɗu, yo ɓa hã hin kum mislaka ngi vula walahay da mesene ndrahay a sa ndilo tikeˀe na, Bumbulvuŋ a sa gi ti ya ngi kila widi ngi Israyele.

³⁴Amma kumo, ki kam slimiɗ ar gwat ya mara ga ta. Asi gwat ya masa ga hã tay mi naŋ na, ko y’anta ɓukum di neˀ le ta.»

³⁵Oziyas ati buyoy tuwa, a ɓakaŋ: «A ru zuy zuy, yo anja Bumbulvuŋ Buymisemuŋ a ndir ati ka, ɓa a pula bol avi mesene ndrahaya.»

³⁶A slikiɗam tisi mazlaɓ ngi Zudit tuwa, a mam ng’ar li taŋ ng’ar li taŋ.