Read South Giziga EXO 16 Bible Online

EXO 16 - South Giziga bible

EXO 16

¹Israyeley a pulaka Elime. Hin mukuruˀ nga zlum ngi kiya mucuw naŋ, a dirba taŋ muboko ti Ezipte tuwa, ara ndilam a Sin, ar wala ngi Elim ati Sinay.

²Taŋ misi a wuzla ɓuh a diga na, Israyeley gar a dirɗaka Moyis ati Aroŋ.

³A ɓaka taŋ na: «Kay! Anja zuwen ndra mumicam ti gidaŋ ngi Buymisemuŋ a Ezipte a funa le. Adiga. zleˀe na, ndra joa ciki misirgaɗ ngi useˀhey, i zumam ɗafa hã i mbam! Na ki soko ti ndra gar nga wuzla ɓuh hana, ɓa zigiduw a muc ti may sukwa?»

⁴Bumbulvuŋ a ɓa Moyise: «I sa pukum gwat ngi zumo ti muŋ ka vuŋ magi. Mizli a sa bam, a sa hilam gwat ngi zumo vur hin gar, ngi hiipasa, ɓa i jiɗa taŋ: da a jaka ɓimujuwa ɗu a hirnga malla da a jaka ta kwana.

⁵Hin mimerkeɗ naŋ na, da ki ra da ka kum mihilaka ngi hin pal kaɓa hõyyõ tuwa na, a sa tiri ngi hin cuw.»

⁶Moyis ati Aroŋ a ɓaka Israyeley gar: «Pastaˀ dana na, kisa sinaka mubo ti kum ti hirwuy Ezipte na, i Bumbulvuŋ.

⁷Ti miprike, kisa puraka dudok ngi Bumbulvuŋ, asi a cine kum madirɗakaŋ na le. Ndra, ndr'i ndilaka le ɓa hã ki dirɗam ndra kwa?»

⁸Moyis a wuɗ a ɓi na: «Ki sa puraka, ti pastaˀa, Bumbulvuŋ a sa vulukum useˀ, ti miprike, a sa vulukum ɗaf hã ki mbam, asi Bumbulvuŋ a cine kum madirɗakaŋ na le. Ndra, ndr'i ndilaka ta. Kum madirɗam na, i ndra ta, amma ki dirɗam di i Bumbulvuŋ gisiŋ gisiŋ.»

⁹Moyis a ɓa Aroŋ: «Ɓa Israyeleye gar: ɓa a kirohoko ng'avu Bumbulvuŋ, asi a cine taŋ madirɗakaŋ na le.»

¹⁰Yo ti Aroŋ mira ɓa Israyeley gar tuwa na, a mbiɗaka hiri ngir ti wuzla ɓuh mikirɗak kirɗaka: Akẽh na, dudok ngi Bumbulvuŋ a bugo vu ar gazlavay.

¹¹Bumbulvuŋ a ɓa Moyise:

¹²«I cine Israyeley madirɗikiy na le, ɓa taŋ na: Ki sa zumam useˀ ti li zuyyo, ti miprike, kisa mbam ti ɗaf, joˀ kisa sinikiy, Bumbulvuŋ Buymisemuŋ kumo i ya.»

¹³Ngi pastaˀ nah kalla, tuɓurlayay a slikiɗoko, a cifam ar walahay guɗuko finiˀ finiˀ, yo ngi miprik naŋ, wulngar a ruwuyo krit krit, gun walahay guɗuko.

¹⁴A dirba wulngar musuf na, gwat a ndir a ruwuyo tirsesese, buɗ buɗ kaɓa kutuɓu.

¹⁵Israyeley mupuraka na, a cufuɗam vu ar wala taŋ, a ɓam: ‹Man hu?› mbiɗeˀvra: ‹Nah i mike?› asi a sinaka i gwat mike ta. Moyis a ɓa taŋ: «I gwat ngi zum Bumbulvuŋ muvulukum di.

¹⁶Bumbulvuŋ a ɓukum ani: Hilam weˀe, zliv mbur a zuma gu, daram pal vur hirnga ngi mburo, mbur gar a hil kahana, tiɗeˀe a hirnga mizli ngi hay naŋhaya.»

