Read South Giziga EXO 10 Bible Online

EXO 10 - South Giziga bible

EXO 10

¹Bumbulvuŋ a ɓa Moyise: «Ci ngi hay buy madiɗa ngi Ezipte, asi muwuɗ ɓa naŋ a cicam kaŋ kaŋ ati gawla naŋhay na, i ya, ɓa i ga gwat ngi zuma hirnga mabiga y'ada a wuzla taŋ.

²Ya migi ti Eziptehey, yo ya migi gwat mabigam gwat mekelemey a hay taŋ na, ɓa ki slufa ɓi nah da ziri ɗikey waɗ da dideˀ ɗikey. Dar kisa sinaka Bumbulvuŋ, i ya.»

³Moyis ati Aroŋ a cam ngi hay buy Ezipte, a ɓakaŋ: «Bumbulvuŋ Buymisemuŋ ngi Heberey a ɓi ani: ka mangum hina hirnga a mbuŋ ɗu ta na, hã ti vunaka? Pula mizli ɗuwoyo ɓa ara gikiy mikuli.

⁴Da ki ngum pula taŋ ɓa a cohom ta ɓula si na, zle tiprike, i sa slino jaray asi hirwuy ɗike.

⁵A sa sirtaka hirwuyo sirit wãˀ, ko mizli anta sa puraka feŋ gu mata. Gwat ngi migam milih purla purla avu yam na, a sa tirnaˀaka tirneˀ wãˀ, a sa zumaka widis kumoy maɗiɗam a ɓuh cek,

⁶a sa nahaka hay ɗike, hay ngi gawla ɗikey, yo waɗ hay ngi Ezipteheye gar. Diga cine kumoy ati dideˀ kumoy mipam na, a puram gwat kanah ɗaˀ ta wãˀ, hã danaŋ.» Moyis a bo ti hay buy Ezipte, a cuhu.

⁷Gawla ngi buy Eziptehey a ɓaka buy Ezipte: «Mbur hana a sa kiɗa mi ngi so ndra ti mendere ti vunaka? Pula mizli a ram nga gi mikuli da Buymisemuŋ taŋ Bumbulvuŋ. Ezipte ara zizi na, ki si na t'aruŋ kwa?»

⁸A ziloko Moyis ati Aroŋ nga mbuŋ buy Ezipte a muŋ, joˀ buy Ezipte a ɓa taŋ: «A ram! A ra gaka mikuli da Bumbulvuŋ Buymisemuŋ kumo. Amma maram vuna i waniy waniy ka?»

⁹Moyis a mbiɗaŋ di: «I sa ram cek ti ziri ndrahay ati midigila ndraˀahaya, cek ti gawla ati diili ndraˀahaya, ti tumuŋ, ˀaway waɗ sla ndraˀahaya. Asi avu ndra i zuɓa mulak ngi ɗuva hirnga da Buymisemuŋ.»

¹⁰Buy madiɗa ngi Ezipte a ɓa taŋ: «Da yi pulukum le ɓa ki ram ati ziri kumoy gar na, anja Bumbulvuŋ a ndir ati kum! Puraka kum mapuram jiviɗ ngi gi malambaˀ n'ayɗi!

¹¹N'anta sa gi ka kum mawuɗam na ta! Kum ziley a ram, gaka mikuli da Bumbulvuŋ, asi gwat kum mawuɗam i nah.» Joˀ a ɓulaka taŋ ti hay buy Ezipte ng'avra.

¹²Bumbulvuŋ a ɓa Moyise: «zuɓa haŋ ng'ar hirwuy Ezipte ngi zilo jaray: Anja a slikiɗam giv giv asi hirwuy Ezipte! Anja a tirnaˀaka giziŋ ngisi hirwuy Ezipte tirneˀ wãˀ, gwat yam mupula tuwa tirneˀ wãˀ.»

