Read South Giziga EXO 18 Bible Online

EXO 18 - South Giziga bible

EXO 18

¹Zetro i masay ngi ruwuy Madiyan, i jomo ngi Moyis. Gwatay gar Buymisemuŋ miga taŋ da Moyis waɗ da Israyeley mizli naŋhay na, Zetro a cine ɓi nah le gar, Bumbulvuŋ mubo ti Israyeley ti Ezipte na, a cine le ma!

²Zetro, jomo ngi Moyise, a zuɓa zuŋ naŋ Sefora, ngwas ngi Moyise, naɓa Moyis a ɓula le zleˀe,

³waɗ ziri naŋ mizilehey mucuwo: pal numuŋ a zilaka Gersom, mbiɗeˀvra ‹i moholoy akẽh›, a ɓi zleˀe na: «I tiri moholoy le asi ruwuy mulak.»

⁴Yo mekelem a zilaka Eliyezer, mbiɗeˀvra ‹Buymisemuŋ ɗu mikila widi›, a wuɗ a ɓi: Buymisemuŋ ngi cine ɗu a kilo widi ɗu le, yo a loho ya le avu maslalam ngi buy madiɗa ngi Ezipte.

⁵Zetro, jomo ngi Moyise, ngwas ngi Moyis waɗ ziri naŋ mizilehey mucuw tuwa, a ram ng'avu Moyis a wuzla ɓuh, ar li Moyis miɗiya guɗuk naŋ a muwã ngi Buymisemuŋ na.

⁶Zetro a ɓi ɓa a ɓaka Moyise na: «I ya jomo ɗik Zetro, i soko ng'avi ka ati ngwas ɗik waɗ ziri ɗik mizilehey mucuw na.»

⁷Moyis a bo nga ji hirnga ti jomo naŋ, a huruk huruk a mbuŋ naŋ, a jaŋ kuɓuy, a jam haŋ jeˀjeˀ ar wala taŋ, dar a cam ng'ar guɗuku.

⁸Gwatay Bumbulvuŋ miga taŋ gar da buy Ezipte waɗ da Eziptehey asi Israyeley, yo Bumbulvuŋ mingir ti taŋ avu gwat mutuwaˀhay migam a jiviɗ gar na, Moyis a slufa taŋ cek da jomo naŋ.

⁹Zetro a mumul asi gi mezle gar Bumbulvuŋ miga da Israyeley, waɗ naŋ muloho taŋ tisi haŋ ngi Eziptehey na.

¹⁰Dar Zetro a ɓi: «Sise da Bumbulvuŋ muloho kum tisi haŋ ngi Eziptehey waɗ tisi haŋ ngi buy Ezipte na. A loho mizli le tisi haŋ ngi Eziptehey!

¹¹Wurenna, i si na le muduba, Bumbulvuŋ naŋ madiɗa fineˀ kuliheye, a biga ti Eziptehey maguzuvuraka Israyeley.»

¹²Zetro jomo ngi Moyise, a gi mikuli ti ginew zlam zlam waɗ mikuli ngi jumoˀay. Akẽh na, Aroŋ ati mizli micawwa ngi Israyeley, a soko a zumaka ɗaf ngi mikuli a mbuŋ Buymisemuŋ ati jomo ngi Moyise.

¹³Li naŋ muwun na, Moyis a cifi le ngi gi kiita, mizli ara kutukoko kiita zle ngi miprik hã pastaˀ.

¹⁴Jomo ngi Moyis a pura gwat Moyis maga da mizli na le, a ɓaŋ: «Ki gi nah i mi da mizli ka? Ki cifa kiita pal ɗike si, mbak mizli hirkim, zle ti miprik hã pastaˀ mbrike?»

¹⁵Moyis a ɓa jomo naŋ na: «Mizli a soko avu ya na, ɓa i sla taŋ kiita Buymisemuŋ maɓa.

¹⁶Da a tiram le, a wuɗam ɗiya ɓi nah le na, a soko ng'avi ya, i sla taŋ wala ngi gwat mawuɗka taŋ ˀaya, i biga taŋ ɓimuɗuva ati ɓimujuwa ngi Buymisemuŋ.»

¹⁷Jomo ngi Moyis a ɓaŋ: «Gwat ka maga nah na, naŋ kuy ta.

¹⁸Ki sa giram kupuyah wãˀ ati mizli ngi ciki ɗikeye. Slra nah a didiluw le, ki ga pal ɗike gu ta.

¹⁹Wurenna, ciniy di, i wuɗ i vuluw kuti, anja Buymisemuŋ a ndir ati ka! Slra ngi ɗike na, i ngi cici ar li ngi mizli a mbuŋ Buymisemuŋ. Ka kisa ru ti ɓi taŋhaya nga mbuŋ Buymisemuŋ,

²⁰ki ɓa taŋ ɓimuɗuva ati ɓimujuwa ngi giheye. Ki sa biga taŋ jiviɗ ɓa a sipakaŋ waɗ gwat ngi gi taŋ a wuzla mizli.

²¹Is naŋ gar na, wini mizli mupuɗaw puɗaway mazluwunam ti Buymisemuŋ, mizli mikaslsla, manja may gwatay, ki cifa taŋ i buy ɓihey a hirnga mizli durmuk durmuk, a hirnga mizli skat skat, a hirnga mizli kukur zlum kukur zlum, waɗ a hirnga mizli kuruˀ kuruˀ.

²²A sa ndiram ndrehhe ar li gi kiita da mizli. Ɓi micawwa gar na, a sa mbuɗokuw di, amma ɓi memeɗehey na, a sa ɗiyaka taŋ ti haŋ taŋ. Da ki ra ga kahana na, slra ɗike, a sa gi kefeke, asi ki vula taŋ buyɓi ngi gwataya le ya!

²³Da ki ra ga kahana, ka Buymisemuŋ mawuɗ na, naɓa kisa gir ta, yo ma na, mizli gar a sa mam ngi hay taŋhay ti mevel taŋ zuyyo.»

²⁴Moyis a cine mi da jomo naŋ, a ga gwataya tiɗeˀe kaɓa naŋ miɓaŋ.

²⁵Moyis a wini mizli mupuɗaw puɗaway a wuzla Israyeley gar, a cifa taŋ i buyɓi a hirnga mizli: buyɓi a hirnga mizli durmuk durmuk, skat skat, kukur zlum kukur zlum, waɗ a hirnga mizli kuruˀ kuruˀ.

²⁶A ndiram ar li gi kiita da mizli. Gwat mutuwaˀ na, a soko di ng'avi Moyise, amma ɓi memeɗehey na, a gaka kiita naŋ ti haŋ taŋ.

²⁷Akẽh na, Moyis a mbiɗa mi da jomo naŋ, dar jomo naŋ a mi nga hirwuy naŋ gwaɗ naŋ.