Read South Giziga EXO 1 Bible Online

EXO 1 - South Giziga bible

EXO 1

¹Israyeley miram nga Ezipte ati cine taŋ Zakop na, mbur gar aru ti mizli ngi hay naŋhaya wãˀ wãˀ, slimiɗ taŋhay ani:

²Ruben, Simeyoŋ, Levi ati Zuda,

³Isakar, Zabuloŋ ati Benjameŋ,

⁴Daŋ ati Neftali, Gat ati Aser.

⁵Ziri ngi Zakopoy a gam jom gar, mizli kukur tarnaˀ: Zozefe, naɓa naŋ a Ezipte si.

⁶A dirba nah, Zozef a mucu, sukum naŋhay gar waɗ mizli miram ti nah na gar, a micam le.

⁷Israyeley ara yam haɗi, ziri taŋhay ara sikam fineˀ gidaŋ, a lumam gidaŋ nga mbuŋ nga mbuŋ: a nahaka hirwuyo wãˀ.

⁸Akẽh na, a cam buy nawaya a Ezipte, a si na Zozefe sin le ta.

⁹Buy tuwa, a ɓa mizli ngi hirwuy naŋhaya na: «Ani, sukwi ngi Israyeleye, a tiram le haɗa fineˀ gidaŋ, yo taŋ ti gidaŋ haɗa, a funam ndra le.

¹⁰Anja i gam wer ɓa a yam kahana mata. Da ani vurum a gi le na, a sa jumom ng'avi mesene ndrahay, a sa kiɗam ndra, a sa pulaka hirwuy hana.»

¹¹Dar Eziptehey a vulaka taŋ buy ngi slrahay mitakˀay, ɓa a vusoko taŋ ti slra mitakˀay, Israyeley a ndiraka walahay Pitom ati Ramses ngi wi vu ti gwat ngi buy madiɗa ngi Eziptehey.

¹²A wuɗam a vusoko taŋ ti gidaŋ ma na, amma taŋ ara sikam ti vendeke jak, yo ara tiɓaka li ti gidaŋ, hã Eziptehey a zluwunam ti taŋ.

¹³Dar Eziptehey a guzuvuraka taŋ, a tiram taŋ bekehey,

¹⁴a gam ti taŋ, ɓa cifi taŋ a gi ti bonoy, ti slra mitakˀay: a kulupam hohoy, a kiɗam brik, slra ngir guva gar, duguleˀ naŋ na, slra ngi bekehey gar na, a tikaka taŋ ˀay ti naŋ ti gidaŋ si.

¹⁵Ngwas miyi ngwasay ada cuw, numuŋ a zilaka Sifra, mekeleme Puwa. I taŋ mayaka ngwas Hebereye. Buy Ezipte a ɓa taŋ na:

¹⁶«Da ki ra ya ka ngwas Hebereye na, puraka zuŋ kum mayaka na kuy kuy. Da i mangal mizile na, kiɗaka vagay, da i zuŋ mongoso na, pulaka.»

¹⁷Amma ngwas miyi ngwasay tuwa, a zluwunam ti Buymisemuŋ, a gaka kaɓa buy Ezipte miɓa taŋ di tuwa ta, taŋ a pulaka ziri mizileheye.

¹⁸Dar Buy Ezipte a zila taŋ, a ɓa taŋ: «Ki pulaka ziri mizileheye vur mike? Ki gaka kanah vur mike?»

¹⁹Ngwas miyi ngwasay tuwa, a mbiɗaka da buy Ezipte: «Ngwas Hebereye, taŋ ka ngwas Eziptehey ta, taŋ wirwir haɗi, ɓa ngwas miyi ngwasay a sa ndil tikeˀe a ciki taŋ na, naɓa a ya ka zuŋ le si.»

²⁰Buymisemuŋ ara ga mezle da miyi ngwasaya, yo sukwi Israyel kwana ara sik, taŋ ti gidaŋ haɗa.

²¹Na miyi ngwasay mazluwunam ti Buymisemuŋ tuwa na, Buymisemuŋ a vula taŋ yi.

²²Dar buy madiɗa ngi Ezipte a ɓa mizli naŋhaya gar: «Mangal Heber miyaka le wureˀ gar na, hizigaka ng'ar yam a mizaw! Da i zuŋ mongoso na, pulakaŋ.»