Read South Giziga EXO 12 Bible Online

EXO 12 - South Giziga bible

EXO 12

¹A hirwuy Ezipte, Bumbulvuŋ a ɓa Moyis ati Aroŋ na:

²«Kiya hana a sa gi avu kum i kiya mudumbuŋ, i kiya muɓulaˀ naŋ ngi slufa vi.

³Ɓaka mizli Israyeleye na: hin kuruˀ ngi kiya hana, wuɗam zuŋ tumuŋ malla zuŋ ˀaw a hay mbur gar malla a wazlaray mbur gar.

⁴Da hay ngi mburo, mizli anta haɗa ngi humbuɗa tumuŋ pala ta na, a sa jumom ati midigwi naŋ migweˀ ngi va, weˀe avu mizli ngi hay naŋhaya. Ki sa winam misi zliv ki humbuɗaka gu.

⁵Ki sa wuɗam gwat mizile ngi vi pal, zuŋ tumuŋ malla zuŋ ˀaw misi hereweɗ anta ava neˀ ta.

⁶Ki sa wam di vu hã a ndila hin kuruˀ nga mufaɗ ngi kiya hana. Mizli Israyeley gar, a sa slaka gwat mizile tuwa ti li zuyyo.

⁷A sa tiɓaka pumbus naŋ, a puyaka da dum ngi miviŋhey ti ka ti ka waɗ da vay ngi muŋ, miviŋ ngi hay taŋ masa zumam araŋ.

⁸A sa tusoko useˀ naŋ ti tus, a dirɗaka ti ɗaf manja ˀis ara waɗ giziŋ miɗalakay.

⁹A wuslaka ti wuslo ta, yo a zumaka mida ti di ta, amma sey mutuso ti tus tewle jom ti hirnga, poprokoy waɗ hur kwacaya.

¹⁰Ki pulam ngi sa zum li naŋ mawuno ta. Da is naŋ a ndir le na, ti miprike, zlumaka avra.

¹¹Zum naŋ ani: kisa zumaka vu kaˀ kaˀ, tarak kulaˀ kulaˀ a sar, ganday kaw kaw a haŋ. Ki sa zumaka kutum kutum. I Pak ngi Bumbulvuŋ.

¹²Ti duvuɗ nah na, i sa ngira hirwuy Ezipte puɗak. I sa kiɗa modogom ngi hirwuy Ezipteheye gar, zle avu ngi mizli ati ngi gineweye ma. Yo i sa ga kiita da kuli ngi Ezipteheye gar. Bumbulvuŋ i ya.

¹³Pumbuso, a sa bigiy hay kum misi anga. Da ya misa pura pumbuso le na, i sa tuwuɗ tuwaɗ ar kumo, yo ti ya masa kiɗa Eziptehey na, bonoy nah anta sa lumukum kumo ta.

¹⁴Hin nah na, i hin ngi wuluk keŋ ara. Vur vi gar na, kisa gam muguzlum ngi hunumiy, ya Bumbulvuŋ. A sa gi avu kumo, i ɓimujuwa mambiɗi ta.»

¹⁵«Bumbulvuŋ a ɓa taŋ ma: Angi hin tarnaˀa, kisa zumam ɗaf manja ˀis araŋ. Zle angi hin mudumbuŋ naŋ na, anja ˀis ngi slikiɗa hapa, a ndir a hay kumo mata. Yo ko wa gar misa zum ɗaf misi ˀis ara le, zle ar hin mudumbuŋ hã ndila hin mitarnaˀ naŋ na, a sa gwahaka ti wuzla Israyeley avra.

¹⁶Hin mudumbuŋ naŋ na, kisa gam cikil madiɗaŋ, angi hin mitarnaˀ naŋ kanah ma. Ti hin tayna, kum anta sa jam haŋ avu slra ta, amma sey ɗaf ngi di ngi mbur gar ɓula.

¹⁷Muguzlum ngi Peŋ manja ˀis ara na, kisa jaka ɓi nah a hirnga ngi wuluk keŋ ar hin mikaslsla, ya mubo ti mizli kumoy tisi hirwuy Ezipte na. Ki sa jaka hin nah a hirnga vur vi vur vi, a sa gi avu kum i ɓimujuwa makiɗ mi ta.

