Read South Giziga EXO 2 Bible Online

EXO 2 - South Giziga bible

EXO 2

¹Mbur ada, i mbur ngir sukwi ngi Levi, a zuɓ zuŋ ngi sukwi nah tehhe a muŋ.

²Ngwas a gi hur, a yi mangal mizile, a pura na, naŋ kuy haɗa, a ɗumo ɗum hã kiya makir.

³A pura na, nga mbuŋa ɗumo gu mata. A wuɗ gadagar mugujuk gujuk, mija ti ngaalak, a kuroŋ gudroŋ waɗ tebeɗe, a ka mangal tuwa kutuk araŋ, ara ka ɓaˀ a wuzla lavaɗay misi a mi mizaw tuwa.

⁴Mangala, sukum naŋ mongoso, a ro deŋ akẽh, zar neˀ, ara puraŋ, da i mi masa gi ava ka na.

⁵Zik neˀ na, zuŋ ngi buy Ezipte a pi sar nga bun a mizawa, naɓa cil naŋhay ara laˀam ɓaˀa ˀaydidike. Zuŋ tuwa, a pura gadagar misi a wuzla lavaɗ tuwa le, a slin zuŋ migi slra naŋ nga zuɓo di.

⁶A wuna wun, keɗ na, i mangal mizile, ara tuwuy. A puraŋ ircece, a ɓi: «I mangal ngi mizli Heberey.»

⁷Sukum ngi mangal tuwa, a ɓa zuŋ ngi buy Ezipte: «Ki wuɗ ɓa i ra zilo ngwas asi ngwas Hebereye, ɓa a guluw di kwa?»

⁸Zuŋ ngi buy Ezipte a mbiɗaŋ di: «A ra zilo di.» Zuŋ tuwa, ara zilo mumuŋ mijeŋŋe ngi mangal vuna.

⁹Zuŋ ngi buy Ezipte a ɓa ngwasa: «Zuɓa mangala, giliy di, yo yi sa vuluw migir ɗike.» Ngwas a zuɓa mangala, a gilaŋ di.

¹⁰Mangal a gil, ngwas a so di da zuŋ ngi buy Ezipte. A tiri mangal naŋ, a caŋ slimiɗe Moyis, asi a ɓi na, «I bo di tir yam.»

¹¹Moyis a gil le muduba, ngi pas mekelem ada na, a bi ng'avu sukum naŋ Heberey, a pura slra taŋ magaka takˀay na. A pur mbur Ezipte makiɗ mbur pal a wuzla sukum naŋ Heberey.

¹²Moyis a pur hiri keɗ keɗ gun na, a pur mbur ta, a kiɗa mbur Ezipte tuwa vagay, a dika dak dak ng'ar muyuŋ.

¹³Li naŋ muwun ma na, a bi ma: keɗ na, mizli Heberey cuw, ara kiɗam vu. A ɓa mbur muzluɓa ɓi na: «Ki kiɗa mbur ngi ruwuy ɗik asi mike?»

¹⁴Mbur tuwa, a mbiɗaŋ di: «Mucuw ka ki buy, yo ɓa ki ga ndra kiita i waka? Ki ro ti wuluk ngi kiɗ ɗu, kaɓa ka mikiɗa mbur Ezipte na ya kwa?» Zluwun a ga Moyise le, a ɓi ti kwacay naŋ: «Mizli a sinaka ɓi hana vuna le!»

¹⁵Buy Ezipte a cin mizli maɓaka ɓi hana le, a sipa Moyise ngi kiɗ vagay. Amma Moyis a kil ti hay buy Ezipte, ara cifi a hirwuy Madiyan, naŋ mindil a diga na, a cifi joˀ gweˀ avu vigiɗ ngi yam.

¹⁶Masay ngi hirwuy Madiyan ada, naŋ ti ziri mongosohoy tarnaˀ. A soko nga nuwa yam, ɓa a nahaka suwã, ɓa ginewey ngi cine taŋ a sam.

¹⁷Mijiginey a soko, a ɓulaka taŋ. Dar Moyis a slikiɗ ɓa a jina taŋ, a vulaka yam da ginew taŋhaya.

¹⁸A moko ng'avi cine taŋ Zetro, Zetro a ɓa taŋ na: «Ki moko dana kutum vur mike?»

¹⁹A ɓakaŋ: «Mbur Ezipte ada, micik vu ar ndra avu mijigineye, munuwa ndra yam i naŋ vuna, yo a vula yam da gineweye!»

²⁰Zetro a ɓa ziri naŋhaya: «Na naŋ amaka? Ki pulaka mbur nah a diga vur mike? Ziloko di, ɓa a sa zum ɗafa!»

²¹Akẽh na, Moyis a ngum le ɓa a cifi a hay Zetro. Joˀ Zetro a vulaŋ zuŋ naŋ Sefora ngi ngwasa.

²²Sefora a yi mangal mizile, Moyis a caŋ slimiɗe Gersom, mbiɗeˀvra, mislikiɗa ti slikiɗi, asi a ɓi na: «I slikiɗo ti slikiɗ nga hirwuy mulaka!»

²³A zikam a zikam na, buy Ezipte a mucu. Israyeley ara niˀicam ti slra i ngi beke migisiŋ gisiŋ, a wudam. Widi taŋ ti slra migisiŋ gisiŋ ngi beke na, a ndil sesẽŋ avu Buymisemuŋ.

²⁴Buymisemuŋ a cin tuwuy taŋ na le, a wuluk keŋ ar jumoˀay naŋ ati Abraham, Izak waɗ Zakopo.

²⁵Buymisemuŋ a pura Israyeleye, a si na joˀ taŋ le muduba.