¹⁷Israyeley a gaka ka naŋ miɓa, mekelemey a hilam fineˀ nah, numuŋhoy a hilam keɗec.

¹⁸Amma a waka ti daram tuwa na: mbur mihil fineˀ nah tuwa, a tuwuɗa ta, yo mihil keɗec na ya kwana, a kic ta ma. Mbur gar a hil weˀe zliv a zuma gu.

¹⁹Moyis a ɓa taŋ ma: «Anja mbur a wi di vu ngi tiprik ta!»

²⁰Numuŋhoy a cinaka mi da Moyise ta, a wam di vu ngi tipriki, amma a ji mumuyuŋ, a zĩˀĩ hirɓislik. Dar Moyis a ji mevel ar taŋ.

²¹Zle tapasa, a hilam kaslsla ngi zum vur hine vur hine. Da pas ara zlum na, a luwusla mandir ar li naŋ.

²²Hin mimerkeɗ naŋ na, a hilam ngi hin cuw, daram cuw vur hirnga ngi mburo. Mizli madiɗa ngi wuzla mizli gar a soko, a ɓaka da Moyise.

²³Moyis a ɓa taŋ: «Bumbulvuŋ a ɓi na: ti prike, i Sabat, pas musuka vu muvula le da Bumbulvuŋ. Gwat ngi di ti diheye, da ka taŋ, gwat ngi vuruɗ ti vuruɗoyo, vurɗoko taŋ. Is naŋ mandire, wam di vu ngi tipriki.»

²⁴A wam di vu ngi tiprik naŋ, kaɓa Moyis miɓa tuwa. A zĩˀĩ ta, a ji mumuyuŋ ta.

²⁵Moyis a ɓa taŋ: «Zumaka dana, asi dana, i pas musuka vu, ngi ɗuva hirnga da Bumbulvuŋ. Dana, kum anta sa lumam gwat avra ta.

²⁶Angi hin merkeɗe, kisa hilam, amma angi hin mitarnaˀ naŋ na, anta, i hin ngi sabat.»

²⁷Dambalaka angi hin mitarnaˀ naŋ vuna, mizli ada bam nga hile, amma ko a lumam gwat ta.

²⁸Bumbulvuŋ a ɓa Moyise: «Ɓimuɗuva ati ɓimujuwa ɗuwoy na, kisa cinaka ta hã ti vunaka?

²⁹Sinaka sin le, da Bumbulvuŋ a vulukum hin ngi sabata le ngi musuka vu na, angi hin mimerkeɗ naŋ, a vulukum gwat ngi zumo ngi hin cuw aya. Hin mitarnaˀ naŋ na, ko wa gar a ndir a hay naŋ. Anja mbur a bi avra ta.»

³⁰Dar mizli a musukam vu ar hin mitarnaˀ naŋ na so.

³¹Israyeley a caka slimiɗ da gwat ngi zum nah man. A bam vu ati zingaˀ ngi koriyandir [3] naŋ babara ndezlezle, avu mi, naŋ kaɓa magala misi mam angaŋ.

³²Moyis a ɓi: «Bumbulvuŋ a ɓi ani: hilam daram cerre, ngi wi di vu da tizer kum nga mbuŋ, ɓa a sa puraka ɗaf ya mingir ti kum ti naŋ, a wuzla ɓuh mikirɗak kirɗak, ti ya mubo ti kum ti Ezipte na.»

³³Moyis a ɓa Aroŋ na: «Wuɗ tutuŋ, waɗ man daram pal cerere, pa ng'ara, yo ɗuva taˀ a mbuŋ Bumbulvuŋ, ngi wi di vu vur tizer kum nga mbuŋ.»

³⁴Aroŋ ara ɗuva tutuŋ tuwa taˀ a mbuŋ ɗerewol ngi jumoˀaya, ɓa a wam di vu, kaɓa Bumbulvuŋ miɓa ɗaˀ le da Moyis tuwa.

³⁵Israyeley a gam vi kukur mufaɗ ar li zuma man, hã a ndilam di a ruwuy mizli misi araŋ, ar maakway ngi Kanaˀan.

³⁶Daram pal ngi man na, i mukuruˀ ngi daram taŋ mawam di gwat ndrehhe.