Read South Giziga Jud 9 Bible Online

Jud 9 - South Giziga bible

Jud 9

¹Ar hay ngi Bumbulvuŋ a Zeruzaleme, hirak ti mawuraka urdi ngi pastaˀ nah na, Zudit a huruk huruk, midibiɗ durus da ruwuy, fucu mok mok a hirnga, a pula zana ngi vagay tuwa a puro tisi zana naŋ, dar a tila mi da Bumbulvuŋ ti gidaŋ, a ɓaŋ na:

²«Bumbulvuŋ, Buymisemuŋ ngi dide ɗu Simeyoŋ, i ka muvula maslalam da Simeyoŋ asi haŋ, ɓa ngi pula bol avi mulakay mihinam ti sukum naŋ diyli mungbuˀo ti takaˀaya, a cakaŋ ar dili, a cukokoŋ zana ngi paŋ mesem, joˀ a hinam di tak ˀay. Naŋ kine, ki ɓi zleˀe na: ‹I gwat magi ta,› amma a gaka le.

³Vurˀe, ki pula mbak a ngizlaka buy taŋhaya, tikina vu a mbiɗi le nga hirnga taŋ, arngawo mihiryaka zuŋ ara vuna, pumbus a buna ceɗ ceɗ. Ki kiɗa bekeheye jom ati buy taŋhaya, yo buyoy kwana, ki kiɗa taŋ daˀ ar li cifi taŋ.

⁴Ki pula mbak a hilaka ngwas taŋhaya, a jaka ziri mongoso taŋhay ng’ar beke, yo gwat taŋhay gar na, ziri ɗik Israyeley ka mawuɗ taŋ haɗa, a wuɗukaka pay ar wala taŋ, Israyeley a roko wirwir, a ra cinukuw mi. Gwat ngi mesem migi a hay taŋ na, a ga taŋ kuyta wãˀ, joˀ a zulukuw ɓa ki jina taŋ. Aw Buymisemuŋ, Buymisemuŋ ɗu, ya wudiga mazuluw na, inga ciniy di takwa.

⁵Asi gwatay migam zlezle, magam wurenna ati masa gam tumbuŋ gar na, i ka miga taŋ. Gwat magi wurenna ati misi tumbuŋ gar na, ki ra wulka taŋ, yo gwat ka muwulka ngi gi ngi gi gar na, a gam le.

⁶Gwatay ka mujuwa taŋ ngi gi ngi gi na, a soko, a ɓukuw na: ‹Ndr’aniŋhi!› Gwat ngi gi ɗike a wi vu le, yo kiita ɗike, ki pura keɗ keɗ le daf dumbuŋ.

⁷Pura mizli Asiriheye, a soko ti gidaŋ, a ra zluzluɓam asi taŋ ti pilis taŋhay waɗ mukukur taŋhay, a ra huhumom vu asi gidaŋ ngi misi saray, a roko hiri njah asi mbaray taŋhay, asi ziwit taŋhay, asi lek taŋhay, asi vẽvẽlu taŋhay. Ki Bumbulvuŋ mikiɗa mi ngi vurum na, a sinaka ta.

⁸A zilukuw ka Bumbulvuŋ, tika wirwir taŋ na ti gidaŋ ɗiki, yo tika gidaŋ taŋ na ti himaˀ ɗiki, asi a juwaka le a mevel taŋ, ɓa a tiram ti li dili ɗikeye, li muho gar, ɓa a cam ti dili ng’ar li ɗik ka misi ara ti dudok ɗike, yo ɓa a putukusoko durumoy misi ar mikuli ɗike ti ɓiri.

⁹Pura taŋ mahuhumom vu ɗi, po himaˀ ɗik nga hirnga taŋ, vuliy gidaŋ da ya ngwas wudiga, ɓa i ga gwat ya mujuwa a mevel ɗu ngi gi na.

¹⁰Mi ɗu matikin vu na, ga ɓa a kiɗa buy ati beke naŋ, yo a kiɗa buy ati gawla naŋhaya, ɓa ya ngwasa, i ga huhumo vu taŋ na, geˀgeˀ kuɗup wãˀ.

¹¹Asi gidaŋ ngi ɗike, a gi asi zuguduw mitaˀ ta, gidaŋ ɗik ngi wi mizli kwana, a gi asi mizli migidaŋhay ta. Amma ki Buymisemuŋ ngi mihina hirngahay, mikila widi ngi mizli mizliwey, micika vu a hirnga mihĩyahay, mizli mizlaɗ lambaˀa, ki wi taŋ vu, ki milaha mizli misinaka a gam kini ta.

¹²Haˀaw, haˀaw Buymisemuŋ ngi dide ɗu, Buymisemuŋ ngi ruwuy Israyel, buy miwa muŋ ati ruwuy, miga yamay, buy madiɗa ngi gwatay ka miga taŋ gar, inga cina diradibiɗ ɗu takwa.

¹³Mizli mujuwam ɓi mutuwaˀ le ngi gi da jumoˀay ɗiki, da hay ɗik dili , da mesengel ngi muwã Siyoŋ waɗ da ruwuy ziri ɗikey mipam ara na, ga ɓa mingiɓi ɗu matikin vu na, a sla taŋ, yo a kiɗa taŋ vagay vagay.

¹⁴Buga da sukwi ngi mizli gar waɗ da sukwi ko wanaka gara, ki Buymisemuŋ miwa mizli gar, miwa gidaŋhay gar, yo mbur mekelem mbak ka le na, majigina sukwi Israyele anta.»