¹⁸Zle angi hin kuruˀ nga mufaɗ ngi kiya mudumbuŋ, ti pastaˀ naŋ na, kisa zumam ɗaf manja ˀis araŋ, hã a ndila pastaˀ ngi hin kukur cuw ngaŋ kaˀ naŋ.

¹⁹Angi hin tarnaˀ na, anta sa lumam ˀis a hay kumoyo ta. Yo ko wa gar misa zuma ɗaf misi ˀis ara le, ko i mbur mislikiɗo ti slikiɗ malla i mbur Israyel kwana, a sa gwahaka ti wuzla Israyeley avra.

²⁰Naŋ kine, kisa zumam di i ɗaf manja ˀis araŋ, ko kum amaka gar na, kum anta sa zumam ɗaf misi ˀis ara ta.»

²¹Moyis a zila mizli micawwa ngi Israyeleye gar, a ɓa taŋ: «A ra wuɗam ziri tumuŋhoy malla ziri ˀaway vur hay kumoy, yo slaka taŋ ngi gi muguzlum Pak.

²²Ki sa wuɗam kalaf ngi izop dar haŋ, kisa caka yop ar pumbus misi ti gandaf tuwa, dar kisa puyaka da dum ngi miviŋ vay muŋ waɗ tika tika. Zle ar nah na, ko mbur a bo avra ta hã li wun.

²³Bumbulvuŋ a sa cuh puɗak a hirwuy Ezipte, ɓa a kiɗa taŋ. Da a sa pura pumbus mupuya le avu dum ngi miviŋ vay muŋ waɗ ti ka ti ka tuwa na. A sa cuh weŋŋe avu miviŋ, anta sa pula mingizla vu nah, a ci ngi hay kumoyo, ɓa a kuɗukum ta.

²⁴Gwat tayna cek na, kisa jaka hirnga, i ɓimujuwa vur ka, waɗ vur ziri ɗikey hã ngi sete.

²⁵Ti kum masa cam nga ruwuy Bumbulvuŋ miɓa ɗaˀ le, a sa vulukum di tuwa na, mezegwel hana kisa jaka hirnga.

²⁶Da ziri kumoy a sa ɓukum le: Kum magam hana, i mezegwel ngi mike na,

²⁷kisa ɓaka taŋ: I mikuli ngi Pak da Bumbulvuŋ. Ti Israyeley misi zleˀe asi hirwuy Ezipte na, Bumbulvuŋ a kiɗa Ezipteheye, amma a cuh weŋŋe avu hay ndraˀahaya, a wusa mizli ngi hay ndraˀahaya ta.» Dar Israyeley a huruk hurukam ti poprok, a hurukom, midibiɗ durus durus.

²⁸Joˀ Israyeley a cohom, gwat Bumbulvuŋ miɓa ɗaˀ le da Moyis ati Aroŋ tuwa, ara gaka kasl kasla.

²⁹Ngi wuzla duvuɗo, Bumbulvuŋ a kiɗa modogom ngi Ezipteheye gar vagay vagay. A zli zle avu modogom ngi buy Ezipte masa cifi buy zleˀe ar li naŋ na, hã avu modogom ngi mbur misi ar dangay, hã sesẽŋ avu modogom ngi ginewey gar.

³⁰Ngi duvuɗ nah na, buy Ezipte, gawla naŋhay waɗ Eziptehey a slikiɗam, widi a gi cərəwcərəw a Ezipte, asi hay mindir manja muc ara anta.

³¹Buy Ezipte a zila Moyis ati Aroŋ ngi duvuɗo, a ɓa taŋ: «Kum ati Israyeleye, slikiɗam! Bam ti wuzla mizli ɗuwoy avra. A ram, ara gaka mikuli da Bumbulvuŋ kaɓa kum miɓaka na.

³²Ɓulaka ginew kumoy a haŋ kaɓa kum miɓaka tuwa, cohom. Yo ɓaka Buymisemuŋ kumo a ɗuwuliy mi!»

