Read South Giziga EXO 14 Bible Online

EXO 14 - South Giziga bible

EXO 14

¹Bumbulvuŋ a ɓa Moyise na:

²«Ɓa Israyeleye, ɓa a moko, a sa pam a Pi-hahirot, ar wala ngi Mikdol ati mubuliy. Ki sa paka walahay guɗuk kumo a diga, puɗak ar Baˀal-Sefoŋ, gweˀ a ciki mubuliy.

³Dar buy madiɗa ngi Ezipte a sa ɓi vur Israyeleye: Pura t'ani a laˀam kiŋ kiŋ ka mibihirngahay lambaˀ asi ruwuyo, wuzla ɓuh mikirɗak kirɗaka, a ziza taŋ le, a gi le birngiŋ avu taŋ!

⁴I sa ga ɓa hirnga ngi buy Ezipte a tiri gidaŋ, a sa supukum. Amma i sa biga dudok ɗu ava, ti ya masa ngizla taŋ ati soje naŋhay gar na, Eziptehey a sa sinaka yi Bumbulvuŋ.» Joˀ Israyeley a gaka kanah gisiŋ.

⁵Mizli a ɓaka buy Ezipte ati gawla naŋhaya na: Israyeley a kilam le na. Akẽh na, buy Ezipte ati gawla naŋhay, a mbiɗaka wuluko, a ɓam: «I gam hana i mike? I pulaka Israyeley a cohom mbak slra ndra!»

⁶Buy Ezipte a ɓi ɓa a juwakaŋ mota ngi vurumoyo, a cohom ati soje naŋhaya.

⁷A hil mota ngi vurum hirnga hirnga skat skat merkeɗ waɗ mota ngi vurum ngi ruwuy Ezipte gar, mota ngi vurum gar njukumoˀ njukumoˀ ti sojehey.

⁸Bumbulvuŋ a ga ɓa hirnga ngi buy Ezipte a tiri gidaŋ, dar a sipa Israyeleye. Ti Israyeley mabam na, a waka zleˀe kaɓa a pulam vu le.

⁹Ezipteheye ti pilis taŋhay gar, mota ngi vurumoy waɗ misi piliseye, a sipaka Israyeleye, ara jaka taŋ is a Pi-Hahirot, puɗak a mihiri ngi Baˀal-Sefoŋ, gweˀ a ciki mubuliy, taŋ mipaka walahay guɗuk a diga tuwa.

¹⁰Israyeley tuwa, keɗ na, Eziptehey ara supoko taŋ, yo buy Ezipte naŋ gweˀ si! Zluwun a ga Israyeleye le haɗa, a wudam ng'avu Bumbulvuŋ ˀay ngar ngar.

¹¹A ɓaka Moyise: «Ki so ti ndra nga muc a wuzla ɓuh akaka na, li dika vu a kic le a Ezipte kwa mbrike? Ki bo ti ndra ti Ezipte vur mike?

¹²I ɓukuw le a Ezipte a diga takwa: Pula ndr'i gam gawla ngi Eziptehey! Zuwen ndra migam gawla ngi Eziptehey, a funa ndra mamicam a wuzla ɓuh na le.»

¹³Moyis a ɓa mizli: «Ki zluwunam ta! Cicam gidaŋ gidaŋ! Dana, kisa puraka Bumbulvuŋ masa luhukumo. Kum mupuraka Eziptehey dana ani na, kum anta sa puraka taŋ mata ndiɗaˀ wãˀ.

¹⁴I Bumbulvuŋ masa kiɗ vu ar deɗe kumo, kumo cifam teˀteˀ»

¹⁵Buymisemuŋ a ɓa Moyise: «Ki tiliy mi da ya vur mike? Ɓa Israyeley vuna a zuɓam jiviɗ jaka!

¹⁶Amma ka, zuɓa ganday a muŋ, zuɓa haŋ ng'ar mubuliye, wuɗuka kpah a wuzla cuw, ɓa Israyeley a tuwuɗaka ti sar njiraŋ njiraŋ.

