Read South Giziga EXO 19 Bible Online

EXO 19 - South Giziga bible

EXO 19

¹Hin mudumbuŋ ngi kiya mimakir naŋ, a dirba Israyeley muboko ti hirwuy Ezipte na, a ndilam a wuzla ɓuh mikirɗak kirɗak ngi muwã Sinay.

²A bam baɗ a Refidime, ara ndilam a diga, a ɗiyaka guɗuk taŋhay a wuzla ɓuh akẽh, gweˀ a sar muwã Sinay.

³Ar nah na, Moyis a jiɗ nga muwã ɓa a zliram ati Buymisemuŋ. Bumbulvuŋ a zilo Moyis ti hirnga muwã, a ɓaŋ: «Ki sa ɓa Israyel dideˀ ngi Zakopoyo na:

⁴Gwat ya miga da Eziptehey, ya mijijiro kum joˀ ar kirpasl ngi kurom, yo ya mindilo ti kum sesẽŋ avu ya akaka na, ki puraka le ti hiri kumo ta kwa?

⁵Na wurenna, da ki cinaka mingiɓi ɗu le, yo ki jaka ɓi ngi jumoˀay ɗu le a hirnga na, kisa tiram mizli ɗuwoy misek pal a wuzla mizli mekelemey gar, asi hirwuy cek inga ya.

⁶Ki sa tiram avu ya, sukwi ngi masayay, sukwi ngi mizli muvuku vu taŋ. Mingiɓi ka masa ɓa da Israyeley i nah so.»

⁷Moyis a mo ng'ar walahaya, a zila mizli micawwa ngi Israyeleye, a ɓa taŋ ɓi ngi Bumbulvuŋ miɓa taŋ di na cek.

⁸Mizli gar a mbiɗakaŋ di misi purla: «Ɓi Bumbulvuŋ miɓa ndra taŋ gar na, i sa gakaŋ.» Joˀ Moyis ara mbiɗa mingiɓi ngi mizli da Bumbulvuŋ.

⁹Bumbulvuŋ a ɓa Moyise: «Pura ɗi, y'ani ru sesẽŋ avu ka, ya ɗum ar gazlavay mititim titim, ɓa ndra masa kiɗam slir ati ka na, mizli a sa cinakaŋ, a pulukuw mevel taŋ wãˀ ngi sete.» Joˀ Moyis a mbiɗa mingiɓi ngi mizli da Bumbulvuŋ.

¹⁰Bumbulvuŋ a ɓa Moyise na: «Aru ng'avi mizli, zuɓa taŋ hiryi avra, dana waɗ tiprik na, anja a bunaka zana taŋhaya.

¹¹Anja a wam vu ngi duwul. Asi duwulo, i sa po sar nga muwã Sinaya mur mizli gar.

¹²Sla maakway da mizli, ɓa taŋ: «Jam lesl, anja ki jiɗam nga muwã ta, yo anja ki gumbaˀam ng'ava ta.» Ko wa gar mugumbuˀ le ng'avu muwã hana na, a sa kiɗaka vagay!

¹³Ko mburu, ko gwat misããmi, a pulaka ti siifa ta. Anta sa jaka haŋ ava ngi kiɗ naŋ ta ɓula, amma a sa kuyupaka ti ɗugur malla a sa mulaka ti mul. Sey da ara faka tulumo so na, mizli mekelemey purla purla a sa jiɗam nga muwã ɓula.»

¹⁴Moyis a po sar ti muwã ng'avi mizli. A zuɓa taŋ hiryi avra, mizli a bunaka zana taŋhaya.

¹⁵Joˀ Moyis a ɓa mizli: «Wam vu ngi kutuko hin mimakir na, ki gumbaˀam ng'avi ngwas kumoyo ta.»

¹⁶Ngi miprik prik, ngi hin mimakir naŋ tuwa na, a cinam ndisl ngi vuŋ, ara wucuɗ, gazlavaya titim titim a hirnga muwã, waɗ a cinam tulum mazil mi. Mizli ngir walahaya gar a jijikam.

¹⁷Moyis a bo ti mizli tir walahaya nga ji hirnga ti Buymisemuŋ a duba gala. A cicam cek a sar muwã.

¹⁸Muwã Sinaya gar i cunju tirslik, asi Bumbulvuŋ a po sar le ara nga muwã. Cunju tirslik kaɓa mavurɗom muzum, muwã gar a wus hiɓik hiɓik.

¹⁹Tulum tuwa, ara cin ti gidaŋ fineˀ misi zleˀe ma. Moyis miɓi le ɗaˀ ɗaˀ na, Buymisemuŋ a mbiɗaŋ di ti ndisl ngi vuŋ.

²⁰Bumbulvuŋ a po sar nga hirnga muwã Sinaya, a zila Moyise nga diga, joˀ Moyis a jiɗ ng'ava.

²¹Bumbulvuŋ a ɓaŋ: «Pi sar, ara ɓa mizli ɗaˀ ɗaˀ le, anja a wusam vu nga pur ɗu ta, naɓa mizli haɗa a sa micam.

²²Ko masayay makirohoko ng'avi ya gu na kwana, sey a bunaka mungra taŋhaya ceɗ ceɗ le, da kine ta na, ya Bumbulvuŋ i kiɗa taŋ.»

²³Moyis a ɓa Bumbulvuŋ: «Mizli anta jiɗoko nga muwã Sinaya ta, asi ki ɓa ndra le zleˀe ɗaˀ ɗaˀ le, ki ɓi na: sla maakway ngi sar muwã gunno, ɓa a tiri nga ya Buymisemuŋ!»

²⁴Bumbulvuŋ a ɓaŋ: «Pi sar a muŋ, ɓa kisa jiɗoko ati Aroŋ. Amma masayay waɗ mizli, anja a wusam vu ngi jiɗo ng'avi ya Bumbulvuŋ ta, vur ya makiɗa taŋ!»

²⁵Moyis a pi sar ng'avi mizli, a ɓa taŋ.