¹³Moyis a zuɓa ganday naŋ ng'ar Ezipte. Hiipas tapasa jom ti duvuɗ naŋ gar, Bumbulvuŋ a zuɓo himiɗ tisi pas ngi miprik ng'ar Ezipte. Ngi miprik naŋ na, himiɗ muso tisi pas ngi miprik tuwa, a so ti jaray le.

¹⁴Jaray tuwa, ara slikiɗ giv giv asi hirwuy Ezipte gar, a pam sar asi ruwuy ngi buy Ezipte gar: A zuɓ ka vuŋ, ko ti zlezle, jaray a gi ɗaˀ kanah ta, yo anta a sa gi kanah tumbuŋ ta ma kini.

¹⁵A sirtaka hirwuyo sirit wãˀ, waɗ hirwuy a tiri tirnik. A tirnaˀaka giziŋ ngisi ruwuyo tirneˀ wãˀ, waɗ yi ngi widisey cek mindiram a dirba yam tuwa. Asi hirwuy Ezipte gar na, ko ki pur kalaf avu widisey neˀ ta, ko gwat mutukuzo kaˀ a ɓuh anta.

¹⁶Buy Ezipte a wus vu kutum ngi zilo Moyis ati Aroŋ, a ɓa taŋ: «I gi mungra le avu Bumbulvuŋ Buymisemuŋ kumo waɗ avu kumo ma.

¹⁷wurenna, ambuh, puliy mungra ɗu is pal ava. Cufuɗaka Bumbulvuŋ Buymisemuŋ kumo, ɓa a kiraha muc hana kileŋ avu ya tewle.»

¹⁸Moyis a bo ti hay buy Ezipte, a tumbulo Bumbulvuŋ.

¹⁹Akẽh Bumbulvuŋ a go burkataŋ gambara tisi pas madiɗe, a kil ti jaray tuwa leɗeɗ ng'ar mubuliy lavaɗa. Asi hirwuy Ezipte gar na, ko jaray mindir loŋ anta.

²⁰Amma Bumbulvuŋ ara ga ɓa hirnga ngi buy Ezipte a ndir gidaŋ na si, ko a pula Israyeleye ɓa a ram ta.

²¹Bumbulvuŋ a ɓa Moyise: «Zuɓa haŋ nga muŋ. Anja luvuŋ a gi asi hirwuy Ezipte gar, luvuŋ mitimbiɗim, hã a tutumaka li ti tutum!»

²²Moyis a zuɓa haŋ nga muŋ. Dar luvuŋ mitimbiɗim a gi hin makir asi hirwuy Ezipte gar.

²³Angi hin mimakir tayna, ko a puram vu ta, yo ko mbur mikirih kirah le anta. Amma ar li Israyeley misi anga na, li njahha

²⁴Buy Ezipte a zila Moyise, a ɓaŋ: «A ram! A ra gaka mikuli da Bumbulvuŋ ati ziri kumoyo. Amma sey ginew kumoy: tumuŋhoy, ˀaway waɗ slahay a ndiram aka ɓula.»

²⁵Moyis a mbiɗaŋ di: «Kanah ta wãˀ! Naɓa masa vula ndra gwatay ngi gi mikuli ati ngi zlum zlam zlama i ka sukwa?

²⁶I sa ram ti ginew ndrahay a haŋ, ko ginew masa ndir pal aka anta. Asi gwat ngi gi mikuli da Bumbulvuŋ Buymisemuŋ ndra na, i sa jam a wuzla taŋ. Da i sa gaka mikuli da Bumbulvuŋ ti mike na, ndra vuna i sinaka ta, sey da i ndilam le a diga.»

²⁷Amma Bumbulvuŋ a ga ɓa hirnga ngi buy Ezipte a ndir gidaŋ na si, ko a ngum a pula taŋ a ram ta.

²⁸Buy Ezipte a ɓa Moyise na: «Aru! Yi wuɗ i pura hiri ɗik aka mata. Da ki mo le ɓula na, i muc ɗiki!»

²⁹Moyis a ɓaŋ: «K'anta kisa pura hiri ɗu mata, kaɓa ka miɓa vuna si gwaɗ naŋ!»