³³Eziptehey a wusaka vu da mizli, a pulaka taŋ a cohom kutum, asi a ɓam: «Ani i wuɗam i ngizlam gar!»

³⁴Vurˀe, Israyeley a cohom ti hapa mufukuɗa manja slikiɗi. A juwaka sikiɗ ngi fukuɗa hapahaya ti godo taŋhay, a luwaka taŋ a gagalaˀay.

³⁵Israyeley a gaka kaɓa Moyis miɓa taŋ di, a cufuɗam gwat muvuɗa ti ɓiri gaza, ti ɓiri tapasl tapasl waɗ godohoy avu Ezipteheye.

³⁶Akẽh na, Bumbulvuŋ a ga ɓa Eziptehey a gaka taŋ mezle, a vulaka taŋ gwat taŋ mucufuɗama. Vurˀe, Israyeley a kurtoko gwat ngi Ezipteheye talalaŋ!

³⁷Israyeley a slikiɗam baɗ a Ramsese, a zuɓam jiviɗ nga Sukot, mizli mizilehey a gam gwat ngi durmuk skat merkeɗe, ngwasay, ziri waɗ mizli migam gal le na, taŋ ara ta.

³⁸Mizli mekelemey wal wal a ram le asi taŋ ya, waɗ tumuŋ, ˀaway ati slahay ˀuyok ˀuyok.

³⁹A da ka hapa muhulɓa, taŋ musoko di ti hirwuy Ezipte tuwa, a dam di helelem mikefer kefer manja ˀis ara, asi hapa a nguf ta. Naŋ kine, a ɓulaka taŋ ti Ezipte manja a wam vu, yo a hilam gwat nga zum a jiviɗe ta ma.

⁴⁰Israyeley micifam a Ezipte na, a zikam vi skat skat mufaɗ ti kukur makir.

⁴¹Yo ar kiɗa mi ngi vi skat skat mufaɗ ti kukur makir na, mizli ngi Bumbulvuŋhoy gar, a bam sikwit sikwit tisi hirwuy Ezipte ar hin naŋ muɗuva kaslsla.

⁴²Ti Bumbulvuŋ mubo ti Israyeley ti Ezipte na, i duvuɗ ngi hinje ta kap. Taŋ kwana, vur vi vur vi, ar duvuɗ nah na, a hinjam ta kap aya, asi duvuɗ nah na i muvula le da Bumbulvuŋ.

⁴³Bumbulvuŋ a ɓa Moyis ati Aroŋ na: «Jiviɗ ngi gi mezegwel ngi Paka, anihĩ: ko mbur mulak a zuma ta.

⁴⁴Mbur beke mihiɗika ti hiɗik gar, ɓa a sa zum na, sey da ki ca le a mizaw.

⁴⁵Moholoy malla migi slra ngi dala a zuma ta.

⁴⁶A zumaka angi viŋ purla. Jiviɗ anta ngi bo ti useˀ naŋ ng'avra ta. Ki wahaka tesleye ta.

⁴⁷Mizli Israyeley gar a gaka muguzlum nah.

⁴⁸Mbur mislikiɗo ti slikiɗ asi ruwuy kumo, da a wuɗ le ɓa a ga muguzlum Pak da Bumbulvuŋ na, anja mbur ngi hay naŋ gar a ci kulaˀ le a mizaw. A dirba nah, a sa ga muguzlumo so, asi a tiri le kaɓa i mbur Israyel. Amma ko mbur mici mizaw ta a zuma ta.

⁴⁹I ɓimujuwa mupurla vur mbur Israyel ati mbur mislikiɗo ti slikiɗ nga wuzla kumo.»

⁵⁰Israyeley gar a gaka kanah. A gaka kasl kasl kaɓa Bumbulvuŋ miɓa zleˀe da Moyis ati Aroŋ.

⁵¹Bumbulvuŋ a bo ti Israyeleye tisi hirwuy Ezipte ti jiviɗ naŋ, ar hin naŋ mujuwa kaslsla.