Read South Giziga EST 2 Bible Online

EST 2 - South Giziga bible

EST 2

¹A dirba ɓi tayna mucohom na, buy Zerses a tisla mevele le muduba. Dar a zla a wulka ɓi ngi Vasti keŋ, gwat naŋ miga ati ɓi taŋ majuwaka a mevel taŋ vurˀe zleˀe tuwa.

²Akẽh na, gawla ngi slra naŋhay a ɓam: «Anja a ram ti supoko ziri diili mungbuˀ ngbuˀhoy da buyo, diilihey misi hiri a ɗuv avu taŋ ta.

³Anja buy a wini mizli angi hirwuy naŋ mazum buy anga gar, ar li misi buy miwi lihey anga. A vula taŋ slra ɓa a soko ti ziri diili mungbuˀ ngbuˀhoy aruŋ, misi hiri a ɗuv avu taŋ ta. A soko taŋ nga Sus, walahay naŋ hirnga, yo ng'ar hay ngi ngwasay a mbuŋ Hege, mbur munguɗo mijigina ngwasay a hay buyo. Dar a vulaka taŋ mal mezlehey ngi wucuɗa vu.

⁴Zuŋ diili misa cira hiri le da buyo na, a sa tiri maˀãy ar li ngi Vasti.» Buy a hĩyã ɓi nah le, dar a ga kanah so.

⁵Mbur Yude ada, a zilaka Mardoke. Naŋ a Sus, walahay hirnga. Mardoke i mangal ngi Yaˀir, dideˀ ngi Simey, yo i dideˀ mukutur ti kutur ngi Kis, angi tizer ngi Benjameŋ.

⁶Nabukodonozor, buy ngi Babiloŋ mija mizli baɗ ti Zeruzalem jom ti Yekoniya, buy Zuda nga Babiloŋ na, naɓa Mardoke vuna naŋ da a wuzla taŋ ya.

⁷Dambalaka na, Mardoke vuna a gil jamba naŋ le, a zilaka Hadasa waɗ Ester ma. Asi Estere, cine ati mumuŋ a micam le. Zuŋ diili Estere, dumvu naŋ a wucuɗ ngilew ngilew, yo hiri a ɗuv ava ta wãˀ. A dirba miyi naŋhay mumicam na, i Mardoke migilaŋ.

⁸Ɓi ngi buy miɓa ati ɓi naŋ ɓi micica, yo ɓi ngi hila ziri diilihey haɗa nga mbuŋ Hege, a Sus, walahay hirnga tuwa, a tilam di mi le, slra nah a gi le. Hege, mbur mijigina ngwasay a hay buyo a pula jiviɗ, ɓa a ram ti Estere ngi hay buyo.

⁹Hege a hĩyã Estere le, a pura Estere kuy avu hiri. A wus vu ngi vulaŋ mal mezlehey ngi puy ngi gaŋ dumvu ngilew ngilew, waɗ a vulaŋ gwat naŋ mazum mazumo. Yo a vulaŋ ziri diili hirnga hirngahay mitarnaˀ misi a hay buyo. A dirba nah, a hila taŋ tir hay ngi ngwasaya, a pa taŋ sek pal taŋ ng'ar viŋ mimezle ar hay ngi ngwasaya.

¹⁰Estere, a biga mizli naŋhay ati muy naŋhaya ta, asi Mardoke a tikaŋ le, anja a biga taŋ ta.

¹¹Vur hin gar na, Mardoke, ara liˀi a wazlaray ngwasaya. A wuɗ ɓa a sina, Estere, a ro zuy zuy kwa malla a roko gakaŋ mike na.

¹²Ɓa zuŋ diili gar a sa ru ng'avu buy Zersese na, sey da naŋ mikiɗa mi ngi sipi jiviɗ ngi ngwasaya le angi kiya kuruˀ nga cuwo far. Hin ngi jirgiɗa vu, jiviɗ naŋ a cuh ani: Kiya merkeɗ na,a jirgiɗam vu ti mal mazilaka mir [1], yo kiya merkeɗ mekeleme ma na, a jirgiɗam vu ti urdi muhindirik hindirik waɗ ti mal mezle ngi ngwasay, ɓa ngi ɗiya dumvu ngilew ngilew.