¹⁷Na ya, yi sa ga ɓa hirnga ngi Eziptehey a tiri gidaŋ, ɓa a cam ng'ar mubuliy a dirba kumo. Dar yi sa biga gidaŋ ɗu angi buy Ezipte ati mizli naŋhaya gar, angi mota ngi vurum naŋhay waɗ misi pilis naŋhay.

¹⁸Naŋ kine, ya misa biga gidaŋ ɗu le angi buy Ezipte, angi mota ngi vurum naŋhay waɗ ar misi pilis naŋhay na, a sa sinaka Bumbulvuŋ i ya.»

¹⁹Modro ngi Buymisemuŋ miɓaˀ zleˀe a mbuŋ Israyele tuwa, ara cici ti dirba taŋ. Musure ngi gazlavay miɓaˀ zleˀe a mbuŋ taŋ tuwa ma na, a sa ki ti dirba taŋ.

²⁰A cici ar wala ngi Eziptehey ati Israyeley. Gazlavay a gi luvuŋ tir vay mekeleme, tir vay numuŋ, a ga li njahha ti duvuɗo. Akẽh na, kap ti duvuɗo, mbur makirih ng'avi cala anta.

²¹Moyis a zuɓa haŋ ng'ar mubuliye, kap ngi duvuɗo, Bumbulvuŋ a kursa yam ngir mubuliye ti burkataŋ gambara maso tisi pas ngi miprik, a hila yama, yam a wucuh wucah, li a ndir ngbalaŋ ngbalaŋ.

²²Israyeley a tuwuɗaka mubuliye ti sar njiraŋ njiraŋ. Yam a gi toŋ toŋ tir hazum taŋ, toŋ toŋ tir gula taŋ kaɓa mohol.

²³Eziptehey a sipaka taŋ, a cam a dirba taŋ ti pilis ngi buy Ezipteheye gar, mota ngi vurum naŋhay waɗ misi pilis naŋhaya cek sesẽŋ a wuzla mubuliy.

²⁴Ng'avi li mawuɗo wun na, Bumbulvuŋ a singilo Ezipteheye ti wuzla musure ngi vu ati ngi gazlavay tuwa, a ga ɓa Eziptehey a gam welele lambaˀ.

²⁵A ja sar ngi mota ngi vurum taŋhaya gric gric, hã a kukurom tuwaˀ tuwaˀ. Akẽh na, Eziptehey a ɓam: «Kulukum kileŋ avu Israyeleye, asi i Bumbulvuŋ makiɗ vu ati ndra ar deɗe taŋ!»

²⁶Bumbulvuŋ a ɓa Moyise: «Zuɓa haŋ ng'ar mubuliye: ɓa yam a mo ng'ar Eziptehey, ng'ar mota ngi vurumoy waɗ ng'ar misi piliseye!»

²⁷Moyis a zuɓa haŋ ng'ar mubuliye. Gweˀ ng'avi li mawuɗ a wun na, yam a mawa nga naŋ nga naŋ ng'ar li naŋ a muŋ. Eziptehey makilam na, ara zliram gajaˀ ati yama. Dar Bumbulvuŋ a pa taŋ haŋ nga wuzla yama.

²⁸Mota ngi vurumoy ati misi pilisey, mizli ngi buy Ezipteheye cek micam nga wuzla yam asi Israyeley na, yam a sawa, a nda taŋ pay, ko mbur loŋ mindir anta.

²⁹Amma Israyeley a tuwuɗaka mubuliye zleˀe ti sar njiraŋ njiraŋ, yam a gi toŋ toŋ ti hazum, toŋ toŋ ti gula kaɓa mohol.

³⁰Naŋ kine, tapasa, Bumbulvuŋ a laha Israyeleye le tisi haŋ ngi Ezipteheye, yo Israyeley a puraka vagay ngi Ezipteheye le a ˀaydidike.

³¹Israyeley a puraka gidaŋ Bumbulvuŋ mikiɗ di Eziptehey na le. Dar a zluwunam ti Bumbulvuŋ, a pulaka mevel taŋ da Bumbulvuŋ waɗ da gawla naŋ Moyise.