Read South Giziga EXO 11 Bible Online

EXO 11 - South Giziga bible

EXO 11

¹Bumbulvuŋ a ɓa Moyise: «I wuɗ i ga bonoy ngi kiɗa mi wãˀ da buy madiɗa ngi Ezipte Ezipteheye. A dirba nah, a sa pulukum, ki ram hã a sa ɓulukum ti kẽh ti ɓul wãˀ ma kini.

²Ɓa Israyeleye so na: gwat mipaka ti ɓiri tapasl tapasl malla ti ɓiri gaza na, anja mizli mizilehey a cufuɗam avu cil taŋ Eziptehey, yo ngwasay kwana, a cufuɗam avu cil taŋ Eziptehey aya.»

³Bumbulvuŋ a ga ɓa Eziptehey a gaka mezle da Israyeleye. Na zle Moyis vuna i mbur micawwa a hirwuy Ezipte, yo i mbur micawwa avu gawla ngi buy Ezipteheye waɗ avu mizli gar.

⁴Moyis a ɓa buy Ezipte: «Bumbulvuŋ a ɓi ani: ng'avu wuzla duvuɗ na, i sa bi, i ngira hirwuy Ezipte puɗak.

⁵Modogom misi asi hirwuy Ezipte gar na, a sa mucu, zle avu modogom ɗik masa zum buy ar li ɗiki, modogom ngi ngwas miyaˀa daw, hã avu modogom ngi ginewey.

⁶A sa wudam cərəw cərəw asi ruwuy Ezipte gar, ko a cinam widi kanah ɗaˀ ta ndiɗaˀ wãˀ, yo anta sa cinam tumbuŋ mata ndiɗaˀ wãˀ.

⁷Amma a hay Israyeleye, ko a cinam kiri mawidi mbur malla mawidi ginew tekeɗe anta, ɓa ki sinaka Ezipte ati Israyele, Bumbulvuŋ a pura taŋ, taŋ wal wal.

⁸Dar gawla ɗikey misenna, a sa soko, a huruk hurukam a mbuŋ ɗu, a ɓikiy: «cohom ati mizli ɗikeye!» Akẽh so na, i sa cuhu.» Joˀ Moyis a bi ti mevel fõh fõh ti hay buy Ezipte.

⁹Bumbulvuŋ a ɓa Moyise na: «buy Ezipte mangum cine mi kum ta na, ɓa gwat migam ɗaˀ tahaya, i ga taŋ asi hirwuy Ezipte ti vendeke jaka.»

¹⁰Moyis ati Aroŋ a gaka gwat migam ɗaˀ tahay tayna le cek a mbuŋ buy Ezipte, amma Bumbulvuŋ a ga ɓa hirnga ngi buy Ezipte a tiri gidaŋ na si, ko a ngum pula Israyeley a bam tisi hirwuy naŋ ta.