¹³Ɓa zuŋ diili aru ng'avu buyo na: gwat naŋ mucufuɗ le gar, ɓa aru di a haŋ baɗ ar hay ngi ngwasaya, ng'ar mugum ngi buyo na, a vulakaŋ di.

¹⁴Zuŋ diili, aru ti pastaˀ ng'avu buyo. Ti miprik na, a mawa ng'ar hay ngi ngwasay mucuw naŋ muduba. Mavula jiviɗ nah i Sasgaz, mbur munguɗo, buy ngi ngwasay a hay buyo. Zuŋ diili anta mi ng'avu buyo mata, sey da buy muro ti may naŋ malla sey da naŋ mizilaŋ le ti slimiɗ naŋ ɓa aru ng'ava far.

¹⁵Ester, zuŋ ngi Abihayil, jamba naŋ Mardoke migila tuwa, hin ngi ru naŋ ng'avu buyo a ndila le. Naŋ a cufuɗ nga naŋ ɓa a vulakaŋ na, sey gwatay, Hege, mbur munguɗo, buy ngi ngwasaya hay buy, mibigaŋ taŋ na tewle. Mizli gar na, a puraka Estere ti hiri mezle.

¹⁶Dar a ram ti Estere ng'avu buy Zerses ar mugum naŋ so. Naɓa buy a ɓul di i kiya mukuruˀ naŋ ngi vi, i kiya Tebet [2], i vi mitarnaˀ naŋ ngi Zerses angi zuma buyo.

¹⁷Akẽh na, buy a wuɗa Estere haɗa fineˀ ngwas mekelemeye gar. Buy a gaŋ mezle, a puraŋ kuy fineˀ ziri diili mekelemey gar. Dar a caŋ loppol ngi maˀãy a hirnga njiv, waɗ a cifaŋ i maˀãy ar li ngi Vasti.

¹⁸A dirba nah, buy tuwa, a di ɗaf ngi muguzlum ti slimiɗ ngi Estere. A zilo mizli madiɗa ngi slra naŋhay ati gawla naŋhay gar nga ara. Buutu mawurkaka ar li ngi buy miwi lihey ar hirwuy naŋ gar na, a ngica taŋ di avra, waɗ a vula gwat da mizli ti gula ti hazum, ka vul nga naŋ buyo.

¹⁹Ti di hila ziri diilihey sar mucuw naŋ na, naɓa Mardoke naŋ ti li ngi slra naŋ nga hay buyo.

²⁰Ester a bigi muy naŋhay ati sukwi ngi mizli naŋhaya ta, asi Mardoke a ɓaŋ le ɗa ˀ ɗaˀ le, ko anja a biga taŋ ta. Ester ara cine mi da Mardoke aruŋ na si, kaɓa naŋ misi zleˀe asi haŋ naŋ.

²¹Ti di nah na, naɓa Mardoke a ro ar li ngi slra naŋ nga hay buyo. Mizli munguɗo ngi buyoy ada cuw, i ti Bigtaŋ ati Teres, mijigina miviŋ ngi ci nga viŋ buy. A jam mevel ar buyo, dar a gam gidiɓi ɓa a kiɗaka buy Zersese vagay.

²²Akẽh na, Mardoke a cine ɓi nah le, dar a fa ɓi nah fẽẽt da maˀãy Ester. Estere kwana, a fa ɓi nah da buyo Mardoke a ɓiy ani kahana kahana.

²³A dirba taŋ mikaka virzi ngi ɓi nah na, a lumaka ɓi nah naŋ kaslsla kanah gisiŋ. A luwaka mizli munguɗo mucuw tayna tuwa, a muŋ. Waɗ a tohoko ɓi nah toh toh angi ɗerewol ngi ɓi ngi buyoy, a mihiri ngi buyo.